ကျောက်တော်မှ လူထုဇော်ဝင်းနှင့် ဓာတ်ပုံဆရာစိုးမိုးကျော်အပါအဝင် ၃ ဦးလွတ်မြောက်

ရေးသူ: Web Master (NN 11)
| ရက်စွဲ: ၁၃ ဖေဖော်ဝါရီ ၂၀၂၄
| ကြည့်ရှုသူ: 1.4k

ရခိုင်ပြည် ၊ကျောက်တော်မြို့တွင် ဖမ်းဆီးခံထားရသည့် လူထုဇော်ဝင်းနှင့် မင်းပြားမှ ဓာတ်ပုံဆရာ ဦးစိုးမိုးကျော် အပါအဝင် ၃ဦး အသက်မသေဘဲ လွတ်မြောက်ခဲ့ကြောင်း သတင်းရရှိသည်။

ကျောက်တော် စကခ(၉) ဌာနချုပ်လက်အောက်ရှိ ခမရ ၃၇၅ တပ်ရင်းတွင် ဖမ်းဆီး ထိန်းသိမ်း ခံထားရာက လွတ်မြောက်လာခြင်း ဖြစ်သည်ဟု ကျောက်တော်မြို့ခံ သတင်းရင်းမြစ် တစ်ဦးက နိရဉ္စရာကိုပြောသည်။

" သူတို့ လွတ်မြောက်လာတာမှန်တယ်။ ကျနော်တို့ သိရသလောက် ၃၇၅ ကို ရကတည်းက လွတ်မြောက် လာတယ်လို့ ကြားတယ်" ဟုပြောသည်။

၎င်းလွတ်မြောက်လာသူ သုံးဦးသည် ကျောက်တော် စကခ(၉) လက်အောက်ခံ ခမရ ၃၇၅ကို ရက္ခိုင့်တပ်တော် သိမ်းပိုက်ချိန်က ထွက်ပြေး လွတ်မြောက်လာခြင်းကိုကြားမိသည်ဟု ကျောက်တော် ဒေသခံတစ်ဦးကနိရဉ္စရာကိုပြောသည်။

" ကျနော်တို့ကြားတာက ထွက်ပြေး လွတ်မြောက်လာတာ။ ကိုယ့်တပ်တော်က ကယ်ထားပါတယ်။ လေးယောက်မှာ တစ်ယောက်သေတယ်။ ကိုဇော်ဝင်း အပါအဝင်သုံး‌ ယောက်ကလွတ်တယ် " ဟုပြောသည်။

လွတ်မြောက်လာသည့်သူများကိုလည်းရက္ခိုင့်တပ်တော်က လုံခြုံသည့်နေရာတွင် ထိန်းသိမ်းထားကြောင်း သိရသည်။

ကျောက်တော်မြို့၊ မြို့မရဲစခန်းမှ ရဲနှင့်စစ်သားအများ အပြားသည် ပြီးခဲ့သည့် ဇန်နဝါရီ ၁၆ ရက် နေ့ကနေ စခန်းမှစွန့်ခွာသွားခဲ့ကြပြီး စကခ(၉)နှင့်ပူးပေါင်းခဲ့စဥ် မြို့မရဲစခန်းမှ အချုပ်ကားနှင့်အတူ ဦးဇော်ဝင်းတို့လည်း ပါသွားခဲ့သည်။

ပြီးခဲ့သည့်၂၀၂၂ခုနှစ်အတွင်းက စစ်ကောင်စီသည် ကျောက်တော်မြို့မှ လူမှုရေးလှုပ်ရှားသူ ဦးဇော်ဝင်းကို ပုဒ်မ ၅၀၅-ကဖြင့် တရားစွဲဆိုထားပြီး မင်းပြားမြို့မှ အပျော်တမ်း ဓာတ်ပုံဆရာဦးစောမိုးကျော် ကိုပုဒ်မ ၁၇(၁)ဖြင့် ကျောက်တော်မြို့မရဲစခန်းတွင်တရားစွဲဆိုအမှုဖွင့် ဖမ်းဆီးခဲ့ကြောင်းသိရသည်။(NN-11)