၁၁ မျဥ်းစောင်းကို ကားဂိတ်များတွင် လက်မှတ်မရောင်းရန်ညွှန်ကြားထားသော်လည်း အထောက်အထားပါလျှင် ဝန်ထမ်းနှင့်ကျောင်းသားများကိုခွင့်ပြု

(လေယာဉ်ဖြင့် ရန်ကုန်- စစ်တွေ သွားလာခွင့်ပြုထားဆဲဟုဆို)

သဉ္စာနွယ်/နိရဥ္စရာ၊ မတ် ၂၁/ ၂၀၂၄

ရခိုင်လူမျိုးများကိုင်ဆောင်သည့် နိုင်ငံသားစိစစ်ရေးကဒ်ပြား ၁၁ မျဥ်းစောင်းများကို ကားလက်မှတ် မရောင်းရန် စစ်ကောင်စီမှ ကားဂိတ်များကို ညွှန်ကြားထားသော်လည်း  အထောက်အထားပါလျှင် ဝန်ထမ်းနှင့် ကျောင်းသားများကို ခွင့်ပြုထားသည်ဟု ခရီးသွားအေဂျင်စီတစ်ခုက နိရဉ္စရာမှ ဆက်သွယ်မေးမြန်းစဉ် ပြောကြားသည်။

“ လောလောဆယ် ဂိတ်တွေမှာတော့ ၁၁/ မျဥ်းစောင်း လက်မှတ်ရောင်းခွင့်မရှိဘူးလို့ညွှန်ကြားထားတယ်။ အဓိက ဝန်ထမ်းနဲ့ ကျောင်းသားလောက်ပဲ ထောက်ခံစာအပြည့်အစုံပါရင် သွားလို့ရတယ်။ ကျန်တဲ့လူက မရဘူး “ဟုပြောသည်။

ရန်ကုန်တိုင်းဒေသကြီးရှိ အောင်မင်္ဂလာအဝေးပြေးကားဂိတ်တွင် ၁၁မျဥ်းစောင်း လက်မှတ်ရောင်းခွင့်မရှိဟု ညွန်ကြားစာများကပ်ထားကြောင်း၊  အထောက်အထားပါလျှင် ဝန်ထမ်းနှင့်ကျောင်းသားများကို သွားခွင့်ပြုကြောင်း၊ သို့သော်လည်း ရဲထောက်ခံစာ၊ မှတ်ပုံတင်မူရင်း၊ ဌာနဆိုင်ရာ ခရီးသွားလာခွင့် လက်မှတ်များလိုကြောင်း နောက်ထပ်ရန်ကုန်မှ ခရီးသွားအေဂျင့်တစ်ခုမှလည်း ပြောသည်။

မြန်မာနိုင်ငံထဲမှ မည်သည့် မြို့နယ်ကိုမဆို  ၁၁ မျဥ်းစောင်းကိုင်ဆောင်သူများကို လက်မှတ် လုံးဝ မရောင်းချကြရန် စစ်ကောင်စီမှ ညွန်ကြားထားပြီး တစ်ခြားမျဉ်းစောင်းများကိုလည်း စိစစ်မှုများနေသည်ဟု အောင်မင်္ဂလာ အဝေးပြေးကားဂိတ်မှ ခရီးသွားအေဂျင်စီမှ တာဝန်ရှိသူတစ်ဦးက နိရဥ္စရာသတင်းဌာနကို ပြောသည်။

“ ၁၁ မျဥ်းစောင်းတွေကို ကားလက်မှတ်လုံး ဝ မရောင်းဖို့ စကစက ညွန်ကြားထားတယ်။ တခြား မျဥ်းစောင်းတွေဆိုရင် မှတ်ပုံတင်မူရင်းရယ်၊ ရဲစခန်းနဲ့ ရပ်ကွက်ထောက်ခံစာတို့ ယူလာရပါမယ်” ဟုပြောသည်။

ကားလက်မှတ်များကို ရောင်းခွင့်မပြုထားသော်လည်း လေကြောင်းခရီးစဥ်များကိုလည်း ပုံမှန်ပြေးဆွဲလျက်ရှိပြီး အလွယ်တကူသွားလာ၍ရသည်ဟု စစ်တွေမြို့လေယာဥ်လက်မှတ်အရောင်း အေဂျင်စီတစ်ခုက နိရဥ္စရာ သတင်းဌာနကိုပြောသည်။

“ လေယာဥ်ခရီးစဥ်တွေကိုတော့  အခုချိန်ထိဘာစာမှ ညွန်ကြားထားတာမရှိဘူး။ စစ်တွေနဲ့ရန်ကုန်တော့ ပုံမှန်သွားနေကြပါတယ်။ ဒါပေမယ့် ရန်ကုန်ကနေစစ်တွေ သွားမယ်ဆိုရင်တော့ အတတ်နိုင်ဆုံး လူငယ်တွေကို မသွားဖို့အကြံပေးချင်တယ်။ ဖမ်းဆီးတာတွေရှိနေတယ်ပေါ့နော်၊ အဲ့ဒါကြောင့်ပါ” ဟုပြောသည်။

စစ်ကောင်စီသည် ပြီးခဲ့သည့်ဖေဖော်ဝါရီလအတွင်းက ဆိုလျှင် ရန်ကုန်မှ ရခိုင်သို့သွားသည့် လူငယ်များကို အောင်မင်္ဂလာအဝေးပြေး ကားဂိတ်တွင် ဖမ်းဆီးသကဲ့သို့ စစ်တွေလေဆိပ်၊ကျောက်ဖြူလေဆိပ်နှင့် ရန်ကုန် လေဆိပ်တို့တွင် ဖမ်းဆီးမှုများပြုလုပ်မှုများရှိသည်ဟု သိရသည်။