စစ်မှုထမ်းစုဆောင်းသည့် သံတွဲမြို့နယ်မှ ရာအိမ်မှူးတစ်ဦး အသတ်ခံရ
စိုးစံအောင် ၊ နိရဉ္စရာ ၊ မတ် ၂၂ / ၂၀၂၄
သံတွဲမြို့နယ်တွင် ကျေးရွာသားများအား ပြည်သူ့ စစ်မှုထမ်းရန် စာရင်းကောက်ခံ စုဆောင်းနေသည့်ရာအိမ်မှူးတစ်ဦး မတ်လ ၂၁ ရက်နေ့ကသတ်ဖြတ်ခံလိုက်ရကြောင်းသတင်းရရှိသည်။
သတ်ဖြတ်ခံ၇သူမှာသံတွဲမြို့နယ်၊ ဒါ၀ကျေးရွာ ရာအိမ်မှူး ဦးဝင်းရွှေ အသက် (၄၅)နှစ် ဝန်းကျင် ဖြစ်ကြောင်း ကျေးရွာသားများကပြောသည်။
သူသည်ယမန်နေ့မတ်လ ၂၁ ရက်၊ နေ့လယ်ပိုင်းက သံတွဲမြို့သို့ဈေးဝယ်ရန်သွားရောက်ပြီးကျေးရွာသို့ အပြန်လမ်းတွင်သတ်ဖြတ်ခံလိုက်၇ခြင်းဖြစ်ကြောင်း ဒါ၀ကျေးရွာသားတစ်ဦးက နိရဥ္စရာ သတင်းဌာနသို့ အတည်ပြုသည်။
" ရာအိမ်မှူးနာမည်ကဦးဝင်းရွှေပါ။ အသက် ၄၅ ဝန်းကျင်လောက်ရှိမယ်။ သူအသတ်ခံ၇တာကတော့ မှန်ပါတယ်။ စစ်မှုထမ်းဖို့လူစုဆောင်းတာနဲ့ ပတ်သက်နေတယ် "ဟု ပြောသည်။
ရခိုင်ပြည်တောင်ပိုင်းလူထုအခြေပြုသတင်းစာမျက်နှာDwayarwaddy ကမူဦးဝင်းရွှေကို အမည်မသိလူများက လည်လှီးသတ်ဖြတ်သွားခြင်းဖြစ်ကြောင်းရေးသားဖော်ပြထားသည်။
ဦးဝင်းရွှေသတ်ဖြတ်ခံရမှုမှာပြည်သူ့စစ်မှုထမ်းစုဆောင်းမှုများနှင့်ပတ်သက်၍ အငြိုးအတေးထား သတ်ဖြတ်ခံ၇ခြင်းဖြစ်နိုင်ကြောင်းဒေသခံများကထင်မြင်ချက်ပေးကြသည်။
" သံတွဲမှာကရွာတွေမှာလူငယ်တွေကိုအတင်းစစ်မှုထမ်းစုဆောင်းနေတယ်။ဒီအထဲမှာ စစ်ကောင်စီရဲ့ လက်အောက်ကအုပ်မှူးတွေ၊ရာအိမ်မှူးတွေကလည်းအဓိကပါဝင်နေတယ်။ အဲဒါတွေကို ဒေသခံတွေအနေနဲ့ဘယ်ကျေနပ်မလဲ။ဒါတွေကကြာလေပြသနာကြီးထွားလာလေဖြစ်မှာပဲ။ကိုယ့်ဒေသကလူငယ်တွေကိုအတင်းထိုးကျွေးနေတာမျိုးဆိုတော့လေ" ဟု သံတွဲမြို့နယ်မှလူငယ်တစ်ဦးကပြောသည်။
ဒေသအတွင်းတွင်လည်း ရာအိမ်မှူးဦးဝင်းရွှေ အသတ်ခံရခြင်းမှာစစ်မှုထမ်းရန် စာရင်းကောက်ခံခြင်း၊ လူစုဆောင်းနေခြင်းနှင့် ပတ်သက်နေကြောင်း သတင်းထွက်ပေါ်နေသည်ဟုပြောဆိုသည်။
လှူရန်