- Web Master
- ၀၈ အောက်တိုဘာ ၂၀၂၄
စိုးစံအောင်
၊ နိရဥ္စရာ၊ မတ် ၂၅ / ၂၀၂၄
ယမန်နေ့က
စစ်ကြောင်းထိုးပြီး ပြောင်သေကျေးရွာအနီးဝန်းကျင်နေရာများသို့
စစ်ကောင်စီက
တိုက်ခိုက်ရေးလေယာဥ်
Mi 35 ဖြင့်
ပစ်ခတ်တိုက်ခိုက်ခဲ့သလို ယနေ့မွန်းလွဲ ၁၂ နာရီခွဲအချိန်ကလည်း
Mi 35 နှစ်စင်းဖြင့် လာရောက်ပစ်ခတ်နေကြောင်း ဒေသခံများက ပြောသည်။
"Mi-35 လေယာဥ်နဲ့
မနေ့ကမွန်းလွဲပိုင်းမှာ အဲဒီပြောင်သေအနီးတဝိုက်ကိုပစ်တယ်။ ဒီနေ့အခု
၁၂ နာရီမခွဲခင်မှာလည်း Mi 35 နှစ်စီးနဲ့လာပစ်သွားတယ်။
အမ်းမြို့ပေါ်တပ်ရင်းတွေနဲ့ တစ်မိုင်ကုန်းဘက်က လက်နက်ကြီးပစ်နေတာတော့
ဆက်တိုက်ပဲ။ အခုလည်းပစ်နေတယ်" ဟု ယနေ့မွန်းလွဲ ၁၂
နာရီခွဲကျော် အချိန်
ဆက်သွယ်မေးမြန်းရာ သူကပြောသည်။
ပြောင်သေကျေးရွာသို့
ပထမဆုံးစစ်ကြောင်းထိုးလာသည့် အင်အား ၅၀ ခန့်မှာ စကခ(၅) အခြေစိုက်
တောင်ကုတ်မြို့ ခမရ ၃၄၆ တပ်ရင်းမှဖြစ်ကြောင်း၊ စစ်ကောင်စီတပ်ဘက်က အင်အားထပ်ဖြည့်စစ်ကြောင်းထိုးနေကြောင်း၊ လက်ရှိတွင် အင်အားအများအပြားဖြင့် ယင်းနေရာ ဝန်းကျင်တဝိုက် ရောက်ရှိနေကြောင်း
နိရဥ္စရာ၏ သတင်းရင်းမြစ်က ပြောသည်။
၎င်းနေရာများသည် အနောက်ပိုင်းတိုင်းစစ်ဌာနချုပ်နှင့်
တစ်မိုင်ခွဲဝန်းကျင်တွင်တည်ရှိပြီး ၎င်းကျေးရွာများအနီး
စစ်ကောင်စီတပ်က
စစ်ကြောင်း ထိုးပြီး တိုက်ခိုက်ရေးလေယာဥ်များ၊ လက်နက်ကြီးများဖြင့်
ပစ်ခတ်တိုက်ခိုက်နေကြောင်း ဒေသခံများက နိရဥ္စရာသတင်းဌာနသို့ပြောသည်။
" ပြောင်သေရွာနားက
နတ်တောင်ကိုစစ်တပ်က စစ်ကြောင်းထိုးတာ။ ပထမဆုံး အင်အား ၅၀ လောက်က စစ်ကြောင်းထိုးလာတယ်။
အဲဒီတဝိုက်ကို လေယာဥ်နဲ့ ပစ်တယ်။ တပ်ရင်းတွေက လက်နက်ကြီး ပစ်တယ်။လက်နက်ကြီးတွေက
မနေ့ကတရက်လုံးနီးပါးပစ်တာ" ဟု အမ်းမြို့မှစစ်ရေးသတင်းရင်းမြစ်တစ်ဦးကပြောသည်။
အမ်းမြို့မှအမျိုးသမီးတစ်ဦးကလည်း
ယမန်နေ့ကပင် ယနေ့မနက်ပိုင်းအထိ အမ်းမြို့ပေါ်မှ လေယာဥ်များဝဲပျံကာ ပြောင်သေကျေးရွာဘက်သို့ပစ်ခတ်တိုက်ခိုက်နေကြောင်း၊ မြို့ပေါ်တပ်ရင်းများကလည်းလက်နက်ကြီးဆက်တိုက်ပစ်ခတ်နေကြောင်း နိရဥ္စရာသတင်းဌာနသို့ ပြောသည်။
အနောက်ပိုင်းတိုင်းစစ်ဌာနချုပ်အနီး
နှစ်ဘက်တိုက်ပွဲပြင်းထန်ဖြစ်ပွားနေသည်ဟု အွန်လိုင်းလိုင်း မှုကွန်ရက်တွင်
သတင်းများပျံ့နှံ့နေရာ ဒေသခံများကမူ စစ်တပ်ဘက်က တဖက်သတ် စစ်ကြောင်း ထိုးပြီး လေယာဥ်၊ လက်နက်ကြီးများဖြင့်ပစ်ခတ်မှုသာရှိကြောင်း၊ ထိတွေ့မှုအနည်းတော့ ရှိနိုင်ကြောင်း၊ နှစ်ဘက်တိုက်ပွဲပြင်းထန်ဖြစ်ပွားသည်ဟုမကြားမိသေးကြောင်း
ပြောဆိုကြသည်။
" အဲလိုနှစ်ဘက်တိုက်ပွဲပြင်းပြင်းထန်ထန်ကြီးဖြစ်နေတာမျိုးတော့ အခုထိမကြားမိသေးဘူးဗျ။ စစ်တပ်ဖက်က တဖက်သတ်ကြီးကိုရမ်းပစ်နေတာ"
ဟု အမ်းမြို့မှစစ်ရေးသတင်းရင်းမြစ်က ပြောသည်။
ယမန်နေ့က စစ်တပ်ကစစ်ကြောင်းထိုးလာပြီး ပစ်ခတ်မှုများကြောင့် ပြောင်သေရွာသစ်နှင့် ရွာဟောင်း၊ ဂယ်လောင်းနှင့် လုံးကျေးရွာများမှ ဒေသခံများမှ ရွာမှထွက်ပြေးတိမ်းရှောင်ခဲ့ရကြောင်း သိရသည်။ (ဓာတ်ပုံ- ပုံဟောင်း)