သဉ္ဇာနွယ်၊ နိရဉ္စရာ၊ဧပြီ ၁၀/ ၂၀၂၄

ရက္ခိုင့်တပ်တော်(AA)မှ ပစ်ခတ်လိုက်သည့်လက်နက်ကြီးကျည် ၃ လုံးသည် ရခိုင်ပြည်၏ အဓိကစစ်ဌာချုပ်တစ်ခုဖြစ်သည့် အမ်းမြို့၊ အနောက်ပိုင်းတိုင်းစစ်ဌာနချုပ်အတွင်းကို  ကျရောက် ပေါက်ကွဲခဲ့သည်ဟု  အမ်းမြို့ခံတစ်ဦးကနိရဉ္စရာသတင်းဌာန ကိုပြောသည်။

ထိုသို့ ကျရောက်ပေါက်ကွဲခဲ့သည်ကို ယမန်နေ့ ဧပြီ ၉ ရက် နေ့ ညနေ ရ နာရီခွဲခန့်က တပ်အနီး မလှမ်မကမ်းကနေ မြင်တွေ့ခဲ့ကြောင်း ၎င်းက ပြောသည်။

“ အမ်းမြို့အနီးတစ်ဝိုက်ကိုတော့စစ်ကောင်စီက နေ့တိုင်း လက်နက်ကြီးကျည်နဲ့ပစ်ခတ်တာ။လေယဉ်နဲ့ဗုံးကြဲတာတွေ ရက္ခိုင့်တပ်တော်နဲ့ ထိတွေ့တိုက်ပွဲဖြစ်တာတွေရှိနေတယ်။ မနေ့က ဆိုရင် အနောက်ပိုင်းတိုင်းစစ်ဌာနချုပ်ကိုလက်နက်ကျည် ၃ လုံးကျတယ်။ ထိခိုက်ပျက်စီးမှုတော့မသိရဘူး။ရက္ခိုင့်တပ်တော်ဖက်က ဒီလိုမျိုးပစ်တယ်ဆိုတာက အမ်းမှာတိုက်ပွဲအရှိန်မြင့်လာတယ်လို့ ပြောလို့ရတယ်”ဟုပြောသည်။

ယင်းနောက်ပိုင်းတွင်အနောက်ပိုင်းတိုင်းစစ်ဌာနချုပ်မှ အရာရှိအဆင့် စစ်ဗိုလ်များအပါအဝင်တပ်ဖွဲ့ဝင် တချို့သည်လည်း ကိုယ့်နည်းကိုယ့်ဟန်ဖြင့်ထွက်ပြေးနေမှုများရှိနေသည်ဟု စစ်ရေး သတင်းရင်းမြစ် တချို့ကပြောသည်။

“ အခုဆိုရင် ထွက်ပြေးနေကြတဲ့အထဲမှာအရာရှိအဆင့်တွေပါတယ်။ သူတို့က ရက္ခိုင့်တပ်တော် ဘက်ကို ဆက်သွယ်ဖို့ အခက်ခဲရှိကြလို့ ကိုယ့်နည်းကိုယ့်ဟန်နဲ့ထွက်ပြေးနေကြတဲ့စစ်သားတွေ အများကြီးရှိနေတယ်။အမ်းမှာ စစ်ကောင်စီတွေက စိတ်ပိုင်းဆိုင်ရာအရ ပျက်စီး ထိခိုက်မှုတွေ ရှိနေကြတယ်။ နပခအထိ စစ်ရေးအရပြင်းထန်လာတော့ သူတို့အတွက် မလုံခြုံတော့ဘူးလေ။  အမ်းမြို့အဝင်အထွက်က ပိတ်ထားတာလေ”ဟုပြောသည်။

အဆိုပါကိစ္စနှင့်ပတ်သက်၍ နိရဉ္စရာအနေနှင့်  သီးခြားအတည်ပြုနိုင်ရန် ကြိုးစားနေပြီးလတ်တလောတွင် နှစ်ဖက်ပြောရေးဆိုခွင့်ရှိသူများအား ဆက်သွယ်နေဆဲဖြစ်သည်။

၎င်းအပြင် ဧပြီလ၉ ရက်နေ့ကလည်း အကြမ်းဖက်စစ်ကောင်စီတပ် (၃၇၃) တပ်ရင်းမှ ပစ်ခတ်လိုက်သည့်လက်နက်ကြီးကျည်ကျရောက်ပေါက်ကွဲပြီး  အမ်းမြို့နယ်၊ ကြောင်ဖြူကွင်းကျေးရွာမှမောင်ဆန်းလင်းထွန်း (၁၀) နှစ် မှာ သေဆုံးခဲ့သည်။

အမ်းတွင် ယနေ့ဧပြီ ၁၀ရက်နေ့ နံနက် ၁၀ နာရီ အထိ  အမြောက်တပ်၊ ခမ၇ (၃၇၃)၊ တမိုင်ကုန်း အပြင်အမ်းမြို့အခြေစိုက်တပ်ရင်းများမှ   ကြောင်ဖြူကွင်းရွာ၊ နတ်တောင်နှင့်အနီးတဝိုက်ကျေးရွာများဖက်သို့ လက်နက်ကြီးပစ်ခတ်မှုများဆက်တိုက်ပြုလုပ်နေသည်ဟု အမ်းဒေသခံများကပြောသည်။ ( Photo- MPA)