ခိုင်လူလှ (ရိုးမမြေ)/ နိရဉ္စရာ၊ဧပြီ၁၅/၂၀၂၄

ဘင်္ဂလားဒေ့ရှ် နိုင်ငံအတွင်းသို့ နောက်ထပ် မြန်မာဘက်က နယ်ခြားစောင့် ၅ဦး လက်နက်များနှင့်အတူ ထပ်မံ ထွက်ပြေး ခိုလှုံလာသဖြင့် ယခုရက်ပိုင်းအတွင်း ခိုလုံလာသူ ၁၄ ဦးရှိသွားပြီဟုThe Financial Express က သတင်းဖော်ပြသည်။

၎င်းတို့သည် ၅ဦးသည် တနင်္ဂနွေ ည  ၁၁နာရီ ၃၀ မိနစ်တွင် တက်ကနက်ကမြို့နယ် ဝါးခွပ်ချောင်းတိုက်နယ်၊ ခြံချောင်း (ခရမ်းခါလီ) နယ်စပ်မှ တစ်ဆင့် နတ်မြစ်ကို လှေဖြင့် ဖြတ်ကျော်ကာ ဝင်ရောက်ခိုလှုံလာကြသည်ဟု တက်ကနက် နယ်ခြားစောင့်တပ် (BGB) တပ်ရင်းမှူး ဗိုလ်မှူးကြီး Mohiuddin Ahmed ကပြောသည်။

နယ်ခြားစောင့်တပ်ဖွဲ့ဝင် ၃ဦးသည် ခရမ်းခါလီ(ခြံချောင်း)နယ်စပ်မှ၎င်း၊နောက်ထပ် ၆ ဦးသည် ဂျီမောင်ခါလီ နယ်စပ်မှ၎င်း တနင်္ဂနွေနေ့ အစောပိုင်းတွင် ဝင်ရောက်လာကြပြီး  ယခုဝင်ရောက်လာသူ ၅ ဦးနှင့်ဆိုလျှင် မြန်မာဘက်က ဝင်ရောက်ခိုလှုံလာသူ နယ်ခြားစောင့်တပ်ဖွဲ့ဝင် ၁၄ ဦး အထိရှိသွားပြီဟုဆိုသည်။

လက်ရှိတွင် မတ်လအတွင်းက ဘင်္ဂလားဒေ့ရှ်နိုင်ငံအတွင်းသို့လက်နက်များဖြင့် ဝင်ရောက်ခိုလှုံလာသူ မြန်မာတပ်ဖွဲ့ဝင် ၂၀၀ ခန့်ရှိပြီး ၎င်းတို့အားယခုအချိန်ထိ မြန်မာနိုင်ငံအတွင်းသို့ ပြန်မပို့နိုင်သေးကြောင်း သိ၇သည်။

၂၀၂၄ ခုနှစ် ဖေဖော်ဝါရီလ စောစောပိုင်းက ထွက်ပြေး ဝင်ရောက်ခိုလှုံလာသည့်နယ်ခြားစောင့်တပ်ဖွဲ့ဝင် ၃၃၀ ကိုမူ ဖေဖော်ဝါရီ ၁၅ ရက်နေ့ ရေလမ်းမှတစ်ဆင့် ပြန်ပို့ခဲ့သည်။

လက်ရှိ မောင်တောမြို့နယ်တွင် အာရက္ခတပ်တော်နှင့် အကြမ်းစစ်ကောင်စီတို့အကြားတိုက်ပွဲများ ပြင်းထန်စွာဖြစ်ပွားနေပြီး ယခုရက်ပိုင်းအတွင်း ကြိမ်ချောင်းနယ်ခြားစောင့်စခန်း၊ခမောင်းဆိပ် နယ်ခြားစောင့် စခန်းနှင့် ငခူရ နယ်ခြားစောင့်စခန်းများကို အာရက္ခတပ်တော်(ရက္ခိုင့်တပ်တော်)က သိမ်းပိုက်လိုက်ပြီဟု သိ၇သည်။

စစ်ကောင်စီတပ်ဖွဲ့ဝင်များသည် အာရက္ခစစ်သည်များ၏ ထိုးစစ်အောက်တွက်စခန်းများကို တစ်ခုပြီး တစ်ခု စွန့်ခွာကာ ကစင့်ကလျားထွက်ပြေးနေကြသည်ဟုလည်း ဒေသအတွင်းမှရရှိသော သတင်းများအရ သိ၇သည်။

(ပုံစာ- နယ်ခြားစောင့်များ ဖြတ်ကျော်ဝင်ရောက်လာသည့် နတ်မြစ်အားတွေ့၇စဉ်/ The financial Express )