ရခိုင်မှ ထွက်ပြေးလာသည့် ရဲတပ်ကြပ်ကြီးတစ်ဦးကို ကျောင်းသားလက်ရုံးတပ်ကဖမ်းဆီးပြီး ရက္ခိုင့်တပ်တော်ထံ အပ်နှံ

လူထက်နိုင်(ဒွာရာမြီ)/ နိရဉ္စရာ၊ ဧပြီ ၅ / ၂၀၂၄

ရက္ခိုင့်တပ်တော် AA တိုက်ခိုက်သိမ်းပိုက်စဉ် ရခိုင်ပြည် မင်းပြားမြို့နယ်၊ အမှတ် (၉) တန်းမြင့် လေ့ကျင့်ရေး သင်တန်းကျောင်းမှ ထွက်ပြေးလာသည့် ရဲတပ်ကြပ်ကြီး ၁ ဦးအား  အရှင်ဖမ်းဆီးရရှိခဲ့ပြီး ၎င်းရဲတပ်ကြပ်အား ရက္ခိုင့်တပ်တော်သို့ အပ်နှံလိုက်ကြောင်း ကျောင်းသားလက်ရုံးတပ် (Student Armed Force) ဧပြီလ ၃ရက် နေ့တွင် ထုတ်ပြန်ထားသည်။

“မင်းပြားမြို့နယ်ရှိ စစ်ကောင်စီ၏အမှတ်(၉) တပ်မတော်တန်းမြင့်လေ့ကျင့်ရေးသင်တန်းကျောင်းကို ရက္ခိုင့်တပ်တော် AA က တိုက်ခိုက်သိမ်းပိုက်မှု အတွင်း ထွက်ပြေးလာသော ရဲတပ်ကြပ်ကြီးမျိုးဇော်( ကိုယ်ပိုင်အမှတ် လ-၂၁၁၀၄၈ ) ကို ကျွန်ုပ်တို့ ကျောင်းသားလက်ရုံးတပ်‌တော် (SAF) မှ မကွေးတိုင်း ဒေသကြီးနဲ့ ရခိုင်ပြည်နယ် နယ်စပ်တစ်နေရာတွင် ပြီးခဲ့သည့်‌ မတ်လအတွင်း လက်ရဖမ်းဆီးရမိခဲ့သည်” ဟု Student Armed Force မှထုတ်ပြန်ထားသည်။

မတ်လအတွင်း မင်းပြားမြို့နယ်ရှိ အကြမ်းဖက် စစ်တပ်၏ အမှတ် ၉ တပ်မတော် တန်းမြင့်လေ့ကျင့်ရေး သင်တန်းကျောင်းကို ရက္ခိုင့် တပ်တော် AA က တိုက်ခိုက်သိမ်းပိုက်မှုအတွင်း ထွက်ပြေးလာသော ရဲတပ်ကြပ်ကြီးမျိုးဇော်ကို ကျောင်းသား လက်ရုံးတပ်‌တော် (SAF) က မကွေးတိုင်းနှင့် ရခိုင်ပြည်နယ် နယ်စပ် တစ်နေရာတွင် အရှင် ဖမ်းဆီးရရှိခဲ့ခြင်းဖြစ်ကြောင်း သိရသည်။

ဖမ်းဆီးရမိသော ရဲတပ်ကြပ်ကြီး မျိုးဇော်သည် စစ်တွေမြို့ ရဲတပ်ရင်း ၃၆ မှ ဖြစ်ပြီး တိုင်းဗဟို ၉ တွင် အကြပ်ကြီး သင်တန်းတက်ရောက်နေခြင်းဖြစ်ကြောင်း သိရှိရသည်။

ကျောင်းသားလက်ရုံးတပ်တော်အနေဖြင့်ဖမ်းဆီးရမိသော ရန်သူသုံ့ပန်းအား ဂျီနီဗာကွန်ဗန်းရှင်းပါ ပြဌာန်းချက်များနှင့်အညီ စနစ်တကျထိန်းသိမ်းခဲ့ပြီး  တော်လှန်ရေးမဟာမိတ်ဖြစ်‌သော ရက္ခိုင့်တပ်တော်ထံသို့ စနစ်တကျအပ်နှံခဲ့ကြောင်း ထုတ်ပြန်ချက်တွင်ပါရှိသည်။

ရခိုင်ပြည်နယ်တွင် ရက္ခိုင့်တပ်တော်၏ထိုးစစ်ဆင်တိုက်ခိုက်မှုကြောင့်စစ်ကောင်စီတပ်သည် အရေးနိမ့်နေပြီး စစ်သားများပြည်တွင်းသို့ထွက်ပြေးလျက်ရှိသကဲ့သို့ ဘင်္ဂလားဒေ့်နိုင်ငံ သို့လည်း ထွက်ပြေးမှု များရှိနေသည်။

အမ်းအခြေစိုက် အနောက်ပိုင်းတိုင်းမှ စစ်ကောင်စီတပ်သားအချို့ ထွက်ပြေးနေကြပြီး ထိုအထဲမှ တပ်သား ၆ ဦးကို မကွေးတိုင်း အခြေစိုက် လူထုတော်လှန်ရေးမဟာမိတ်တပ်/ People's Revolution Alliance (PRA-Magway) တပ်ဖွဲ့က အရှင် ဖမ်းမိခဲ့သည်။

Revolution Alliance (PRA-Magway)တပ်ဖွဲ့မှ  ဧပြီ ၃ ရက်တွင် ထုတ်ပြန်ထားချက်အရ အနောက်ပိုင်းတိုင်း စစ်ဌာနချုပ်မှ ထွက်ပြေးလာသော ခမရ (၃၄၆) လက်အောက်ခံတပ်ဖွဲ့ဝင် (၄) ဦးကို ဧပြီလ (၁) ရက်နေ့ တွင်လည်းကောင်း၊ တတက (၉) မှထွက်ပြေးလာသော ခလရ (၆၃) လက်အောက်ခံ အကြမ်းဖက် စစ်ကောင်စီ တပ်ဖွဲ့ဝင်(၂)ဦးကို မတ်လ၊ (၂) ရက်နေ့တွင်လည်းကောင်း ဖမ်းဆီးရမိကြောင်း ဖော်ပြထားသည်။  

ဓာတ်ပုံ- Student Armed Force