ပေါက်တောမြို့နယ်မှ စစ်ဘေးရှောင်များ ဆန်ရိက္ခာပြတ်လပ်

ရခိုင်ပြည်နယ်၊ ပေါက်တောမြို့နယ်တွင် စစ်ဘေးရှောင်နေကြသည့် စစ်ဘေးရှောင်အချို့တွင် ဆန်ရိက္ခာပြတ်လပ်နေပြီဟု စစ်ဘေးရှောင်များက ပြောသည်။

ပြီးခဲ့သည့်နှစ် နိုဝင်ဘာလ ၁၆ ရက် ပေါက်တောမြို့ပေါ်တွင် ရက္ခိုင့်တပ်တော်(အေအေ)နှင့် စစ်ကောင်စီတို့၏ တိုက်ပွဲကြောင့် ဒေသခံသောင်းနှင့်ချီပြီး ဘေးလွှတ်ရာ ကျေးရွာများသို့ ထွက်ပြေးတိမ်းရှောင်နေခဲ့ကြသည်။

ထိုသို့တိမ်းရှောင်နေကြရသည့် စစ်ဘေးရှောင်အချို့သည် ဒေသအတွင်းလူမှုကူညီရေး အဖွဲ့များ၏ အကူအညီများဖြင့် ယာယီစစ်ဘေးရှောင်နေရာများတွင် နေထိုင်လျက်ရှိရာ လက်ရှိတွင် ဆန်ရိက္ခာများပြတ်လပ်နေပြီး ထမင်းငတ်လုနီးပါးဖြစ်နေပြီဟု ပေါက်တောမြို့နယ်မှ စစ်ဘေးရှောင်တစ်ဦးကပြောသည်။

"မနက်ဖြန်အတွက် ဆန်မရှိတော့ဘူး။ ကူညီတဲ့အဖွဲ့တွေက ဆန်ထောက်ပံ့ပေးတာပါ။ အခုဆန်ရိက္ခာတွေလည်း ကုန်သွားပါပြီ။ ဆီ၊ ဆား၊ ငရုတ်တွေ ကေတာ့ ကိုယ့်ဘာသာရှာ စားကြတာပါ။ ဆန်တွေက ဈေးတက်နေတော့ ဝယ်စားဖို့ကလည်း အဆင်မပြေဘူး။ နောက်နေ့တွေ ဆန်မလာရင် ထမင်းငတ်ပါတော့မယ်" ဟုပြောသည်။

လက်ရှိတွင် ပေါက်တောမြို့နယ်က စစ်ဘေးရှောင်များသည် ကျေးရွာအသီးသီးရှိ ဘုန်းကြီးကျောင်းများ၊ အသိမိတ်ဆွေ ဆွေမျိုးများအိမ်တွင် ခိုလှုံနေကြရပြီး အဝတ်တစ်ထည်ကိုယ်တစ်ခုဖြင့် စစ်ဘေးရှောင်လာကြသူများဖြစ်သည့်အလျောက် စားနပ်ရိက္ခာများလည်း သယ်ဆောင်လာနိုင်ခြင်း မရှိကြဟုဆိုသည်။

ထို့အပြင် စစ်ဘေးရှောင်ကာလမှာ နှစ်လကျော်ကြာမြင့်လာပြီဖြစ်သဖြင့် ဆက်လက် ရပ်တည်နိုင်ရေးအတွက် စားနပ်ရိက္ခာအကူအညီများ လိုအပ်နေဆဲဖြစ်သည်ဟု စစ်ဘေးရှောင်အမျိုးသမီးတစ်ဦးကပြောသည်။

"အကူအညီတွေက လိုနေပါသေးတယ်။ အရင်လိုအိမ်ပြန်လို့လည်းမရသေးဘူး။ အခြားဟာတွေထက်စာရင် ဆန်တစ်ခုရရင်လည်း ထမင်းနဲ့ဆားလူးပြီး စားနိုင်ပါတယ်။ အသိအိမ်တွေမှာအတူနေရရင်လည်း အခုအချိန် အားလုံးကခက်ခဲနေကြတာဆိုတော့ မစားရက် မသောက်ရက်ကြတော့ပါဘူး" ဟုပြောသည်။

ထို့အပြင် ဆယ်နှစ်အောက်ကလေးသူငယ်အချို့မှာလည်း အာဟာရပြည့်ဝစွာမစားသုံးရသဖြင့် အာဟာရချို့တဲ့မှုများဖြစ်နေကြသည်ဟု စစ်ဘေးရှောင်အရေးကူညီနေသူများကပြောသည်။

ပေါက်တောမြို့နယ်မှ စစ်ဘေးရှောင်များသည် ဘေးလွှတ်ရာသို့ တိမ်းရှောင်နေကြရသည်မှာ နှစ်လကျော်ကြာမြင့်လာပြီဖြစ်ပြီး မြို့ပေါ်တွင် အေအေနှင့်စစ်တပ်တို့ တိုက်ပွဲများ ဆက်လက်ဖြစ်ပွားနေဆဲဖြစ်ကာ စစ်ကောင်စီက လက်နက်ကြီးများဖြင့် ပစ်ခတ်မှုများ ရှိနေသေးသဖြင့် နေရပ်မပြန်နိုင်ကြသေးကြောင်း သိရသည်။

လက်ရှိ ရခိုင်ပြည်တွင် တိုက်ပွဲများကြောင့် ရမ်းဗြဲ၊ ပေါက်တော၊ မြောက်ဦး၊ ကျောက်တော်၊ ပုဏ္ဏားကျွန်း၊  မင်းပြား၊ မောင်တော အစရှိသည့်မြို့နယ်များမှ ဒေသခံ သုံးသိန်းကျော် စစ်ဘေးရှောင်နေကြရကြောင်း စစ်ဘေးရှောင်အရေး ကူညီပေးနေသူများထံမှသိရသည်။
(NN-8)