ရခိုင်ပြည်၊ကျောက်တော်မြို့နယ်ကန်စောက်အခြေစိုက် ခမ၇  (၅၃၉) တပ်ရင်းကို ရက္ခိုင့်တပ်တော်(AA) မှ ဝင်တိုက်နေပြီး တိုက်ပွဲ ပြင်းထန်နေကာ အနီးအနားရှိ တပ်ရင်းတစ်ခု၏ လက်နက်တိုက်လည်း မီးလောင်နေကြောင်း သတင်းရရှိသည်။

ကျောက်တော်ဒေသခံတစ်ဦးက " ပစ်ချက်ကတော့ပြောမနေနဲ့ အတွဲလိုက်တွေပစ်နေတာ ။ မီးလုံးတွေသွားနေတာတွေ့၇တယ်။ အတွဲလိုက်တွေ။ ကန်စောက် ၅၃၉ကို ရက္ခိုင့်တပ်တော်က တိုက်နေတာ။ ကျောက်တော် စကခ၉ကလည်း စက်သေနတ်နဲ့ပစ်ကူပေးနေတယ်။လက်ရှိ ည ၉ နာရီထိ ပစ်တုန်း” ဟု နိရဉ္စရာသတင်းဌာနကိုပြောသည်။

ကန်စောက် တပ်ရင်း  ၅၃၉ အနီးရှိ အမြောက်တပ် ၃ရရက လက်နက်တိုက်ကိုလည်းတပ်တော်ဖက်က မီးရှို့ထားပြီး မီးလောင်နေသည်ဟု၎င်းက ပြောဆိုသည်။

ယင်းအပြင် စစ်ကောင်စီ၅၃၉ဖက်မှလှမ်းပစ်သည့်လက်နက်ကြီးကျည်များသည် လူနေကျေးရွာများ အနီးဝန်းကျင်တွင် ကျရောက် ပေါက်ကွဲနေပြီး သရက်တပင်ကျေးရွာ ပြင်ဘက်ပိုင်းတွင်တစ်လုံး၊ တောင်ပုတ်ရွာစာသင်ကျောင်းတွင်တစ်လုံး ကျရောက်ပေါက်ကွဲခဲ့သည်ဟု ၎င်းမှပြောသည်။

" လက်နက်တွေတော့တစ်ချို့ရွာတွေမှာကျရောက်တာတွေရှိတယ်။ခုက အပြန်အလှန်ပစ်တုန်းမို့ လက်နက်ကြီးပစ်သံတွေကညံနေတယ် "ဟုပြောသည်။

ယင်းအပြင်ယနေ့ နေ့လယ်၂နာရီ ခွဲခန့်က ခမ၇ (၅၃၉) တပ်ရင်းမှ လက်နက်ကြီးများအဆက်မပြတ် ပစ်ခတ်ခဲ့၍ လက်နက်ကြီးကျည်သည် ကန် စောက် ကျေးရွာသို့ကျရောက်ခဲ့၍ကျေးရွာနှင့် စစ်ဘေးရှောင်နေအိမ်တစ်ချို့ မီးလောင် ပျက်စီးသွားကြောင်း သိ၇သည်။

ဇန်နဝါရီ ၁၂ ရက်နေ့ကလည်း အဆိုပါ တပ်ရင်း ၅၃၉မှ လက်နက်ကြီးဖြင့်ပစ်ခတ်၍ ကျည်စထိမှန်ကာ မြိုတိုင်းရင်းသား အမွှာမောင်နှမ ၂ဦး သေဆုံးပြီးမိခင်ဖြစ်သူမှာ ဒဏ်ရာရရှိသွားသည်ဟု သတင်းရရှိသည်။

ကျောက်တော်မြို့နယ်ရှိစစ်ကောင်စီ၏ (၅၃၉)တပ်ရင်းကိုပြီးခဲ့သည့် ဇန်နဝါရီ ၁၀ ရက်မှစတင်၍  ရက္ခိုင့်တပ်တော်ကထိုးစစ်ဆင် တိုက်ခိုက်နေခြင်းဖြစ်ပြီး  စစ်ကောင်စီ၏အမြောက်တပ် (၃ရရ) တပ်ကိုလည်း သိမ်းပိုက်ရရှိထားပြီဟုသတင်းများထွက်ပေါ်နေသည်။

အမှတ် (၃ရရ) အမြောက်တပ်နှင့်ခမ၇ (၅၃၉) တပ်ရင်းတို့သည်ကျောက်တော်မြို့နယ် ကန်စောက်တောင်၏ အတက်နှင့် အဆင်း တစ်ဘက်တစ်ချက်စီတွင်တည်ရှိသည့် တပ်ရင်း ၂ခု ဖြစ်သည်ဟု သိရှိ၇သည်။(NN-11)