ရခိုင်ပြည် တည်ငြိမ်ရေး ဝင်ရောက်စေ့စပ်ညှိနှိုင်းမည်ဟု ကုလသမဂ္ဂလုံခြုံရေးကောင်စီတွင် တရုတ်ပြောဆို

လူထက်နိုင်(ဒွာရာမြီ)၊ 

နိရဉ္စရာ၊ ဧပြီ ၅ / ၂၀၂၄

 ရခိုင်ပြည် အမြန်ဆုံးတည်ငြိမ်ရေးအတွက် ဝင်ရောက်စေ့စပ်ညှိနှိုင်းပေးမည်ဟု ကုလသမဂ္ဂလုံခြုံရေးကောင်စီတွင် တရုတ်နိုင်ငံက ပြောဆိုလိုက်ကြောင်း တရုတ်အစိုးရပိုင် CGTN သတင်းဌာနက ဧပြီလ ၅ ရက်နေ့ တွင်ဖော်ပြထားသည်။

 ဧပြီလ ၄ ရက်နေ့တွင် ကျင်းပခဲ့သည့် ကုလသမဂ္ဂလုံခြုံရေးကောင်စီ တံခါးဖွင့်အစည်းအဝေးတွင် ရခိုင်ပြည်နယ် ပဋိပက္ခနှင့် ပတ်သက်ပြီး တရုတ်နိုင်ငံ၏ ရပ်တည်ချက် သဘောထားအား ကုလသမဂ္ဂဆိုင်ရာ တရုတ် ဒုတိယ အမြဲတမ်းကိုယ်စားလှယ် Geng Shuang  က ရှင်းလင်းပြောကြားခဲ့ခြင်း ဖြစ်ကြောင်းသိရသည်။

 ကုလသမဂ္ဂ လုံခြုံရေးကောင်စီတွင်  တရုတ်နိုင်ငံ၏ အမြဲတမ်း ကိုယ်စားလှယ် Geng Shuang က မြန်မာနိုင်ငံ ရခိုင်ပြည်နယ်တွင် ဖြစ်ပွားနေသည့် ပဋိပက္ခများနှင့် ပတ်သက်ပြီး တရုတ်နိုင်ငံ၏ ရပ်တည်ချက်ကို အသေးစိတ်ပြောကြားခဲ့ခြင်းဖြစ်သည်ဟု CGTN  သတင်းကဆိုသည်။

“မြန်မာနိုင်ငံနဲ့ ချစ်ကြည်ရင်းနှီးတဲ့ အိမ်နီးချင်းနိုင်ငံအနေနဲ့ တရုတ်နိုင်ငံဟာ ရခိုင်ပြည်တွင်းက ဖြစ်ပေါ်တိုးတက်မှုတွေကို အနီးကပ် စောင့်ကြည့်နေပြီး လမ်းကြောင်းများစွာကတစ်ဆင့် ငြိမ်းချမ်းရေးကို မြှင့်တင်ဖို့ တရုတ်နိုင်ငံက ကြိုးပမ်းနေပါတယ်” ဟု Geng က ပြောကြားခဲ့ကြောင်း CGTN  သတင်းတွင်ဖော်ပြထားသည်။

နိုင်ငံတကာ၏ စိုးရိမ်ပူပန်မှုကို ဖြစ်ပေါ်စေသည့် ပဋိပက္ခသည် မြန်မာ့ပြည်တွင်းရေးကိစ္စအဖြစ် Geng Shuang  က အလေးပေးပြောကြားခဲ့ပြီး ကမ္ဘာ့အသိုက်အဝန်းအနေဖြင့် မြန်မာ့အချုပ်အခြာအာဏာကို လေးစားရန်နှင့် ပါဝင်ပတ်သက်သူများအကြား ဆွေးနွေးညှိနှိုင်းမှု အဆင်ပြေစေရန်လည်း ကမ္ဘာ့အသိုင်းအဝိုင်းအား တိုက်တွန်းခဲ့ကြောင်းသိရသည်။

“မြန်မာနိုင်ငံနဲ့ တရုတ်နိုင်ငံတို့ရဲ့ချစ်ကြည်ရင်းနှီးမှု မူဝါဒဟာ မြန်မာနိုင်ငံရှိ ပြည်သူအားလုံးအတွက် အကျုံးဝင်ပြီး ရခိုင်ပြည်နယ်တွင်း အကျပ်အတည်းကို ငြိမ်းချမ်းစွာ ဖြေရှင်းဖို့ အပြုသဘောဆောင်တဲ့ အခန်းကဏ္ဍတစ်ရပ်ကို ဆက်လက် ပံ့ပိုးကူညီသွားပါ့မယ်”  ဟု Geng Shuang   က အတည်ပြု ပြောကြားခဲ့ကြောင်းသိရသည်။

ထို့အပြင် စေ့စပ်ညှိနှိုင်းရေးအတွက် လတ်တလော တရုတ်ကိုယ်စားလှယ်အဖွဲ့  မြန်မာနိုင်ငံသို့ ရောက်ရှိနေခြင်းသည် ပဋိပက္ခကိုဖြေရှင်းရန် တရုတ်နိုင်ငံ၏ တက်ကြွစွာပါဝင်မှုအား ပြသနေကြောင်းလည်း Geng Shuang မှပြောဆိုခဲ့ကြောင်းသိရသည်။