နိရဉ္စရာ၊ ဧပြီ ၁၇/၂၀၂၄ (ဘာသာပြန်သတင်း)
ရခိုင်ပြည်နယ်၊ ဘူးသီးတောင်ဒေသတွင် အစ္စလာမ်မစ် အကြမ်းဖက်အုပ်စုများက ဟိန္ဒူဘာသာဝင် ၁၆၀၀ ကျော် နှင့် ဗုဒ္ဓဘာသာဝင် ၁၂၀ ကျော်တို့ကို ဓါးစာခံများအဖြစ် ဖမ်းဆီးထိန်းသိမ်းထားသည်ဟု အိန္ဒိယ အိတ်စ်ပရက်သတင်းဌာနက ဖော်ပြလိုက်သည်။
ယခုကဲ့သို့ အစ္စလာမ်အကြမ်းဖက်အုပ်စုများက ဟိန္ဒူဘာသာဝင်များအား ဓါးစာခံအဖြစ် ဖမ်းဆီးထားခြင်းမှာ ၂၀၁၇ ခုနှစ်က ဖြစ်ပွါးခဲ့သော မွတ်ဆလင်အဓိကရုဏ်း တစ်ကျော့ပြန်ဖြစ်လာခြင်းဖြစ်သည်ဟု ဖော်ပြထားသည်။
“ ဘူးသီးတောင်မှာ တစ်နေ့တခြား အခြေအနေမတည်ငြိမ်မှုနဲ့ မငြိမ်မသက်မှုတွေ တိုးပွါးလာနေတာနဲ့အမျှ မြန်မာစစ်တပ်ရဲ့လမ်းညွှန်မှုအောက်က အစ္စလာမ်အကြမ်းဖက်အုပ်စုတွေဟာ ဘာသာရေးအခြေခံ လူမျိုးစုတွေအပေါ် အကြမ်းဖက် တိုက်ခိုက် သတ်ဖြတ်မှုတွေ ထိန်းမနိုင်သိမ်းမရ လုပ်ဆောင်လာနေတာတွေ့ရတယ်။ ဟိန္ဒူလူမျိုး ၁၆၀၀ ကျော်နဲ့ ဗုဒ္ဓဘာသာဝင် ၁၂၀ ကျော် အဲဒီမှာ ဓါးစာခံတွေ ဖြစ်နေပါတယ်” ဟု သတင်းရင်းမြစ်တစ်ခုက ပြောဆိုခဲ့သည်။
အဆိုပါ ဓါးစာခံများ အသက်ရှင်ရန် နှင့် ပြန်လည်လွတ်မြောက်ရန်မှာ မသေမချာ မရေမရာဖြစ်နေသည်ဟု အိန္ဒိယ အိတ်စပရက်စ်က ဖော်ပြသည်။
လူမျိုးရေးနှင့် ဘာသာရေး အဓိကရုဏ်းကြောင့် ဒေသခံများ အသက်လု၍ ထွက်ပြေးခဲ့ရပြီး ကံအကြောင်းမလှသူ လူငယ် နှစ်ဦးမှာ ဧပြီ ၁၁ ရက်နေ့က လည်ပင်လှီး သတ်ဖြတ်ခံခဲ့ရသည်။
ယခုဖြစ်ရပ်မှာ ရက္ခိုင့်တပ်တော် (AA) နှင့် မြန်မာစစ်တပ်တို့ ၂၀၂၃ နိုဝင်ဘာလတွင် တိုက်ပွဲများ စတင်ဖြစ်ပွါးခဲ့ပြီးနောက်ပိုင်း ထိုဒေသတွင် ပထမဦးဆုံး ပေါ်ပေါက်သည့် ဖြစ်ရပ်ဖြစ်သည်။
“ မြန်မာစစ်တပ်ဟာ ARSA နဲ့ ARA မွတ်ဆလင်အကြမ်းဖက်အဖွဲ့တွေကို ရခိုင့်တပ်တော်(AA)ကို တိုက်ခိုက်ဖို့ အခြေခံစစ်သင်တန်းတွေ ပေးခဲ့တယ်” ဟု အဆိုပါ သတင်းရင်းမြစ်က ဆိုသည်။
မွတ်ဆလင်အကြမ်းဖက်အုပ်စုများသည် ဖမ်းဆီးထားသည့် ဓါးစာခံများ၏ နေအိမ်များကို ဖောက်ထွင်းလုယက်ကြပြီး အိမ်များကို မီးရှို့ဖျက်ဆီးခဲ့သည်ဟု ဆိုသည်။
ရခိုင့်တပ်တော်(AA)နှင့် တော်လှန်ရေးအုပ်စုများက အစ္စလာမ်ဘာသာရေးအဖွဲ့များကို လက်ရှိတိုက်ခိုက်မှုများကတစ်ဆင့် ဘာသာရေးကွဲပြားမှု သားကောင်အဖြစ်သို့ ရောက်ရှိမသွားရန် မေတ္တာရပ်ခံထားသည်။
ယခုဖြစ်ရပ်သည် ၂၀၁၇ ခုနှစ်က ရခိုင်ပြည်နယ်တွင် မွတ်ဆလင်အကြမ်းဖက်သမားများက အမျိုးသမီးနှင့် ကလေးများအပါအဝင် ဟိန္ဒူလူမျိုး ၁၀၀ နီးပါးကို သတ်ဖြတ်ခဲ့သည့် ဖြစ်စဉ်ကို အမှတ်ရစေသည်။