ကျောက်ဖြူမှ လူငယ် ၄ ဦးကို ကင်းပုန်းဝပ်နေသော စစ်ကောင်စီတပ်သားများကဖမ်းဆီးသွား

သဉ္ဇာနွယ်/နိရဉ္စရာ၊ဧပြီ ၁၂/၂၀၂၄

ရခိုင်ပြည်၊ ကျောက်ဖြူမြို့နယ်မှ လူငယ် ၄ ဦးကို ကင်းပုန်းဝပ်နေသော စစ်ကောင်စီ တပ်သားများမှ ဖမ်းဆီးသွားကြောင်း သတင်းရရှိသည်။

ဖမ်းဆီးခံရသူများမှာ ကုလဘာတောင်ရွာမှ ကိုနေတိုး (၂၀) နှစ်၊ ကိုဇင်မြင့်ထွန်း (၂၀)နှစ်၊ ကိုတင်မောင်နိုင် (၂၂)နှစ်နှင့် ကိုချမ်းမြင့်ဇော် (၂၄)နှစ်တို့ ဖြစ်ကြသည်။

၎င်းတို့ ၄ ဦးသည် ယမန်နေ့ ဧပြီ ၁၁ရက် မွန်းလွဲ ၂နာရီခန့်က ‌ဆိုင်ကယ် (၂)စီးဖြင့် ပြန်လာစဉ် စည်မော်ရွာအဝင်ဝ လမ်းဆုံတွင် ကင်းပုန်းဝပ်နေသော စစ်ကောင်စီတပ်သားများမှ ဖမ်းဆီးသွားခြင်း ဖြစ်သည်ဟု ကျောက်ဖြူဒေသခံတစ်ဦးက နိရဉ္စရာ သတင်းဌာန ကိုပြောသည်။

" လူငယ်တွေကို ဖမ်းတာက  ဓညဝတီရေတပ်ဌာနချုပ်က စည်မော်ရွာကို မရောက်ခင် လမ်းဆုံမှာ ကင်းပုန်းဝပ်နေတဲ့ စစ်သားတွေက ဖမ်းသွားတာပါ။ အဲဒီရွာအနီးအနားမှာ စစ်သားတွေ ကင်းပုန်းဝပ်နေတာ လေးငါးရက်လောက်ရှိပြီ" ဟုပြောသည်။

၎င်းတို့သည် သစ်ပုတ်တောင်တိုက်နယ်၊ စိုင်ခြုံဒွိန်ရွာမှ ၎င်းတို့နေရပ် ကုလာလာတောင် ကျေးရွာသို့ ပြန်လာစဉ် စစ်ကောင်စီတပ်မှ ဖမ်းဆီးသွားခြင်းဖြစ်ကြောင်း၊ လက်ရှိ ၎င်းတို့အား  ဓညဝတီ ရေတပ်ဌာနချုပ်တွင် ချုပ်နှောင်ထားသည်ဟု စည်မော်ရွာသားတစ်ဦးက နိရဉ္စရာကိုပြောသည်။

" ဟိုတနေ့ကလည်း ရွာက အမျိုးသားတစ်ယောက်ကိုဖမ်းသွားသေးတယ်။ ဓညဝတီ ရေတပ် ဌာနချုပ်ကိုပဲ ခေါ်သွားတယ်။ ရေတပ်ဌာနချုပ်က  ရွာနဲ့ မနီးမဝေးမှာ တည်ရှိပါတယ်။ ကျနော်တို့လည်း စစ်သားတွေဆီမှာ အကြောင်းမရှိ အကြောင်းရှာပြီး ဖမ်းခံရမှာကြောက်တယ်”ဟု ပြောသည်။

ပြီးခဲ့သည့် ဧပြီ ‌၆ ရက်နေ့ကလည်း စစ်ဘေးရှောင်၍ ပြန်လာသည့် စည်မော်ရွာမှ  ဦးဝေတင်အောင်ကို ဓညဝတီရေတပ်ဌာနချုပ်မှ  စစ်ကောင်စီ စစ်သားများသည် ရွာထဲသို့ဝင်ရောက်ကာ ဖမ်းဆီးသွားခဲ့သည်ဟု သိရသည်။