နိရဉ္စရာ၊ ဧပြီ ၁၀/၂၀၂၄

မောင်တောမြို့နယ်တွင်ဖြစ်ပွားနေသည့် တိုက်ပွဲကြားမှ နတ်မြစ်ကိုလှေဖြင့် ဖြတ်ကူးပြီး ဘင်္ဂလားဒေ့ရှ်နိုင်ငံသို့ ထွက်ပြေးလာကြသည့် အမျိုးသမီးများအပါအဝင်၇ခိုင်လူမျိုး ၁၅ ဦးကို ဘင်္ဂလားဒေ့ရှ် နယ်ခြားစောင့်တပ်ဖွဲ့က ယနေ့ နံနက်က မြန်မာဘက်ကိုပြန်ပို့လိုက်သည်ဟု သတင်းရရှိသည်။

ဒေသအတွင်းလူမှုရေး ဆောင်ရွက်နေသူ ဦးသိန်းမောင်က “ကျွန်တော်ဆီကို ဖုန်းဆက်လာလို့ဘင်္ဂလာနယ်ခြားစောင့်တပ်ဖွဲ့ကို ကျွန်တော် မေတ္တာရပ်ခံပါတယ်။ သူတို့ကို လက်ခံပေးဖို့။ သူတို့ရဲ့ အကြီးအကဲပြောတာက မြန်မာဘက်က ထွက်ပြေးလာတဲ့သူ ဘယ်သူ့ကိုမှ လက်မခံကို အမိန့်ထုတ်ထားလို့လက်ခံလို့ မ၇ဘူးလို့ အကြောင်းပြန်ပါတယ်” ဟု ပြောဆိုသည်။

၎င်း၇ခိုင်လူမျိုး ၁၅ ဦးသည် ဧပြီ ၈ ရက်နေ့ ညအချိန် နတ်မြစ်ကိုလှေဖြင့် ဖြတ်ပြီး ဘင်္ဂလားဒေ့ရှ်နိုင်ငံ မြစ်နားရွာဘက်ကို လာရောက်ကြသူများဖြစ်ကြပြီးဘင်္ဂလားနယ်ခြားစောင့်တပ်က ၎င်းတို့အား တွေ့ရှိထိန်းသိမ်းထားကာ ယနေ့ နံနက်က လှေဖြင့် မြန်မာဘက်သို့ပြန်ပို့လိုက်သည်ဟု သိ၇သည်။

“ ဘင်္ဂလားဒေ့ရှ်ကတော့ရခိုင်ဘက်က လူတွေ ဝင်လာလို့ မရအောင် နယ်စပ်ကို လုံခြုံရေးတင်းကျပ်ပြီး စောင့်ကြည့်မှုတွေလုပ်နေပါတယ်။သူတို့ဆီမှာ ဒုက္ခသည်တွေ ထပ်တိုးလာမှာကိုစိုးရိမ်ပြီး ဘယ်သူ့ကိုမှ ပေးမဝင်ပါဘူး။ ဒါပေမယ့်လည်းရခိုင်လူမျိုးတွေလည်း ကိုယ့်နည်း ကိုယ့်ဟန်နဲ့ ဝင်လာတဲ့သူ တချို့တော့ ရှိပါတယ်။ အများစုကတော့မွတ်ဆလင်တွေ ဝင်ရောက်လာပါတယ်။ မောင်တောမှာ တိုက်ပွဲပြင်းထန်နေတော့ လူတိုင်း စိုးရိမ်ပြီးဒီဘက်ကို ခေတ္တလာခိုကြတဲ့သဘောပါ” ဟု ပြောဆိုသည်။

ရခိုင်ပြည်အနောက်ဘက်နယ်စပ် မောင်တောမြို့နယ် မြောက်ပိုင်းကြိမ်ချောင်း နယ်ခြားစောင့်စခန်းများကို ရက္ခိုင့်တပ်တော်က သိမ်းပိုက်ရန် ဝင်ရောက်တိုက်ခိုက်နေသဖြင့်တိုက်ပွဲများပြင်းထန်နေပြီး အနီးအနားရှိ ကျေးရွာများရှိ ဒေသခံများမှာ ထွက်ပြေးတိမ်းရှောင်နေကြရသည်ဟုသိ၇သည်။

ဓာတ်ပုံ- A𝑟𝑎𝑘𝑎𝑛 𝑂𝑛𝑙𝑖𝑛𝑒 𝐿𝑖𝑏𝑟𝑎𝑟𝑦.(𝐾𝑦𝑎𝑢𝑘𝑇𝑎𝑤)