အင်အား ၇၀၀၀ ကျော်ခန့်ရှိသည့် ကရင်နယ်ခြားစောင့်တပ်-BGF တပ်အားလုံးသည် စစ်ကောင်စီလက်အောက်မှ ခွဲထွက်ပြီးကရင်အမျိုးသားတပ်မတော် (KarenNational Army -KNA)အဖြစ် ပြောင်းလဲ ဖွဲ့စည်း ရပ်တည်လိုက်ပြီဖြစ်ကြောင်း သတင်းရရှိသည်။  

ဖေဖော်ဝါရီလ နောက်ဆုံးအပတ်တွင်BGF တပ်နယ်(၄)ခုမှ တပ်နယ်မှူးများအားလုံး တက်ရောက်သည့် အစည်းအဝေးတွင်ထိုသို့ သဘောတူညီအတူတကွ ဆုံးဖြတ်ခဲ့ခြင်းဖြစ်ကြောင်း တပ်နယ်-၂ ဗျူဟာမှူးဗိုလ်မှူး စောတင်ဝင်းက အတည်ပြုပြောဆိုသည်ဟု ဒေသအတွင်းကမီဒီယာတစ်ခုဖြစ်သည့် KIC တွင် ဖော်ပြသည်။

၎င်းတို့အနေဖြင့် စစ်ကောင်စီကပေးသည့်လစာနှင့် အထောက်အပံ့ကို မယူတော့ဘဲ KNA တပ်ဖွဲ့အဖြစ် သီးသန့်ရပ်တည် သွားမည်ဖြစ်ပြီး ကရင်အမျိုးသားအကျိုးကို လုပ်ဆောင်သွားမည်ဟု သိ၇သည်။

စစ်ကောင်စီတပ်လက်အောက်ရှိ ကရင်ပြည်နယ်၊ နယ်ခြားစောင့်တပ်-BGF သည် တပ်နယ် (၄)နယ်၊တပ်ရင်း ၁၃ ရင်းဖြင့် ဖွဲ့စည်းထားသည်။

လှိုင်းဘွဲမြို့နယ်တွင်အမှတ် ၁၀၁၁၊ ၁၀၁၂၊ ၁၀၁၅၊ ၁၀၁၆ တပ်ရင်းတို့ အခြေချလှုပ်ရှားသလိုဖာပွန်မြို့နယ်တွင် အမှတ် ၁၀၁၃၊ ၁၀၁၄ တပ်ရင်း၊ မြ၀တီမြို့နယ်တွင်အမှတ် ၁၀၁၇၊ ၁၀၁၈၊ ၁၀၁၉၊ ၁၀၂၀၊ ၂၀၂၂ တပ်ရင်းများနှင့် ကြာအင်းဆိပ်ကြီးမြို့နယ်တွင်အမှတ် ၁၀၂၁၊ ၁၀၂၃ တပ်ရင်းတို့ အခြေချလှုပ်ရှားလျက်ရှိသည်။

လက်ရှိတပ်ဖွဲ့ဝင်အင်အားမှာ ၇၀၀၀ (ခုနစ်ထောင်)ကျော်ရှိသည်ဟု လေ့လာသူများကခန့်မှန်းပြောဆိုထားသည်။

BGF တပ်ဖွဲ့ဝင်များအားလုံးKNA အဖြစ်ပြောင်းလဲဖွဲ့စည်းမည့်ကိစ္စကို ယခုအချိန်ထိ တရားဝင်ထုတ်ပြန်ထားခြင်းမရှိသေးသော်လည်း ၎င်းတို့၏ ထိန်းချုပ်နယ်မြေအတွင်းရှိ ကျေးရွာအချို့၌မူ KNA (ကရင်အမျိုးသားတပ်မတော်) တွင်တာဝန်ထမ်းဆောင်ရန် ဖိတ်ခေါ်သည့် ပိုစတာဆိုင်းဘုတ်များ စိုက်ထူထားသည်ကိုတွေ့ရှိရသည်ဟု သိ၇သည်။

NN-30/ Ref and Photo: Karen Information Center(KIC)