ကြာသပတေး၊ ဇူလိုင်လ ၁၈ရက်၊ ၂၀၂၄

မြောက်ဦးတွင် အရပ်သား ၃ဦးကို စစ်ကောင်စီတပ်မှပစ်သတ်


  • ရေးသူ: Web Master (NN 11)
  • | ရက်စွဲ: ၀၉ ဇန်နဝါရီ ၂၀၂၄
  • | ကြည့်ရှုသူ: 1.2k

(လက်နက်ကြီးကျည်ကျ၍ နောက်ထပ် အရပ်သား ၁ ဦးသေဆုံးပြီး ကလေး၁ ဦးအပါအဝင် ၂ ဦးဒဏ်ရာရ)

ရခိုင်ပြည်၊မြောက်ဦးတွင် အကြမ်းဖက် စစ်ကောင်စီတပ်က  လူသားဒိုင်းကာအဖြစ် ခေါ်ဆောင်သွားသည့် အမျိုးသား ၃ဦးကို သေနတ်ဖြင့်ပစ်သတ်ပြီး ရပ်ကွက်တစ်ခုကိုလည်း လက်နက်ကြီးဖြင့်ပစ်ခတ်၍ ၁ ဦး သေဆုံးခဲ့သည်ဟုသတင်းရရှိသည်။

သေနတ်ဖြင့် ပစ်သတ်ခံရသူများမှာ ရှောက်တောစုရပ်ကွက်မှ ဦးထွန်းထွန်းဦးအသက် (၃၅ နှစ်)၊ ကိုစောနိုင်ထွန်းအသက် (၂၈ နှစ်)နှင့် အလယ်ဈေး ရပ်ကွက်မှ ဦးစံရွှေကျော်အသ က်(၅၂ နှစ်) တို့ ဖြစ်သည်။

ယနေ့ဇန်နဝါရီ ၉ရက် နေ့လယ် ၁နာရီခန့်က စစ်ကောင်စီ ၅၄၀တပ်ရင်းမှ လူသားဒိုင်းကာအဖြစ် ခေါ်ဆောင်သွားသည့် အမျိုးသား ၃ဦးကို  သေနတ်ဖြင့်ပစ်သတ်သွားခဲ့သည်ဟု မြောက်ဦးမြို့ခံ တစ်ဦးက နိရဉ္စရာကိုပြောသည်။


အဆိုပါ အရပ်သား ၃ ဦး အသတ်ခံရမှုကို ရက္ခိုင့်တပ်တော်ကလည်း အတည်ပြုပြီး ယခုလို သတင်းထုတ်ပြန်ထားသည်။

“ ၂၀၂၄ ခုနှစ်၊ ဇန်နဝါရီလ (၉) ရက်နေ့တွင် မြောက်ဦးအခြေစိုက် အကြမ်းဖက် ဖက်ဆစ် စစ်ကောင်စီတပ်၏ ခမရ (၅၄၀) မှ အင်အား (၅၀) ကျော်ခန့်ရှိ စစ်ကြောင်းနှင့် ရက္ခိုင့်တပ်တော်တို့ သကျမာရ်အောင် ဘုရားအနီးတွင် မိနစ်အနည်းငယ်ကြာ ထိတွေ့တိုက်ပွဲ ဖြစ်ပွားခဲ့ကြောင်း၊ အဆိုပါ တိုက်ပွဲအတွင်း အကြမ်းဖက်စစ်ကောင်စီတပ်ဘက်မှ အထိနာခဲ့ပြီး (၁၅) ဦးထက်မနည်းကျဆုံးခဲ့ကာ ဒဏ်ရာရရှိသူများထပ်မံရှိနိုင်ကြောင်း သတင်းထုတ်ပြန်ချက်တွင် ဖော်ပြသည်။

အကျအဆုံးများပြီး အထိနာနေသော အဆိုပါစစ်ကြောင်းသည် မြောက်ဦးမြို့အတွင်းသို့ဆုတ်ပြေးစဉ် လမ်း၌တွေ့ရှိသော မြောက်ဦးမြို့ခံ (၃) ဦးအား လူသားဒိုင်းကာလုပ်၍ ခမရ (၅၄၀) တပ်ရင်းသို့ ခေါ်ဆောင်သွားပြီး အဆိုပါအပြစ်မဲ့ အရပ်သား (၃) ဦးစလုံးအား သေနတ်ဖြင့် ပစ်ခတ် သတ်ဖြတ်သွားခဲ့သည်ဟု ဖော်ပြထားသည်။

မြောက်ဦး ဒေသခံတစ်ဦးက " သတ်တာက ၅၄၀ ပ်ရင်းက စစ်သားတွေက လူသားဒိုင်းကာ အဖြစ်ခေါ်သွားတဲ့ အရပ်သား သုံးယောက်ကို ကြိုးတုပ်ရိုက်နှက်ပြီး သေနတ်နဲ့ပစ်သတ်ခဲ့တယ်။ သုံးယောက်လုံး သေသွားခဲ့တယ်။ ၃ယောက်လုံးကို တစ်ချိန်တည်းမှာပစ်သတ်ခဲ့တာတော့မဟုတ်ဘူး။ သက်ကြီးပိုင်း တစ်ယောက်ကို နေ့လယ်က သတ်တာ။ နောက်ထပ်နှစ်ယောက်ကို ညနေ လောက်ကလမ်းမှာ ပစ်သတ်သွားတာပါ" ဟုပြောသည်။



ထို့အပြင် ယနေ့ ညနေပိုင်းတွင်လည်း ခမရ (၅၄၀) တပ်ရင်းမှ မြောက်ဦးမြို့အတွင်းသို့ လက်နက်ကြီးများဖြင့် ရမ်းကားပစ်ခတ်ခဲ့မှုကြောင့် အပြစ်မဲ့အရပ်သားပြည်သူ ၁ ဦး နေရာမှာပင် ပွဲချင်းပြီးသေဆုံးသွားခဲ့ပြီး ကလေးငယ် ၁ ဦးအပါအဝင်  ၂  ဦးဒဏ်ရာရရှိခဲ့သည်။

လက်နက်ကြီးကျည်ကျ၍ သေဆုံးသွားသူမှာ မြောက်ဦးမြို့၊ ဆင်ချဆိပ်ရပ်ကွက်မှ ဦးမဲနောင်ချေ (၅၁) နှစ်ဖြစ်ပြီး ဒဏ်ရာရရှိသူများမှာ မဘူမေချေ အသက်(၇)နှစ်နှင့် နောက်တစ်ဦးတို့ဖြစ်ကြသည်။

မြောက်ဦးမြို့ခံတစ်ဦးက " စစ်ကောင်စီ ၅၄၀ တပ်က လက်နက်ကြီးတွေနဲ့  အဆက်မပြတ်ပစ်ခတ်ခဲ့တဲ့ အတွက် ဆင်ချဆိပ် ရပ်ကွင်းအတွင်းမှာ လူကြီးတစ်ယောက်သေသွားတယ်။ ကလေး တစ်ဦးအပါအဝင် ဒဏ်ရာက နှစ်ယောက်ရတယ်" ဟု နိရဉ္စရာသတင်းဌာနကိုပြောသည်။

အပြစ်မဲ့ပြည်သူလူထုတို့အား သတ်ဖြတ်သွားပြီး စစ်ရာဇဝတ်မှု ကျူးလွန်နေသော ခမရ (၅၄၀) တပ်ရင်းအား ပြတ်ပြတ်သားသား လက်စားချေ တုံ့ပြန်သွားမည်ဖြစ်ကြောင်း ရက္ခိုင့်တပ်တော်က ပြောဆိုလိုက်သည်။

မြောက်ဦးသျှစ်သောင်းဘုရားအနီးတွင် စစ်ကောင်စီနှင့် ရက္ခိုင့်တပ်တော်ကို ထိတွေ့ဖြစ်ပွားမှုရှိခဲ့ပြီး စစ်ကောင်စီ စစ်ကြောင်းတစ်ခုလည်း မိုင်းဆွဲတိုက်ခိုက်ခံရ၍ သေဆုံးမှုများပြားသည်ဟု  မြို့ခံများကပြောသည်။(NN-11)

ဆက်စပ် သတင်းများ