ရက္ခိုင့်တပ်တော်(AA)ကို စစ်ကောင်စီက တခြားတော်လှန်ရေးအဖွဲ့များထက် ပို၍ဝါဒဖြန့် တိုက်ခိုက်

လက်ရှိ ရခိုင်တကျော့ပြန်တိုက်ပွဲတွင် အရေးနိမ့်နေသည့် စစ်ကောင်စီသည် ရက္ခိုင့်တပ်တော် (AA) ကို တခြားတော်လှန်ရေးအဖွဲ့များထက် ဦးတည်ပြီး ပိုမိုဝါဒဖြန့်တိုက်ခိုက်လာသည်ဟု ဗမာ့ရေးရာနှင့် ပဋိပက္ခလေ့လာရေးအဖွဲ့က Burma Affairs & Conflict Study (BACS) က ထုတ်ပြန်သည်။

စစ်ကောင်စီလော်ဘီ ချန်နယ် ၁၂ ခုကို BACS က အပတ်စဉ် စောင့်ကြည့်လေ့လာခဲ့ခြင်းဖြစ်ပြီး ဝါဒဖြန့် အကြောင်းအရာအများစုတွင် တော်လှန်ရေးနှင့် တော်လှန်ရေးဘက်တော်သားများကို ပုံဖျက်တိုက်ခိုက်ခြင်း၊ တော်လှန်ရေးတပ်ဖွဲ့များက အကြမ်းဖက်လုပ်ငန်းများ လုပ်ကိုင်နေသည်ဟု ပုံဖော်ခြင်း၊ တော်လှန်ရေးတပ်ဖွဲ့များ အဖမ်းဆီးခံရမှုနှင့် အကျအဆုံးများနေသည်ဟု ဝါဒဖြန့်ခြင်း စသည့် အကြောင်းအရာမျာ အများစုပါဝင်နေသည်ကို တွေ့ရသည်ဟု ဆိုသည်။

နိုဝင်ဘာ ၁၃ ရက်နေ့မှစ၍ ရက္ခိုင့်တပ်၏ စစ်ဆင်ရေးများကျယ်ပြန့်လာသည်နှင့်အမျှ စစ်ကောင်စီ လော်ဘီများကမူ ရက္ခိုင့်တပ်တော်ကို ရခိုင်ပြည်နယ်အတွင်း စစ်ဘေးရှောင်များ တိုးပွားလာခြင်း၊ ပြည်သူများ စစ်ဒဏ်သင့်ခြင်း ၊ စားနပ်ရိက္ခာပြတ်လပ်ခြင်း နှင့် စစ်ရာဇဝတ်မှုများစွာတို့ ၏ တရားခံအဖြစ် ဖော်ပြနေကြသည်ဟု ထုတ်ပြန်ချက်ကဆိုသည်။

ပြီးခဲ့သည့် ရက်ပိုင်းများအတွင်းကလည်း စစ်ကောင်စီ၏ နိုင်ငံတဝန်း မူးယစ်ဆေးဝါးဖမ်းဆီးမှုများတွင် ရက္ခိုင့်တပ်တော် AA ၏ အရာရှိများကို ကွင်းဆက်တရားခံအဖြစ်ဖော်ပြခဲ့ပြီး ၊ မူးယစ်ဆေးဝါး တရားခံများ၏ အင်တာဗျူးထွက်ဆိုချက်များတွင် ရခိုင်ပြည်နယ်နှင့် နိုင်ငံတဝန်း မှုးယစ်ဆေးဝါးဖြန့်ဖြူးမှုများကို AA က လုပ်ဆောင်နေကြောင်း ထည့်သွင်း စွပ်စွဲ ပြောဆိုခဲ့သည်ဟုဆိုသည်။

စစ်ကောင်စီ၏ မူးယစ်ဆေးဝါးနှင့်ပတ်သက်၍ စွပ်စွဲမှုအပေါ် AA ဘက်ကမူ စစ်ကောင်စီက မြေပြင်တိုက်ပွဲများတွင် ယှဉ်မတိုက်ခိုက်နိုင်သဖြင့် သတင်းအတု၊ သတင်းအမှားများဖြင့် ပုံဖျက် ဝါဒဖြန့်နေခြင်းဖြစ်ကြောင်း တုံ့ပြန်ခဲ့သည်ကိုတွေ့ရသည်ဟုဆိုသည်။

ဒီဇင်ဘာ (၂၄) ရက်က စစ်ကောင်စီ၏ စကခ (၉) လက်အောက်ခံ၊ မြောက်ဦး အခြေစိုက် ခမရ (၅၄၀) ၊ ခမရ (၃၇၈) နှင့် ရဲတပ်ရင်း (၃၁) တို့၏ ပစ်ခတ်မှုကြောင့် မြောက်ဦး ရှေးဟောင်းသုသနပြတိုက် ထိခိုက်ပျက်ဆီးခဲ့ရပြီး ရခိုင့်သမိုင်းအမွေအနှစ်များ ထိခိုက်ပျက်ဆီးခဲ့ရသည်ဟု AA ဘက်က ပြောဆိုခဲ့ပြီး၊ စစ်ကောင်စီ ဝါဒဖြန့်ချန်နယ်များကမူ မြောက်ဦး ရှေးသုပြတိုက်ကို AA က ပစ်ခတ်ခြင်းဟု ဖော်ပြခဲ့သည်ဟု ဆိုသည်။

ထို့အပြင် ရမ်းဗြဲပြည်သူ့ဆေးရုံ၊ မြောက်ဦးပြည်သူ့ဆေးရုံတို့ကိုလည်း ရခိုင့်တပ်တော် AA က တိုက်ခိုက်၊ လုယက်မှုများ လုပ်ခဲ့သည်ဟု ဝါဒဖြန့်ခဲ့သည်ဟုလည်းပြောဆိုထားသည်။

မိုခါမုန်တိုင်းကာလအတွင်းလည်း စစ်ကောင်စီ၏ အကူညီပေးမှုများနှင့်နှိုင်းယှဉ်ကာ ရက္ခိုင့်တပ်တော် တပ်တော်၏ ခေါင်းဆောင်များကို စစ်လိုလားသူများ၊ ဒေသတွင်း ငြိမ်းချမ်းရေးကို ဖျက်ဆီးသူများ၊ ရခိုင်ပြည်သူများ၏ မျက်နှာကို မထောက်ထားသူများအဖြစ် ဝါဒဖြန့်ခဲ့သည့်အပြင် ပလက်ဝဒေသတွင် တိုက်ပွဲများ ဖော်ဆောင်မှုကြောင့် ချင်းလူမျိုးများနှင့် ချင်းပြည်နယ်ကို ဖျက်ဆီးနေသူများအဖြစ်ပါ သွေးထိုးပုံဖော်ခဲ့သည်ကို တွေ့ရသည်ဟု BACS ၏ထုတ်ပြန်ချက်တွင်ရေးသားထားသည်။

၂၀၂၂ ခုနှစ် ယာယီအပစ်ရပ်ကာလများတွင် ရက္ခိုင့်တပ်တော် နှင့် ပတ်သက်သည့် ဝါဒဖြန့်မှုများ သိသာစွာ လျော့ကျသွားပြီး ၂၀၂၃ ခုနှစ်  (၁၀၂၇) စစ်ဆင်ရေးနှင့် ရခိုင်ပြည်နယ်အတွင်း တကျော့ပြန် တိုက်ပွဲကာလများတွင်ကို အခြားတော်လှန်ရေးတပ်ဖွဲ့များထက် AAကို  ဦးတည်တိုက်ခိုက်မှုများ ပိုပြုလုပ်လာခဲ့သည်ကို တွေ့ရသည်ဟု ဆိုသည်။(NN-23) (Photo by Frontier Myanmar)