ရက္ခိုင့်တပ်တော် (AA) သည် ၇သေ့တောင်မြို့နယ် ကိုးတန်ကောက်နယ်ခြားစောင့်စခန်းမှစစ်ကောင်စီ တပ်ဖွဲ့ဝင် ၅၀ ကျော်ကို အရှင်ဖမ်းမိပြီး လက်နက် ၁၀၀ ကျော်သိမ်းဆည်းရမိသည်ဟုသတင်းရင်းမြစ်တစ်ခု အရ သိ၇သည်။

“ စုစုပေါင်း ၅၃ ယောက်အရှင်ဖမ်းမိပါတယ်။ က လက်နက်ကတော့ ၁၀၀ ကျော် သိမ်းဆည်းရမိတယ်လို့ သိရပါတယ်” ဟု ၎င်းသတင်းရင်းမြစ်ကပြောသည်။

မျက်မြင်ဒေသခံတစ်ဦးကလည်း ဖမ်းဆီးမိသည့် နယ်ခြားစောင့်တပ်သားများကို၎င်းတို့ရွာက ဖြတ်ပြီး ဖမ်းဆီးခေါ်ဆောင်သွားသည်ကို ကိုယ်တိုင်မြင်တွေ့လိုက်၇သည်ဟု ပြောဆိုသည်။

၇သေ့တောင်မြို့နယ်၊ အနောက်တောင်ပိုင်း၊အငူမော်-မောင်တောကားလမ်းမဘေးရှိ စစ်ကောင်စီ၏ “ကိုးတန်ကောက် နယ်ခြားစောင့် စခန်း” အား ရက္ခိုင့်တပ်တော်က ဖေဖော်ဝါရီ ၈ ရက်နေ့ နံနက်က ထိုးစစ်ဆင်တိုက်ခိုက်ခဲ့သည်။

ဒုတိယနေ့ဖြစ်သော ဖေဖော်ဝါရီ ၉ ရက်)  နံနက် (၁၁) နာရီ (၄၅) မိနစ်အချိန်တွင်ရက္ခိုင့်တပ်တော်မှ စခန်းတစ်ခုလုံးအား အပြီးသတ် ချေမှုန်းသိမ်းပိုက်နိုင်ခဲ့ကြောင်း ညီနောင်မဟာမိတ်၃ ဖွဲ့၏  ထုတ်ပြန်ချက်တွင် ဖော်ပြသည်။

လက်ရှိတွင် ကိုးတန်ကောက်ကျေးရွာမြောက်ဘက်မိုင်အနည်းငယ် အကွာတွင် တည်ရှိသည့်  အငူမော်-မောင်တောကားလမ်းပေါ်ရှိ မောင်တောမြို့နယ် အင်းဒင်နယ်ခြားစောင့်စခန်းအား ရက္ခိုင့်တပ်တော်မှလက်နက်ကြီးဖြင့် လှမ်းပစ်၍ အပြန်အလှန်ပစ်ခတ်မှုများရှိခဲ့သည်ဟု ဒေသအတွင်းက သတင်းရင်းမြစ်တစ်ခုကပြောဆိုသည်။

လက်ရှိတွင် အင်းဒင်နယ်ခြားစောင့်စခန်းအနီး စစ်ကောင်စီလေယာဉ်ဝဲပျံနေသည်ကို မြင်တွေ့ရကြောင်း ပြောဆိုပြီး ၎င်းသတင်းရင်းမြစ်နှင့်နောက်ထပ် အဆက်အသွယ် မရရှိတော့ပါ။   အင်းဒင်နယ်ခြားစောင့်စခန်းအခြေအနေနှင့် ပတ်သက်ပြီးသတင်းများ ရရှိပါက ဆက်လက်တင်ပြပေးပါမည်။