တောင်ကုတ်တွင် တရားမဝင်စက်သုံးဆီသိုလှောင်ထားသည်ဟုဆိုကာ အငြိမ်းစားလဝကဦးစီးမှူး ၁ဦး ဖမ်းဆီခံရ

တောင်ကုတ်မြို့တွင် တရားမဝင်စက်သုံးဆီတင်သွင်း သိုလှောင်ထားသည်ဟုဆိုကာ အငြိမ်းစား လဝကဦးစီးမှူး ၁ဦးဖမ်းဆီးခံလိုက်ရကြောင်း စုံစမ်းသိရသည်။

ဖမ်းဆီးခံရသူမှာ တောင်ကုတ်မြို့၊ ဂူတာရပ်ကွက်မှ အငြိမ်းစား လဝကဦးစီးမှူး ဦးအောင်တိုး(၅၄)နှစ် ဖြစ်သည်ဟု သိရသည်။

ပြီးခဲ့သည့် ဇန်နဝါရီလ ၄ရက်၊ ည ၁၀နာရီကျော်အချိန်က ဦးအောင်တိုးကို တရားဝင်လိုင်စင်မရှိဘဲ စက်သုံးဆီ လက်ဝယ် ပိုင်ဆိုင်ထားသည်ဟုဆိုကာ ရဲနှင့် စစ်သားအင်အား ၁၀ ကျော်ခန့် ပူးပေါင်းတပ်ဖွဲ့က သူနေထိုင်ရာ နေအိမ်သို့ လာရောက်ဖမ်းဆီးသွားကြောင်း သိရသည်။

"သူ့ကို လာဖမ်းတဲ့အခါ ဂူတာရပ်ကွက်အုပ်ချုပ်ရေးမှူးလည်းပါတယ်။ စက်သုံးဆီကို တရားဝင်လိုင်စင် မရှိ၊  ခွင့်ပြုချက်မရှိဘဲနဲ့ စက်သုံးဆီတွေကို လက်ဝယ်ပိုင်ဆိုင်ထားမှု ဥပဒေပုဒ်မနဲ့ ဖမ်းတာလို့တော့ သိရတယ်" ဟု တောင်ကုတ်မြို့ခံတစ်ဦးက ပြောသည်။

ဦးအောင်တိုးကို ဖမ်းဆီးပြီးနောက် နေအိမ်ကိုဝင်မွှေလျှက် စက်သုံးဆီများကိုလည်း ရဲနှင့်စစ်သားများက သိမ်းယူသွားကြောင်း သိရသည်။

လက်ရှိတွင် ဦးအောင်တိုးကို တောင်ကုတ်မြို့၊ ခမရ ၅၄၄ တပ်ရင်းအတွင်း၌ ထိန်းသိမ်းထားသည်ဟု စုံစမ်းသိရသည်။

ဦးအောင်တိုးမှာ လဝကဦးစီးမှူးရာထူးမှ  အငြိမ်းစားယူထားသည်မှာ ၁နှစ်ရှိပြီဖြစ်ကြောင်းသိရသည်။ ( NN-12)ဓာတ်ပုံ - ပေးပို့