ရခိုင်လူမျိုးတို့ အမြတ်တနိုးတန်ဖိုးထားရာ မြောက်ဦးနန်းတော်ရာကုန်းကို စစ်ကောင်စီက လက်နက်ကြီးများဖြင့်ပစ်ခတ်

မြောက်ဦးအခြေစိုက် စစ်ကောင်စီ၏ ခမရ (၅၄၀) တပ်ရင်းမှ ဇန်နဝါရီ ၁၀ ရက် နံနက် (၁၁) နာရီခွဲအချိန်၌ ရက္ခိုင်ရှေးဟောင်း မြောက်ဦးမြို့နန်းတော်ရာကုန်းအား လက်နက်ကြီးဖြင့် ရည်ရွယ်ချက်ရှိရှိ ပစ်ခတ်တိုက်ခိုက်ခဲ့ကြောင်း ညီနောင်သုံးဖွဲ့ ၏ ဇန်နဝါရီ ၁၀ ရက် ထုတ်ပြန်ချက်တွင်ဖော်ပြသည်။

စစ်ကောင်စီသည် မြောက်ဦးယဉ်ကျေးမှုဒေသအား ကမ္ဘာ့အမွေအနှစ် (World Heritage) စာရင်းဝင်ရန် အဆိုပြုထားသည်ကို သိပါလျက် ရက္ခိုင်လူမျိုးတို့၏ အသည်းနှလုံးဟုတင်စားကြသည့် မြောက်ဦးနန်းတော်ရာကုန်းကို လက်နက်ကြီးဖြင့် (၆) ကြိမ်တိုင်တိုင် တမင်တကာ ပစ်ခတ် တိုက်ခိုက်ခဲ့သည်ဟု ဖော်ပြသည်။

ဤသည်မှာ ရှေးဟောင်းယဉ်ကျေးမှု အမွေအနှစ်များအား ရည်ရွယ်ချက်ရှိရှိ ဖျက်ဆီးနေခြင်းဖြစ်ပြီး စစ်ရာဇဝတ်မှုကို ကျူးလွန်ခြင်းပင် ဖြစ်ကြောင်း ဆက်လက် ဖော်ပြသည်ထားသည်။ 

ရခိုင်ရှေးဟောင်းမင်းနေပြည်တော် မြောက်ဦးသည် အေဒီ ၁၄၃၀ မှ အေဒီ ၁၇၈၄ ခုနှစ်ထိ နှစ်ပေါင်း (၃၅၄) နှစ်ထိ သက်တမ်းရှည်လျားခဲ့သည့် မြို့တော်တစ်ခုဖြစ်ပြီး ဗမာဘုရင် ဘိုးတော်ဘုရားတပ်များက မြောက်ဦးမြို့တော်ကို ဝင်ရောက်သိမ်းပိုက်စဉ် နန်းတော်ကို မီးရှို့ဖျက်ဆီးပစ်ခဲ့သည်။ ၎င်းပြင်အနီးအနားရှိ တောင်များကို ပိုင်းဖြတ်ကာ နန်းတော်ရာအား မြေဖို့ပစ်ခဲ့သည်ဟုလည်း သမိုင်းမှတ်တမ်းများအရသိရသည်။

လက်ရှိစစ်ကောင်စီသည် ရခိုင်လူမျိုးတို့၏ တန်ဖိုးထားရာရှေးဟောင်းအမွေအနှစ်များကို ဖျက်ဆီးလိုသည့် ရည်ရွယ်ချက်ဖြင့် များကြာမီကလည်း နန်းတော်ရာကုန်းပေါ်ရှိ ရှေးဟောင်း ယဉ်ကျေးမှုပြတိုက်ကိုလည်း လက်နက်ကြီးများဖြင့် ပစ်ခတ်သဖြင့် တန်ဖိုးမဖြတ်နိုင်သော ကျောက်စာများအပါအဝင် ရုပ်တုများ ပျက်စီးသွားခဲ့သည်ဟု သိရှိရသည်။

၎င်းအပြင် ခမရ (၅၄၀) တပ်ရင်းမှ ဇန်နဝါရီ ၁၀ ရက်နေ့က ပစ်ခတ်လိုက်သည့် လက်နက်ကြီးကျည် တချို့သည် မြောက်ဦးမြို့၊ အောင်တပ်ရပ်ကွက်သို့ လည်း ကျရောက်ပေါက်ကွဲခဲ့ရာ ရပ်ကွက်အတွင်းရှိ လူနေအိမ်အချို့ ထိခိုက်ပျက်စီးခဲ့ရပြီး ဒေသခံအမျိုးသား (၁) ဦးမှာလည်း ကျည်စထိမှန် ဒဏ်ရာရရှိခဲ့ပြန်သည်။

အဆိုပါနေ့  ညနေ (၄) နာရီအချိန်တွင်လည်း စစ်ကောင်စီ၏ မြောက်ဦးအခြေစိုက် “ခမရ (၃၇၇) တပ်ရင်း” မှ မြို့ပေါ်ရပ်ကွက်များသို့ လက်နက်ကြီးဖြင့် တမင်တကာ ပစ်ခတ်တိုက်ခိုက်ခဲ့သောကြောင့် မြောက်ဦးမြို့၊ ဝါဈီးရပ်ကွက်၊ ဝါဈီးတံတားအနားရှိ လူနေအိမ် (၂) ဆောင်မှာ မီးဟုန်းဟုန်း တောက်လောင်ကာ ပြာကျခဲ့ရသည်ဟု ထုတ်ပြန်ချက်တွင် ဖော်ပြသည်။