အိမ်စိုးဖြူ၊နိရဉ္စရာ၊ ဧပြီ ၂/ ၂၀၂၄

ရခိုင်ပြည်၊ပေါက်တောမြို့နယ်မော်ထုတ်ကျေးရွာ ကိုယနေ့ ဧပြီ ၂ ရက်နေ့ မွန်းလွဲ ၁၂ နာရီကျော်က လက်နက်ကြီး ကျရောက်ပေါက်ကွဲသဖြင့်အမျိုးသမီး ၃ ဦးအပါအဝင်အရပ်သား  ၆ ဦး ဒဏ်ရာ ပြင်းထန်စွာ ရရှိခဲ့ကြောင်းသိ၇သည်။

ဒဏ်ရာရရှိသူများမှာကိုဇော်မင်းနိုင် (၂၃)နှစ်၊ ဦးကျော်နုဖြူ(၄၇)နှစ်၊ ဒေါ်ခင်ချေဝင်း(၃၂)နှစ်၊  ဒေါ်စန္ဒာဝင်း (၃၁)နှစ်၊  ဦးမဲခေါက် (၆၂)နှစ်နှင့် ဒေါ်ကင်ယုံမေ(၆၃နှစ်)တို့ဖြစ်ကြပြီး အသက်အန္တရာယ်စိုးရိမ်ရသည့် လူနာနှစ်ဦးရှိနေကြောင်းဒေသခံ ကျေးရွာသားတစ်ဦးက နိရဉ္စရာကိုပြောသည်။

" ပစ်သံကသိပ်မကျယ်ဘူး။ ဒါပေမယ့် လက်နက်ကြီးကျမှ အသံအကျယ်ကြီး ကြားရတယ်။ ကားလမ်းနားမှာကျပြီး မိန်းမသုံးယောက်ယောကျာ်းသုံး ယောက်နဲ့ စုစုပေါင်းခြောက်ယောက်ဆီမှာထိပြီး ဒဏ်ရာအပြင်းအထန်ရကြတာပါ" ဟုပြောသည်။

အဆိုပါ ပစ်ခတ်မှုကို  စစ်တွေမြို့နယ် ပါဒလိတ်ကျေးရွာဘက် အတွဲလိုက် ဆက်တိုက်ဆိုသလိုပစ်ခတ်ခဲ့ခြင်းဖြစ်ပြီး ပေါက်တောမြို့ မော်ထုတ်ကြီးကျေးရွာကို ကျရောက်ပေါက်ကွဲခဲ့ခြင်းဖြစ်ကြောင်း၎င်းက ပြောသည်။

၎င်းမော်ထုတ်ကြီးကျေးရွာကိုလွန်ခဲ့သည့်မတ်လ ၂၈ ရက်နေ့ကလည်း လက်နက်ကြီး ကျရောက်ပေါက်ကွဲခဲ့ကြောင်းသိ၇သည်။

အဆိုပါမော်ထုတ်ကြီးကျေးရွာတွင် အိမ်ခြေ ၁၀၀ နီးပါးရှိပြီး လူဦးရေ ၄၀၀ကျော်နေထိုင်ကြောင်း သိ၇သည်။

လက်ရှိတွင်ဒဏ်ရာရရှိသူများကို အရေးပေါ်ဆေးကုသမှုခံယူနိုင်ရန် လုပ်ဆောင်နေကြကြောင်း သိ၇သည်။