ရခိုင်ပြည်၊ ကျောက်ဖြူမြို့နယ်မှ စစ်တပ်မိသားစုဝင်များကို ယမန်နေ့က စတင်ကာ ကုန်တင် သင်္ဘောဖြင့်ရွှေ့ပြောင်းနေပြီး  ၄င်းမိသားစုဝင်များမှာ ဓည၀တီရေတပ်ဌာနချုပ်မှ ဖြစ်နိုင်ကြောင်းဒေသခံများကပြောသည်။

ယမန်နေ့ဖေဖော်ဝါရီလ၅ ရက်၊ မနက် ၁၀ နာရီဝန်းကျင်က စစ်တပ်မိသားစုဝင်များအပြည့်တင် ဆောင်ထားသည့်ကုန်တင်သင်္ဘောတစ်စီးမှာ ကျောက်ဖြူမှ သံတွဲဘက်သို့ ပင်လယ်ပြင်လမ်းကြောင်း အတိုင်းထွက်ခွာသွားကြောင်း မျက်မြင်ဒေသခံတစ်ဦးက ပြောသည်။

" မနေ့ကမနက်ဘက် ဆယ်နာရီလောက်မှာ ကုန်တင်ရေယာဥ်ပေါ့။ အဲဒီသင်္ဘော တစ်စီးနဲ့စစ်သားမိသားစုတွေ အပြည့်တင်ယူသွားတယ်။ အဲဒီသင်္ဘောကသံတွဲဘက်ကိုထွက်သွားတယ်"ဟု ပြောသည်။

ကျောက်ဖြူမြို့ပေါ်တပ်ရင်းများဖြစ်သည့် ခမ၇ ၅၄၂၊ ခမ၇ ၅၄၃ နှင့် ခလ၇ ၃၄တပ်ရင်းများက မိသားစုများကိုမူရွှေ့ပြောင်းသည့်သတင်းမကြားရသေးသဖြင့် ယခု ပြောင်းရွှေ့သွားသည့် မိသားစုများမှာ ဓည၀တီရေတပ်စခန်းက ဖြစ်နိုင်ကြောင်း ၎င်းကပြောသည်။

ယမန်နေ့က ကုန်တင်သင်္ဘောဖြင့်တင်ဆောင်သွားသည်မှာ သစ်ပုတ်တောင်၊ ဓည၀တီရေတပ်ဌာနချုပ် စခန်းမှစစ်တပ်မိသားစုဝင်များဖြစ်နိုင်ကြောင်း ကျောက်ဖြူဒေသခံလူငယ်တစ်ဦးက ပြောသည်။

" မြို့ပေါ်တပ်ရင်းတွေကလည်းရွှေ့ပြောင်းတာမရှိဘူးလို့သိရတယ်။ အဲဒီမိသားစုဝင်တွေက ရေတပ်ကမိသားစုဝင်တွေလို့ယူဆ၇ပါတယ်" ဟု ပြောသည်။

ဓည၀တီရေတပ်ဌာနချုပ်စခန်းမှာ ဇန်နဝါရီလ ၈ ရက်ကတကြိမ်၊ ဇန်နဝါရီ ၂၂ ရက်ကတကြိမ်ရက္ခိုင့်တပ်တော်(AA) ၏ အတွဲလိုက်ဒုံးများဖြင့်ပစ်ခတ်တိုက်ခိုက်ခြင်းခံခဲ့၇သည်။

ဇန်နဝါရီ ၂၂ရက်တိုက်ခိုက်မှုအတွင်း AA ပစ်ခတ်သည့် အတွဲလိုက်ဒုံးများထဲမှ၄ လုံးခန့် ရေတပ်ဌာနချုပ်ထဲမှ လက်နက်ခဲယမ်းတပ်ရင်းထဲကျရောက်ပေါက်ကွဲခဲ့ကြောင်းသိ၇သည်။

ကျောက်ဖြူမြို့နယ် မလကျွန်း ၊ပြင်ရှည်ရွာသစ်နှင့်ကျောက်ဖြူတောင်ကြားရှိ ရေမျက်တွင် စစ်ကောင်စီနဲ့ရက္ခိုင့်တပ်တော်တို့ ဖေဖော်ဝါရီလ၁ ရက် မနက်ပိုင်းက တိုက်ပွဲပြင်းထန်ဖြစ်ပွားခဲ့ပြီး တိုက်ပွဲအတွင်း ဓည၀တီရေတပ်ဌာနချုပ်နှင့်အမှတ်(၃၂)ဒိုးတန်းတောင်ရဲတပ်ရင်းတို့က လက်နက် ကြီးရမ်းသန်းပစ်ခတ်ခဲ့ရာ ဒေသခံအနည်းဆုံး(၆)ဦးခန့် ထိခိုက်ဒဏ်ရာရရှိခဲ့သည်။

ကျောက်ဖြူရှိ စစ်ကောင်စီတပ်ရင်းများမှ စစ်သားများမှာ ရှေ့တန်းထွက်ရမည်စိုးရိမ်၍တပ်မှ ထွက်ပြေးမှုများရှိနေရာဖေဖော်ဝါရီလ ၄ ရက်၊ညနေပိုင်းက ခလ၇(၃၄)တပ်ရင်းမှ စစ်သားနှစ်ဦး လက်နက်အပြည့်အစုံဖြင့်ထွက်ပြေးသွားခဲ့ပြီးဇန်နဝါရီလကုန်ပိုင်းကလည်း ဓည၀တီရေတပ်ဌာနချုပ်မှ စစ်သားနှစ်ဦး လက်နက်အပြည့်အစုံဖြင့်ထွက်ပြေးပြီးAA ထံအလင်းဝင်သွားခဲ့ကြောင်း သိရှိ၇သည်။ (NN-23)