ရက္ခိုင့်တပ်တော် (AA)က ပစ်ခတ်တိုက်ခိုက်ခဲ့သည့် ရှော့တိုက်ဒုံးများအထဲမှ ၄ လုံးသည်  ဓည၀တီ ရေတပ်ဌာနချုပ်မှ အမှတ်(၁၃) လက်နက် ခဲယမ်းတပ်ထဲကို ကျရောက်ပေါက်ကွဲခဲ့၍ ဓည၀တီရေတပ်ဌာနချုပ်မှူး ဗိုလ်မှူးချုပ် သက်လွင်ထွန်း ထွက်ပြေးသွားခဲ့၇ကြောင်း သတင်းများ ထွက်ပေါ်နေသည်။

" ဒီနေ့က မနက်ပိုင်းမှာ အေအေက ရှော့တိုက်ဒုံးနဲ့ ပစ်ခတ်တိုက်ခိုက်တော့ အများအပြား ရေတပ်ထဲ ကျရောက်ပေါက်ကွဲခဲ့တယ်။  ရေတပ်ဌာနချုပ်ရဲ့ ဌာနချုပ်မှူး ဗိုလ်မှူးချုပ်သက်လွင်ထွန်းအုန်းဂျိန်တပ် ဘက်ကို ထွက်ပြေးသွားခဲ့ရတယ်လို့ ကြားထားရတယ်ဗျ " ဟု  ကျောက်ဖြူဒေသခံ စစ်ရေးလေ့လာသူ လူငယ်တစ်ဦးက ပြောသည်။

ယနေ့ဇန်နဝါရီလ ၂၂ ရက်၊ မနက် ရ နာရီလောက်က ကျောက်ဖြူမြို့နှင့် ၅ မိုင်ခန့်အကွာသစ်ပုတ်တောင်ရှိ ဓည၀တီရေတပ်ဌာနချုပ်ကို ရက္ခိုင့်တပ်တော်(AA)က ရှော့တိုက်ဒုံးများဖြင့် ပစ်ခတ်တိုက်ခိုက်ခဲ့သည်။

ထိုအထဲက ရှော့တိုက်ဒုံး ၄ လုံးမှာ အမှတ်(၁၃) လက်နက်ခဲယမ်းတပ်ကို ကျရောက် ပေါက်ကွဲခဲ့ပြီး အပျက်အစီးများရှိခဲ့သည်ဟုသိ၇သည်။

နောက်ထပ် ကျောက်ဖြူဒေသခံတစ်ဦးက "ရှော့တိုက်ဒုံးတွေနဲ့ပစ်တာမှာ လေးလုံးက အမှတ် (၁၃)တပ် ထဲ ကျကွဲတယ်။ အထိအခိုက်အပျက်စီးတွေ ရှိတယ်လို့ သိရတယ်။ သေဆုံးမှုအခြေအနေတော့ သေချာမသိ၇ဘူး။ အမှတ် (၁၃) တပ်က လက်နက်ခဲယမ်းမီးကျောက်တပ်ပါ။ အဲဒီမှာ ကွဲတယ်လို့ ကြား၇တယ် " ဟု ပြောသည်။

ဓည၀တီရေတပ်ဌာနချုပ်တွင် ဌာနချုပ်မှူးမှာဗိုလ်မှူးချုပ်သက်လွင်ထွန်းဖြစ်ပြီး ဒုဌာနချုပ်မှူးမှာ ဗိုလ်မှူးကြီးမြတ်မင်းဦးဖြစ်ကြောင်း နိရဥ္စရာကစုံစမ်းသိရှိ၇သည်။

အဆိုပါဓည၀တီရေတပ်ဌာနချုပ်တွင် အမှတ်(၁၄) အုပ်ချုပ်ရေးတပ်(ဌာနချုပ်)၊အမှတ်(၁ရ)ရေတပ် လေ့ကျင့်ရေးတပ်၊အမှတ်(၁၃) လက်နက်ခဲယမ်းမီး ကျောက်တပ်၊ အမှတ်(၁၂) ဆက်သွယ်ရေးတပ်၊ အမှတ်(၁၁) မော်တော်ယာဥ်တပ်၊အမှတ်(၁၅) ရေတပ်စက်မှုလက်မှု အင်ဂျင်နီယာတပ်၊ အမှတ်(၁၆) စစ်ရေယာဥ်စုတပ်အပါအဝင် တပ်ပေါင်း ၁ရခုရှိပြီး အဆိုပါအထဲမှအမှတ်(၁ရ) ရေတပ်လေ့ကျင့်ရေး တပ်မှာ စစ်သည်အင်အားအများဆုံးဖြစ်ကြောင်း နိရဉ္စရာသတင်းဌာနကစုံစမ်းသိရှိ၇သည်။

ရေတပ်ဌာနချုပ်ထဲမှ တပ်မိသားစုဝင်များကို ရခိုင်တိုက်ပွဲစတင်ကတည်းက ကျောက်ဖြူ၊ ရန်ကုန်၊ နေပြည်တော်မြို့များသို့ ပြောင်းရွှေ့ထားကြောင်း  ဒေသခံများ၏ပြောပြချက်အရသိ၇သည်။

ကျောက်ဖြူမြို့နယ်ရှိ စစ်ကောင်စီ၏ “ဓည၀တီရေတပ်ဌာနချုပ်စခန်း” အား ရက္ခိုင့်တပ်တော်က တိုက်ခိုက်ခြင်းနှင့်ပတ်သက်ပြီး ညီနောင် ၃ ဖွဲ့မှလည်း ယနေ့ညနေပိုင်းက သတင်းထုတ်ပြန်သည်။

သတင်းထုတ်ပြန်ရာတွင်  ရက္ခိုင့်တပ်တော်(AA) မှ “ဓည၀တီရေတပ်ဌာနချုပ်စခန်း”အား ဒုတိယအကြိမ် ထပ်မံတိုက်ခိုက်ခဲ့ကြောင်း၊အထိအခိုက် အကျအဆုံး အရေအတွက်များနှင့် အပျက်အစီးများကို လောလောဆယ် မသိ၇သေးကြောင်း ဖော်ပြထားသည်။

အဆိုပါဓည၀တီရေတပ်ဌာနချုပ်ကို ဇန်နဝါရီလ ၈ ရက် ၊ မနက် ၆ နာရီလောက်ကလည်းရက္ခိုင့်တပ်တော်(AA)က ပထမဆုံးအကြိမ် ရှော့တိုက်ဒုံးနှင့်ပစ်ခတ်တိုက်ခိုက်ခဲ့သေးသည်။

ပထမအကြိမ်ပစ်ခတ်မှုအတွင်း ရေတပ်ဌာနချုပ်အနီးသံဇစ်မြစ်ထဲမှနေဗီစစ်ရေယာဉ်များကပြန်လည်ပစ်ခတ်မှုကြောင့် လက်နက်ကြီးကျည်များ ရေတပ်စခန်းဝန်းကျင်ကျေးရွာများအနီး ကျရောက်ပေါက်ကွဲခဲ့သည်။

ယနေ့မနက်ပိုင်းအေအေက ပစ်ခတ်တိုက်ခိုက်ရာတွင်လည်း သံဇစ်မြစ်အတွင်းမှ နေဗီများမှပြန်လည် ပစ်ခတ်မှုကြောင့်ရေတပ်စခန်းနှင့်သိပ်မဝေးသည့် စည်မော်၊ရှောက်ခြုံ ကျေးရွာများအနီး လက်နက်ကြီး ကျည်များ ကျရောက်ပေါက်ကွဲမှုရှိပြီး ရွာသားများမှာ ဘေးလွတ်ရာသို့ ထွက်ပြေး တိမ်းရှောင် ခဲ့၇ကြောင်း ကျောက်ဖြူဒေသခံလူငယ်တစ်ဦးကပြောသည်။(NN-23)