စစ်ကောင်စီကယမန်နေ့ဖေဖော်ဝါရီ ၁၀ ရက်တွင် ပြည်သူ့စစ်မှုထမ်းဥပဒေကို အသက်သွင်းကြေညာခဲ့ပြီးယနေ့ ဖေဖော်ဝါရီ ၁၁ ရက်နေ့၌  တောင်ကုတ်တွင် အိမ်ထောင်စုစာရင်းလိုက်ကောက်နေရာအသက် ၁၈ နှစ်ပြည့်ပြီးသူဦးရေကို အဓိကစာရင်းကောက်ယူနေကြောင်းသတင်းရရှိသည်။

ယနေ့ဖေဖော်ဝါရီလ၁၁ ရက်၊ မနက် ၁၀ နာရီလောက်က တောင်ကုတ်မြို့ပေါ်ရပ်ကွက်တစ်ခုဖြစ်သည့်သိမ်တောင်ရပ်ကွက်ကို အိမ်ထောင်စုစာရင်းလာကောက်နေပြီးအိမ်ထောင်စုစာရင်းထဲမှ အသက်(၁၈)နှစ် ပြည့်ပြီးသူဦးရေကိုအဓိကစာရင်းကောက်ယူနေကြောင်း မြို့ခံများကပြောသည်။

တောင်ကုတ်မြို့သိမ်တောင်ရပ်ကွက်မှအမျိုးသမီးငယ်တစ်ဦးက" အခုလေးတင် အိမ်ထောင်စု စာရင်း လာကောက်ကြတယ်။ အရပ်ဝတ်တွေနဲ့ဆိုတော့ ဘယ်သူတွေလဲတော့ မသိဘူး။ ထွေအုပ်က ဖြစ်မယ်ထင်တယ်။အိမ်ထောင်စုစာရင်းထဲက အသက်(၁၈)နှစ်ပြည့်ပြီးသူတွေကိုအဓိက စာရင်းယူသွားတယ်" ဟု နိရဥ္စရာသတင်းဌာနသို့ပြောသည်။

ယနေ့အိမ်ထောင်စုစာရင်းလာကောက်သူများတွင်အရပ်ဝတ်များဖြင့်အမျိုးသားများ ၅ ဦးပါရှိကြောင်းသိ၇သည်။

" အရပ်ဝတ်တွေနဲ့ဆိုတော့ဘယ်ဌာနတွေကဆိုတာမသိနိုင်ဘူး။ လူလေးငါးယောက်ပါတယ်" ဟုပြောသည်။

ယမန်နေ့ဖေဖော်ဝါရီလ၁၀ ရက်တွင် အကြမ်းဖက်စစ်ကောင်စီက စစ်မှုမထမ်းမနေရ ဥပဒေကိုအသက်သွင်းလိုက်ပြီး ပြည်သူတိုင်းကိုစစ်မှုထမ်းရန် ဆင့် ခေါ်ခွင့်ရှိသည်ဟုဆိုကာအာဏာကို စတင်ကျင့်သုံးကြောင်းကြေညာခဲ့ခြင်းဖြစ်သည်။

အဆိုပါဥပဒေအရ နိုင်ငံသားတိုင်း စစ်မှုထမ်း၇မည်ဖြစ်ပြီး အမျိုးသားဖြစ်လျှင်အသက် ၁၈ နှစ် ပြည့်ပြီး၍ အသက် ၃၅ နှစ် မပြည့်သေးသော နိုင်ငံသားတိုင်းကိုလည်းကောင်း၊ အမျိုးသမီးဖြစ်လျှင် အသက် ၁၈ နှစ် ပြည့်ပြီး၍အသက် ၂၇ နှစ် မပြည့်သေးသော နိုင်ငံသားတိုင်းကို လည်းကောင်း စစ်မှုထမ်းရန်ဆင့်ခေါ်နိုင်သည် စသဖြင့် အချက်အလက်အများအပြားကို၎င်း ဥပဒေတွင် ပြဌာန်ထားသည်။

ထို့ပြင် နိုင်ငံတော်တွင် အရေးပေါ် အခြေအနေဖြစ်ပေါ်လျှင် အစိုးရအဖွဲ့သည် ပြည်သူ့စစ်မှုထမ်းရန် ကာလကို ၂ နှစ်မှ  ၅ နှစ်အထိတိုးမြှင့် သတ်မှတ်နိုင်သည်ဟု ၎င်းစစ်ကောင်စီ ဥပဒေက ဆိုသည်။

ပြည်သူလူထုနှင့်လူသားမျိုးနွယ်အပေါ် အစဥ်အဆက်ဆက်က ယုတ်မာကောက်ကျစ်ရက်စက်ပြီး စစ်ရာဇဝတ်မှု၊လူ့အခွင့်အရေးချိုးဖောက်မှုများကို ပြောင်ပြောင်တင်းတင်းကျူးလွန်လာခဲ့သည့် စစ်အာဏာရှင်၏အလိုကျ စစ်မှုမထမ်းလိုကြောင်း ၇ခိုင်လူငယ်များကပြောဆိုနေကြသည်။

မလွဲမရှောင်သာစစ်မှုထမ်းရမည်ဆိုပါကလည်း အာဏာရှင်ကိုတော်လှန်နေသည့်ရက္ခိုင့်တပ်တော်(AA )ထံတွင်သာ အမှုထမ်းခွင့်၇လိုကြောင်းလည်း တောင်ကုတ်မြို့ခံ အမျိုးသမီးငယ် တစ်ဦးကပြောသည်။

" မဖြစ်မနေဝင်ရမယ်ဆိုလို့ရှိရင်ဝင်အတူတူ ကိုယ့်ရက္ခိုင့်တပ်တော်ထဲသာဝင်လိုက်ချင်တယ်။ အကြမ်းဖက်စစ်တပ်ထဲမဝင်ချင်ဘူး" ဟု ပြောသည်။(NN-23)