(စစ်ကောင်စီက လေကြောင်းဖြင့် အပြင်းအထန်ဗုံးကြဲတိုက်ခိုက်)

သဉ္ဇာနွယ်/ နိရဉ္စရာ၊ဧပြီ ၁၇ / ၂၀၂၄

အာရက္ခတပ်တော်(AA)မှ ထိုးစစ်ဆင်တိုက်ခိုက်နေသည့် အမ်းမြို့နယ်၊ ကဇုကိုင်းရှိ တောဟိန်းတောင် ဗျူဟာကုန်း တိုက်ပွဲမှာပြင်းထန်နေပြီး စစ်ကောင်စီက ၎င်းစခန်းမကျစေရန်အတွက်  လေကြောင်းကနေ အပြင်းအထန် ခုခံကာကွယ်တိုက်ခိုက်နေသည်ဟု သတင်းရရှိသည်။

 အမ်းဒေသခံတစ်ဦးက " သင်္ကြန်ကာလအတွင်းမှာအမ်းမှာတစ်နေ့ထက်တစ်နေ့ပိုပြင်းလာတယ်။ ဒီနေ့ဆိုရင်မနေ့ကထက်ပြင်းတယ်ပြောလို့၇တယ်။ မကွေးဖက်ကလေယာဉ်တွေမကဘူး တံတားဦးဖက်ကလေယာဉ်တွေပါ လာရောက်ပစ်ခတ်တာ။ အရင်ကဆို မကွေးတစ်ခုထဲက လာပစ်တာ။ သူတို့တောဟိန်းတောင်ဗျူဟာကုန်းကျသွားရင် အမ်းမြို့က စစ်ကောင်စီတပ် ကို အာရက္ခတပ်တော်ကအလွယ်တကူ ဝင်ရောက်တိုက်ခိုက်နိုင်မှာ စိုးပြီး စစ်ကောင်စီဖက်ကအသည်းအသန် ခုခံကာကွယ်နေတာ" ဟု  နိရဉ္စရာသတင်းဌာန ကိုပြောသည်။

တိုက်ပွဲမှာ ယမန်နေ့ဧပြီ ၁၆  ရက် ညနေကတည်းက ပြင်းထန်နေပြီး ယနေ့ ဧပြီ ၁၇ ရက်နေ့နံနက်ပိုင်းက သိမ်းပိုက်ရရှိထားပြီဟု သတင်းများထွက်ပေါ်နေကြောင်း အမည်မဖော်လိုသည့် နောက်ထပ် အမ်းဒေသခံတစ်ဦးကနိရဉ္စရာ သတင်းဌာနကို ပြောသည်။

" မနေ့ကတည်းကတောဟိန်းတောင်ဗျူဟာကုန်းကို တပ်တော်က ပြတ်လုနီးပါးအထိရခဲ့တယ်။ပြတ်လည်းပြတ်နေပြီလို့ပြောလို့၇တယ်" ဟုပြောသည်။

ယနေ့ဧပြီ ၁၇ ရက်နေ့နံနက်ပိုင်းမှစ၍ နေ့လယ် ၂နာရီအထိ အမ်းအခြေစိုက် တပ်ရင်း (၄)ခုမှ လက်နက်ကြီးများဖြင့် တောဟိန်းတောင် ဗျူဟာကုန်းနှင့်ဒါးလက်ရွာဖက်ကို  ပစ်ခတ်မှုရှိခဲ့သလို  မကွေးတိုင်း ဒေသကြီးနှင့် မန္တလေးတိုင်းဒေသကြီးတံတားဦးလေတပ်မှလည်း ဂျက်ဖိုက်တာများဖြင့် ဗုံးကြဲ တိုက်ခိုက်လျက်ရှိသည်ဟု  ပြောဆိုသည်။

ယမန်နေ့ ဧပြီလ၁၆ ရက်နေ့ တွင်လည်း အမ်းမြို့နယ် ငပြည်ကျေးရွာတွင်လည်း  နံနက် ၁၀ နာရီ ကနေ  စစ်ကောင်စီစစ်ကြောင်းနှင့်အာရက္ခတပ်တော်တို့မှာတိုက်ပွဲပြင်းထန်လျက်ရှိပြီး အမ်းအခြေစိုက် ခမ၇(၃၇၁)တပ်နှင့် BE တပ်ရင်းရှေ့က လက်နက်ကြီးတပ်ဆင်ထားသည့်စစ်ကောင်စီ၏ တပ်ရင်းဖက်မှ အမ်းရိုးမဖက်သို့ လက်နက်ကြီးများဖြင့်ပစ်ခတ်လျက်ရှိသည်ဟု အမ်းဒေသခံတစ်ဦးက နိရဉ္စရာ သတင်းဌာန ကိုပြောသည်။

" အမ်း-ပဒါန်းလမ်းပိတ်ပြီးတဲ့ နောက်မှာ ဆိုရင် စစ်ကောင်စီ ဖက်ကစစ်ကြောင်း ထိုးလာတာ တွေအများကြီးရှိတယ်။ ငပြည်ရွာဖက်မှာ အမ်း (နပခ)ကနေပြီးစစ်ကြောင်းထိုးတာတွေရှိတယ်။ အဲ့ဒီစစ်ကြောင်းတွေနဲ့ ဒီနေ့ တိုက်ပွဲဖြစ်နေတယ်။ ပဒါန်းဖက်ကလည်းစစ်ကောင်စီစစ်ကြောင်းထိုး အင်အားဖြည့်တာတွေရှိတယ်။ ဒီနေ့ဆိုရင်တောက်လျှောက် ခမ၇(၃၇၁)နဲ့ BE တပ်ရှေ့က လက်နက်ကြီးတပ်ဖက်ကလက်နက်ကျည်ပစ်ခတ်တာတွေပြုလုပ်နေတယ်။ ရပ်လိုက်တန့်လိုက်လက်ရှိညနေ ၅ နာရီထိ " ဟုပြောသည်။

အမ်းမြို့နယ်၊ရိုးမပေါ်ရှိ ပိန်းရေစမ်းကျေးရွာတွင်လည်းပြီးခဲ့သည့်   ဧပြီ၁၅ ရက် နေ့လယ် ၂ နာရီခန့်ကနေညနေ၁၀နာရီထိတိုက်ပွဲပြင်းထန်ခဲ့သည်ဟု အမ်းမြို့ဒေသခံများက ပြောသည်။

ယင်းအပြင် အမ်းကဇုကိုင်းတောင်တန်းဖက်တွင်ယမန်နေ့ ဧပြီ ၁၅ ရက် နေ့ တစ်ရက်ထဲမှာ စစ်ကောင်စီဖက်မှဂျက်ဖိုက်တာများဖြင့်ဗုံးကြဲ တိုက်ခိုက်ခဲ့ပြီး စစ်ကောင်စီ တမိုင်ကုန်းတပ်ရင်းမှလက်နက်ကြီးကျည်များဖြင့် ည နေ ၁၀ နာရီအထိ ပစ်ခတ်ခဲ့သဖြင့်စမ်းချောင်းကျေးရွာအနီးသို့ လက်နက်ကြီးကျည်တချို့ ကျရောက်ပေါက်ကွဲခဲ့ကြောင်းအမ်းဒေသခံများက ပြောသည်။

ပြီးခဲ့သည့် ဧပြီလ(၁၁) ရက် နေ့ကလည်း အမ်းမြို့နယ်၊ မင်းဘော်ရွာ၏ တောင်ဘက် မီတာ (၁၀၀၀) ခန့်အကွာတွင်အကြမ်းဖက်စစ်ကောင်စီတပ်နှင့် အာရက္ခတပ်တော်တို့ စတင်ထိတွေ့ တိုက်ပွဲ ဖြစ်ပွားခဲ့သည်ဟု အာရက္ခတပ်တော်မှ သတင်းထုတ်ပြန်ထားသည်။

ယင်းနေ့တွင်ကြိုကြားကြိုကြားတိုက်ပွဲများနှင့်အတူ ညနေ (၄) နာရီအထိနှစ်ဖက်အပြန်အလှန် ပစ်ခတ်တိုက်ခိုက်ခဲ့ကြသည်။ တိုက်ပွဲအတွင်းရန်သူ့ဘက်မှ မျက်မြင် (၅) ဦး သေဆုံးကာ (၁၀) ဦးခန့်ဒဏ်ရာရရှိခဲ့သည်ဟုထုတ်ပြန်ချက်အရသိ၇သည်။

အမ်းမြို့နယ်၊ ကဇုကိုင်းအနီးရှိမြေပုံမြို့နယ်၊ စညှင်းကျေးရွာအရှေ့ဘက်ရှိ စစ်ကောင်စီ ပွိုင့်(၂၅၇)စခန်းကို တိုက်ခိုက်နေကြောင်း AA ကထုတ်ပြန်ထားသည်။

အမ်းမြို့သည် ပြည်မနှင့် ၇ခိုင်ကို ဆက်သွယ်ထားသည့်ဝင်ပေါက် ထွက်ပေါက်ရှိရာ မြို့ဖြစ်သည်သာမက စစ်ရေးအရအရေးပါသော မြို့တမြို့ဖြစ်သည်။ အမ်းသည်ခရီးသွားလာရေးနှင့် ကုန်သွယ်ရေးပြုလုပ်နေသည့် အဓိကအချက်အချာကျသည့်မြို့တမြို့လည်းဖြစ်သည်။

အမ်းမြို့နှင့် နယ်ကျေးရွာများအကြား ကုန်းလမ်းရေလမ်း ဆက်သွယ်ရေးကိုစစ်ကောင်စီမှ ပိတ်ဆို့ထားသည့်အတွက်မြို့ပေါ်ဒေသခံများမှာ  စားနပ်ရိက္ခာပြတ်လပ်နေပြီး အကူအညီများ လိုအပ်နေကြောင်း မြို့ပေါ်ဒေသခံများက ပြောသည်။