၇ခိုင်ပြည်၊ကျောက်ဖြူမြို့၊ကျောက်တလုံး မွတ်လင်ဒုက္ခသည်စခန်းမှ အမျိုးသား ၁၁၇ ဦးကိုစစ်သင်တန်းပေးရန် စစ်ကောင်စီက ခမ၇ ၅၄၂ တပ်ရင်းထဲသို့ အတင်း အကျပ်ခေါ်ယူသွားပြီဖြစ်ကြောင်းသတင်းရရှိသည်။

အဆိုပါဒုက္ခသည်စခန်းမှအသက် ၁၈ နှစ်မှ ၅၅ နှစ်ကြား ဒုက္ခသည်အမျိုးသား ၁၁၇ ဦးကိုဖေဖော်ဝါရီလ ၂၈ ရက်မနက်ပိုင်းနှင့် ယမန်နေ့ဖေဖော်ဝါရီလ ၂၉ ရက်တို့တွင်စစ်ကောင်စီက အတင်းအကျပ် ခေါ်ယူသွားကြောင်း ကျောက်ဖြူဒေသခံတစ်ဦးကပြောသည်။

" ကျောက်တလုံးစခန်းကအမျိုးသား ၁၁၇ ယောက်ကိုစစ်တပ်က အတင်း ခေါ်သွားပါပြီ။ခမ၇၅၄၂ ထဲကိုခေါ်သွားတာပါ" ဟု သူက နိရဉ္စရာသတင်းဌာနသို့ပြောသည်။

စာရင်းကောက်ယူသွားရာတွင်ဒုက္ခသည် ၁၀၇ ဦးဖြစ်သော်လည်း စုစုပေါင်း ၁၁၇ ဦးကိုအတင်းအဓမ္မ ခေါ်ယူသွားကြောင်းမျက်မြင်ဒေသခံများကပြောသည်။

" သူတို့လာမခေါ်ခင်တရက်က စစ်တပ်ကစခန်းကိုရောက်လာတယ်။ ၁၀၇ ဦးစာရင်း ကောက်ယူသွားတယ်။အခုခေါ်သွားတာ စုစုပေါင်း ၁၁၇ ယောက်ခေါ်သွားပါတယ်"ဟု ဒေသခံတစ်ဦးကပြောသည်။

စစ်ကောင်စီကစစ်မှုထမ်းရန် အတင်းအကျပ်ဖိအားပေးမှုများကြောင့် အဆိုပါ ကျောက်တလုံးမွတ်ဆလင်ဒုက္ခသည်စခန်းမှ အမျိုးသမီးငယ်တစ်ဦးအပါအဝင် လူငယ်(၁၀)ဦးခန့်သည်ပြီးခဲ့သည့် ရက်ပိုင်းက ရက္ခိုင့်တပ်တော်(AA)ထံ ဝင်ရောက် ခိုလှုံသွားခဲ့ကြသည်။

ဖေဖော်ဝါရီလ၂၇ ရက်က ရက္ခိုင့်တပ်တော်ထဲခိုလှုံသွားသူများ၏ မိသားစုဝင် ရ ဦးကိုခမ၇ ၅၄၂ ဗျူဟာမှူးဝဏ္ဏအောင် ဦးဆောင်သည့် စစ်ကောင်စီတပ်က ဖမ်းဆီးသွားခဲ့သည်။

လက်ရှိ ခမ၇ ၅၄၂ ထဲ အတင်းအကျပ်ခေါ်ယူခံရသည့်မွတ်ဆလင်ဒုက္ခသည်များကို မိသားစုဝင်များက ထမင်း သွားပို့ပေးနေ၇သည်ဟုလည်း နောက်ထပ်ကျောက်ဖြူဒေသခံတစ်ဦးကပြောသည်။

" သူတို့ကို တပ်ထဲမှာဆေးစစ်တယ်လို့သိရတယ်။ ဆေးမအောင်တဲ့ သူတစ်ယောက်က ပြန်ပြောပြလို့သိရတာပါ။ ပြီးတော့တပ်ထဲခေါ်ခံရတဲ့သူတွေအတွက် မိသားစုကထမင်းတွေ သွားပို့နေရတာတွေ တွေ့ခဲ့၇တယ်" ဟု ပြောသည်။

စစ်ကောင်စီသည်စစ်မှုထမ်းဥပဒေကို ပြည်သူများ ၏သဘောဆန္ဒနဲ့ဆန့်ကျင်ပြီး အာဏာရှင်ပီပီ ကျင့်သုံးပြီးနောက်တွင်ရခိုင်ပြည်ထဲမှ မွတ်ဆလင်ဒုက္ခသည်များကိုလည်း စစ်မှုထမ်းရန် အတင်းအကျပ်ဖိအားပေးမှု၊ ဖမ်းဆီးခေါ်ယူမှုများဆက်တိုက်ပြုလုပ်လာခြင်းဖြစ်သည်။

စစ်တပ်အရာရှိများကစစ်မှုထမ်းပြီးပါကနိုင်ငံသားဖြစ်ခွင့်ပေးမည်ဟု ချွေးသိပ်ပြောဆို၍တမျိုး၊ စစ်မှုမထမ်းပါက မိသားစုဝင်များအားလုံးဖမ်းဆီးပစ်မည်ဟု ခြိမ်းခြောက်၍တဖုံ မွတ်ဆလင် ဒုက္ခသည်များ အပေါ် အကျပ်ကိုင်နေခြင်း ဖြစ်ကြောင်း ဒုက္ခသည်များ၏ ပြောပြချက်အရ သိ၇သည်။(NN-23)