ရန်ကုန်တွင် ဖမ်းဆီးခံထား၇သူများအထဲမှ နောက်ထပ်အမျိုးသမီး ၂၀ ခန့် ကို ရခိုင်သို့မပြန်ရ ခံဝန်ကတိဖြင့် ပြန်လွှတ်ပေး

Preview

ရန်ကုန်တွင် ဖမ်းဆီးခံထား၇သူများအထဲမှ နောက်ထပ်အမျိုးသမီး ၂၀ ခန့် ကို ရခိုင်သို့မပြန်ရ ခံဝန်ကတိဖြင့် ပြန်လွှတ်ပေး

မတ် ၀၃/ ၂၀၂၄ | ကြည့်ရှုသူ :5473

(အမျိုးသားထဲမှ လူငယ်တစ်ဦးတစ်ယောက်ကိုမှ ပြန်မလွတ်သေးသလိုညှဉ်းပမ်းနှိပ်စက်မှုများရှိဟုဆို)

ရန်ကုန်မြို့တွင်ဖမ်းဆီးထိန်းသိမ်းခံထားရသည့် ရာနှင့်ချီရှိသည့် ၇ခိုင်လူမျိုးများအထဲမှ နောက်ထပ် အမျိုးသမီး ၂၀ ခန့်ကိုရခိုင်သို့မပြန်၇ ခံဝန်ကတိဖြင့် မတ်လ ၁ ရက်နေ့က ပြန်လွှတ်ပေးခဲ့သည်ဟုအမည်မဖော်လိုသည့် မိသားစုဝင်တစ်ဦးက နိရဉ္စရာသတင်းဌာနကိုပြောသည်။

ရန်ကုန်တိုင်းဒေသကြီး၊မင်္ဂလာဒုံမြို့နယ်တွင်ရှိသည့် စစ်တပ်ပိုင်နေရာတစ်ခုတွင်ဖမ်းဆီးခံထားရသည့် ၇ခိုင်လူငယ်များထဲမှ အမျိုးသမီးငယ် ၂၀ ခန့်ကိုမတ်လ ၁ ရက်နေ့နေ့လယ်ပိုင်းကစစ်ကောင်စီ တပ်ကားဖြင့် မြောက်ဥက္ကလာမြို့အနီးရှိ အဆောက်အဦတစ်ခုသို့ခေါ်ယူလာပြီး ဆွေမျိုးများကို ၎င်းတို့အမည်၊နေရပ် လိပ်စာ၊ မှတ်ပုံတင်ဖြင့် လာရောက်ခေါ်ယူခိုင်းခဲ့သည်ဟု၎င်းက ပြောသည်။

“ ခန့်မှန်း၇သလောက် အယောက် ၂၀ ပါမယ်ထင်တယ်။ မိန်းကလေးတွေပါ။ လေဆိပ်မှာအဖမ်း ခံရသူရော၊ ကားဂိတ်မှာ အဖမ်းခံရသူရောပါတယ်။ သူတို့ကကားနဲ့ခေါ်လာပြီး မြောက်ဥက္ကလာမှာ ချထားတယ်။ပြီးတော့ ချက်ချင်းမလွတ်သေးဘူး။ လက်ရှိနေတဲ့ရန်ကုန်မြို့က အမျိုးတွေကိုလာခေါ်ခိုင်းတယ်။ ၇ခိုင်ကို လုံး၀မပြန်၇ဘူးတဲ့ စစ်သားတွေကအဲသလိုပြောတယ် “ ဟုပြောသည်။

ပြန်လွတ်ပေးသူများထဲတွင် အမျိုးသမီးများသာပါဝင်ပြီး အမျိုးသားအများစုကို လက်ရှိအချိန်ထိ ဖမ်းဆီးထားကြောင်း ၄င်းကပြောသည်။

“ ယောကျာ်းလေးတွေကိုဆိုရင် တစ်ယောက်မှပြန်လွတ်ပေးတာမရှိသေးဘူး။ သူတို့ကို ပိုပြီး စစ်ဆေး မေးမြန်းတယ်။ အေအေနဲ့ပက်သက်တာတွေကိုမေးတယ်။ ဖုန်းထဲမှာ အေအေနဲ့ ပတ်သက်တာ၊ ရခိုင်နဲ့ ပတ်သက်တာတွေ တွေ့ရင် ရိုက်နှက်တာတွေရှိတယ်လို့ပြောတယ်။ အရမ်းသနားစရာကောင်းတယ်။ တချို့ကျရင် အမှောင်ခန်းထဲမှာထားပြီး စစ်ဆေးတယ်လို့သိ၇တယ် “ ဟု၎င်းက ပြောသည်။

ဖမ်းဆီးခံ၇သူလူငယ်အများစုမှာ အသက် ၁၈နှစ်နှင့်အထက် အမျိုးသားများနှင့် အမျိုးသမီးများ ဖြစ်ကြပြီး ထိုအထဲတွင်ကျောင်းသူများ၊စက်ရုံများတွင်အလုပ်လုပ်ကိုင်သူများ၊ရန်ကုန်သို့ အလည်လာကြသူများ အများစုဖြစ်ကြောင်းသိ၇သည်။

ပြီးခဲ့သည့်ဖေဖော်ဝါရီ ၂၀ ရက်နေ့ကရန်ကုန်မြို့ အောင်မင်္ဂလာကားဂိတ်တွင်ဖမ်းဆီးခံရသည့် မြေပုံမြို့နယ်မှ၇ခိုင်လူငယ် ၁၄ ဦးအနက် အမျိုးသမီး ၉ဦးကို ပြန်လွတ်ပေးခဲ့ပြီးအမျိုးသမီးငယ် ၁ ဦး အပါအဝင် ကျန် ၅ ဦးကို ယခုအချိန်ထိ ဖမ်းဆီးထားဆဲဖြစ်ကြောင်းသိ၇သည်။

လက်ရှိအချိန်ထိ ရခိုင်အမျိုးသမီးအများအပြားကို စစ်ကောင်စီကခံဝန်ဖြင့် ပြန်လွှတ်ပေးခဲ့သော်လည်း အရေအတွက်အတိအကျကို နိရဉ္စရာသတင်းဌာနအနေဖြင့် သိရှိနိုင်ခြင်းမရှိသေးပါ။

စစ်ကောင်စီမှဖေဖော်ဝါရီ ၁၀ ရက်နေ့က စစ်မှုထမ်းဥပဒေထုတ်ပြန်ပြီးနောက် ရန်ကုန်-စစ်တွေ၊ ရန်ကုန်-ကျောက်ဖြူ၊ ရန်ကုန်- သံတွဲသို့ ပြန်ကြသည့် လူငယ်အများအပြားကို စစ်ကောင်စီက ရန်ကုန်လေဆိပ်နှင့်ရခိုင်ရှိ လေဆိပ်များတွင် ဥပဒေမဲ့ ဖမ်းဆီးထားခဲ့ကြောင်း ဒေသခံများကပြောသည်။

ကျောက်ဖြူမြို့တွင်လည်း လေယာဉ်ဖြင့် ပြန်လာသူ ၇ခိုင်လူငယ်၁၀၀ ခန့်အား ဖမ်းဆီးထားပြီး လူအနည်းငယ်ကို ပြန်လွှတ်ကာ ကျန်အများစုကို ရမ္မာ၀တီခန်းမတွင်ပိတ်လှောင်ထားကာ ထမင်းမကျွေးဘဲထားသဖြင့် ကျောက်ဖြူတွင် ဆွေမျိုးရှိသူများအနေဖြင့် အဆင်ပြေသော်လည်းဆွေမျိုးမရှိသူများမှာ စားသောက်ရေး အခက်အခဲများရှိနေကြောင်း သိရှိ၇သည်။

စစ်ကောင်စီမှ ယခုကဲ့သို့ မတရားဖမ်းဆီးမှုများမြင့်တက်လာသဖြင့် ရခိုင်ပြည်သူလူထုအကြား စိုးရိမ်မှုမြင့်တက်နေသလိုတည်ဆဲဥပဒေများကို ဆန့်ကျင်ပြီး အပြစ်တစ်စုံတစ်ရာ ကျူးလွန်ထားခြင်း မရှိသည့် ရခိုင်လူငယ်များအားစစ်ကောင်စီကခရီးသွားလာခွင့်ပိတ်ပင်ပြီး ဖမ်းဆီးထားခြင်းအပေါ် ခွဲခြားဖိနှိပ်မှုအဖြစ် ရှုမြင်သည်ဟု အမည်မဖော်လိုသူစစ်တွေတက္ကသိုလ်မှ တတိယနှစ် ကျောင်းသား တစ်ဦးက ပြောသည်။( NN-11)

#ရန်ကုန်

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ဆက်စပ် အကြောင်းအရာများ

နောက်ဆုံးရသတင်းများ