စစ်တွေတွင် ရပ်ကွက်ချင်းအလိုက် အမျိုးသမီးနှင့် လိင်စိတ်ခံယူမှုကွဲပြားသူ(LGBT) လူငယ်များ အပါအဝင် လူငယ် ၂ဝဝမှ ၃ဝဝခန့် စစ်ကောင်စီထံ စစ်မှုထမ်းရန် စာရင်းထွက်လာသဖြင့် စိုးရိမ်နေကြ

အိမ်စိုးဖြူ၊နိရဉ္စရာ၊ မေ ၁၉/ ၂ဝ၂၄

ရခိုင်ပြည်နယ်၊ စစ်တွေမြို့တွင် ရပ်ကွက်အလိုက် အမျိုးသမီးနှင့် လိင်စိတ်ခံယူမှုကွဲပြားသူ (LGBT) လူငယ်များအပါအဝင် ၂ဝဝမှ ၃ဝဝ ခန့် စစ်ကောင်စီထံ စစ်မှုထမ်းရန် စာရင်းထွက်လာသဖြင့် မိသားစုဝင်များ အနေဖြင့် စိုးရိမ်နေကြကြောင်းသတင်းရရှိသည်။

နေအိမ်တချို့မှ လူငယ် ၃ ဦးခန့် အဆိုပါစာရင်းတွင်ပါသည်ကိုတွေ့ရပြီး လိင်စိတ်ခံယူမှုကွဲပြားသူ လူငယ်များနှင့် အမျိုးသမီးငယ်များ အမည်များပါ ပါဝင်နေသည့်အတွက် မိသားစုဝင်များမှာ စိုးရိမ်နေကြသည်ဟု စစ်တွေမြို့ခံများက ပြောသည်။

ရွာကြီးမြောက်ရပ်ကွက်နေ အမည်မဖော်လိုသူ အမျိုးသမီးတစ်ဦးက “ အန်တီသားက အိမ်ထောင်သည်ပါ။ သူ့နာမည်ပါတယ်ဆိုလို့ သွားကြည့်တော့ အဖေနာမည်နဲ့ တကွ စာရင်းတွေနဲ့ပါလာတာပါ။ မိန်းကလေးလေးယောက်နာမည်ပါတယ်။ မိန်းမလျာလေးတွေ နာမည်တွေလည်း ပါတယ်။ မိသားစုတွေငိုနေကြပြီ” ဟု ပြောသည်။

၎င်းအပြင် ကုန်တန်းရပ်ကွက်နေ အမျိုးသမီးတစ်ဦးက ၎င်း၏ အမျိုးသားဖြစ်သူနှင့် အစ်ကိုနှစ်ဦးလုံးမှာ စစ်ကောင်စီတွင် စစ်မှုထမ်းရန် စာရင်းပါနေသည်ကိုတွေ့ရသဖြင့် စိတ်မကောင်းဖြစ်မိကြောင်း ပြောသည်။

အဆိုပါကိစ္စနှင့်ပတ်သက်၍ ရပ်ကွက်အုပ်ချုပ်ရေးမှူး တချို့ကို နိရဉ္စရာမှ ဆက်သွယ်မေးမြန်းရာတွင် စစ်မှုထမ်းစာရင်းထွက်လာသည်မှာ ဟုတ်မှန်သော်လည်း လဝကမှ ပေးထားသည့် စာရင်းသာ ဖြစ်ကြောင်း၊ စာရင်းမှာပါသူအားလုံးကို ခေါ်ယူမှာ မဟုတ်ကြောင်းပြောသည်။

“အခုက လ၀က ကနေ စစ်မှုထမ်းနိုင်တဲ့သူ စာရင်းထွက်လာတယ်။ အဲဒါကို စစ်တွေမှာ ရှိတဲ့ ရပ်ကွက်အုပ်ချုပ်ရေးမှူးတွေက ရပ်ကွက်လိုက် သွားရောက်စိစစ်ရမယ်ဆိုပြီး မြို့နယ် အုပ်ချုပ်ရေးမှူးက ညွှန်ကြားထားတယ်လို့ သိရတယ်။ စာရင်းပါ အချက်အလက်ညီရင်တော့ စစ်မှုထမ်းရမယ်။ ဒါပေမယ့် အကုန်လုံးတော့ ပါမှာ မဟုတ်ဘူး” ဟု အမည်မဖော်လိုသူ ရပ်ကွက် အုပ်ချုပ်ရေးမှူး တစ်ဦးက ပြောသည်။

ရခိုင်တွင် ရက္ခိုင့်တပ်တော်(AA)နှင့် စစ်ကောင်စီတပ်တို့ တိုက်ပွဲများပြင်းထန်နေပြီး ရခိုင်မြောက်ပိုင်း မြို့နယ်အများအပြားကို AA က သိမ်းပိုက်ရရှိထားပြီဖြစ်သည်။ ယင်းကြောင့် စစ်ကောင်စီ တပ်စခန်းတချို့ကျန်ရှိနေသည့် စစ်တွေမြို့အဝင်၊ အထွက်အားလုံးကို ခရီးသွားလာခွင့်ပိတ်ဆို့ထားကြောင်း ဒေသခံများကပြောသည်။

ယင်းကြောင့် စစ်ကောင်စီထိမ်းချုပ်ထားချင်သည့် စစ်တွေမြို့နှင့် ရခိုင်တောင်ပိုင်းမြို့နယ်များဖြစ်သည့် သံတွဲ၊ ကျောက်ဖြူတို့တွင်လည်း ရပ်၊ ကျေးအုပ်ချုပ်ရေးမှူးများမှတဆင့် စစ်မှုထမ်းရန် ဖိအားပေးလုပ်ဆောင်မှုများ ရှိနေကြောင်းသိရသည်။