ကျောက်တော် အလယ်ကျွန်းကျေးရွာကို ဂျက်တိုက်လေယာဥ်ဖြင့်ဗုံးကြဲ၍ အမျိုးသမီး ၁ ဦးသေဆုံး၊ ကလေး ၂ ဦးအပါအဝင် ၈ ဦးဒဏ်ရာရ

သေဆုံးသူမှာ ဒေါ် ခိုင်အေးနု (၃၂) နှစ်ဖြစ်သည်။

ဒဏ်ရာရရှိသူများမှာ မခိုင်အေးဆန်း(၂၁) နှစ်၊ မသိန်းဦးနွေ (၁၈)နှစ်၊ ဒေါ် စောနွေ (၃၁) နှစ် ၊ ဒေါ် ခိုင်ခိုင်ညွန့် (၃၂) နှစ် ၊ မခိုင်နုဝါ (၇) နှစ် ၊မောင်အဘုချေ (၃)လ ၊ မောင်မျိုးချစ်အောင် (၂) နှစ် ဒေါ် ဦးမေဆန်း (၃၀) နှစ်တို့ဖြစ်ကြသည်။

ယနေ့ ညနေ ၂နာရီ ၄၉ မိနစ်က တိုက်ပွဲတစ်စုံတစ်ရာဖြစ်ပွားခြင်း မရှိဘဲ ဂျက်ဖိုက်တာ တစ်စီးဖြင့် လာရောက်ဗုံးကြဲခဲ့သဖြင့် ထိုသို့ သေဆုံး ဒဏ်ရာရရှိသွားခဲ့ခြင်း ဖြစ်ကြောင်း ကျောက်တော်ဒေသခံ တစ်ဦးက နိရဥ္စရာသတင်းဌာနကိုပြောသည်။

“ နို့တိုက်ကလေးအမေတစ်ယောက် သေသွားတယ်။ လသားအရွယ် ကလေးက ဒဏ်ရာရပြီး ကျန်ခဲ့တယ်။ လက်နက်ကခါးကိုထိပြီး ခါးပြတ်ပြီးအူထွက်ပြီးသေသွားတယ်။ အဲ့ဒီစစ်ကောင်စီရဲ့ လူမဆန်တဲ့လုပ်ရပ်က တရားလွန်လာပြီ။ ဗုံးလာကြဲတာ အိမ်တချို့ပျက်စီးသွားတယ်” ဟုပြောသည်။

လက်ရှိတွင်ဒဏ်ရာရှိသူများကို နီးစပ်ရာ ရွာများတွင် ဆေးကုပေးလျက်ရှိပြီး မျောက်တောင်၊ ခေါင်တုတ်၊ အလယ်ကျွန်းနှင့်အနီးအနားရှိရွာများမှ ဒေသခံများဘေးလွတ်ရာကို ထွက်ပြေး တိမ်းရှောင်နေရကြောင်း ကျောက်တော်ဒေသခံတစ်ဦးက နိရဉ္စရာသတင်းဌာနကို ပြောသည်။

“ ဒဏ်ရာရတဲ့သူတွေကို တော့နီးစပ်ရာရွာတွေမှာ ဆေးကုသမှုခံနေကြတယ်။ ရွာသားတွေလည်း ခုမနေရဲကြတော့ဘူး”ဟုပြောသည်။

ကျောက်တော်မြို့နယ်၊ တင်းမကျေးရွာအနီးရှိ စစ်ကောင်စီ၏ “တောင်ရှည်တောင်ဗျူဟာကုန်း” အား ရက္ခိုင့်တပ်တော် (AA) မှ တိုက်ခိုက်နေရာ ၎င်းနေရာအား ဗုံးကြဲပြီးအပြန်တွင်  အရပ်သားရွာကို ထပ်မံ ဗုံးကြဲတိုက်ခိုက်ခြင်း ဖြစ်ကြောင်း ဒေသခံများက ပြောသည်။

ယမန်နေ့ ဇန်နဝါရီ ၂ ရက်နေ့ကကျောက်တော်မြို့နယ် မျောင်တောင်ကျေးရွာတွင်လည်း  စစ်ကောင်စီတပ်များမှ ပစ်ခတ်လိုက်သည့် လက်နက်ကြီးကျည် နှစ်လုံးမှာ လူနေကျေးရွာထဲ ထိမှန်ပေါက်ကွဲ၍ ကလေး၁ဦး အပါအဝင် ၂ဦး သေဆုံးပြီး ၅ဦးဒဏ်ရာရရှိသွားခဲ့သည်။(NN-11)