သံတွဲမြို့တွင် စစ်မှုထမ်းထောက်ပံ့ကြေးဟုဆိုကာ အိမ်ထောင်စုတစ်ခုကို ငွေကျပ် ၅၀၀၀ စီကောက်ခံနေ

 စိုးစံအောင်၊ နိရဉ္စရာ၊ မတ် ၁၈ / ၂၀၂၄

ရခိုင်ပြည်၊ သံတွဲမြို့ပေါ်တွင် စစ်မှုထမ်းခေါ်ယူခံရပြီး စစ်သင်တန်းတက်မည့်သူများအတွက် စားစရိတ် ထောက်ပံ့ကြေးဟုဆိုကာ အိမ်ထောင်စုတစ်ခုကို ၅၀၀၀ ကျပ်စီ စစ်ကောင်စီကကောက်နေကြောင်း မြို့ခံများကပြောသည်။

ယမန်နေ့မတ်လ ၁၈ ရက်က သံတွဲမြို့၊ ဗောဓိကုန်းရပ်ကွက်တွင် အိမ်ထောင်စုတစ်ခုစီမှ ကျပ်ငွေ ၅၀၀၀ ကျပ်စီလာရောက်ကောက်ယူသွားပြီး စစ်သင်တန်းတက်နေသူများကိုထောက်ပံပေးရန်အတွက်ဟု ပြောဆိုသွားကြောင်း မြို့ခံအမျိုးသမီးတစ်ဦးကပြောသည်။

" သံတွဲ ဗောဓိကုန်းရပ်ကွက်မှာ တစ်အိမ်ကို ငါးထောင်လိုက်ကောက်နေတယ်။ စစ်သင်တန်း တက်နေသူတွေကို ထောက်ပံပေးဖို့အတွက်လို့ပြောတယ်" ဟု သူမကပြောသည်။

ရပ်ကွက်အုပ်ချုပ်ရေးမှူးများက လာရောက်ကာ အိမ်တိုင်းစေ့ ငွေကြေးကောက်ခံသွားခြင်းဖြစ်ကြောင်း မြို့ခံများက ပြောသည်။

သံတွဲမြို့နယ်တွင် စစ်မှုထမ်းဆင့်ခေါ်ရေးအဖွဲ့ကို မတ်လ ၆ ရက်တွင်ဖွဲ့စည်းလိုက်ခြင်းဖြစ်ပြီး ယနေ့ မတ်လထဲစတင်၍ ကျေးရွာအုပ်စုတစ်ခုမှ လူငယ်နှစ်ဦးစီ စစ်မှုထမ်းဆင့်ခေါ်ရေးအဖွဲ့က မဲနှိုက်ရွေးချယ်ပြီး စစ်သင်တန်းခေါ်ယူနေသည်ဟုသိရသည်။

ဗောဓိကကုန်းရပ်ကွက်တွင် ယမန်နေ့က လူငယ် ၂၅ ဦးထဲမှ စစ်မှုထမ်းခေါ်ယူမည့်သူတစ်ဦးကို မဲနှိုက် ရွေးချယ်ခဲ့ရကြောင်း ရပ်ကွက်တွင်းနေထိုင်သူများကပြောသည်။

စစ်ကောင်စီသည် ရပ်ကျေးအုပ်ချုပ်ရေးမှူးများကို လေးလတကြိမ်စီ လူသစ်စုဆောင်းပေးရမည်ဟု အတင်းအကျပ် ဖိအားပေးထားသည့်အတွက် အခက်တွေ့နေကြောင်း ကျေးရွာအုပ်ချုပ်ရေးမှူးတချို့က နိရဥ္စရာသတင်းဌာနသို့ပြောသည်။ ပုံစာ- သံတွဲမြို့