အောင်ကြွယ်ငြိမ်း၊နိရဉ္စရာဧပြီ ၂၀/ ၂၀၂၄

ရခိုင်ပြည်၊စစ်တွေမြို့တွင် စစ်ကောင်စီက မွတ်ဆလင်များအား ငွေပေးပြီး အာရက္ခတပ်တော် (AA)  အလိုမရှိကြောင်းအတင်းအဓမ္မ ဆန္ဒပြခိုင်းသည်ဟု သိ၇သည်။

 ယနေ့ဧပြီလ၂၀ရက်၊ နံနက် ၉နာရီခွဲအချိန်က စစ်တွေမြို့၊ ဘုမေမွတ်ဆလင်ကျေးရွာမှစတင်ကာစစ်တွေမြို့အနှံ့ကို မွတ်ဆလင်လူဦးရေ ၁၀၀၀ ခန့်က "ရခိုင်မြေ၌ AAအလိုမရှိ" ဆိုသည့်ဆိုင်းဘိုးများကိုင်ဆောင်ပြီးဆန္ဒပြနေခြင်းဖြစ်သည်ဟု သိ၇သည်။

စစ်ကောင်စီကအတင်းဖိအားပေးဆန္ဒပြခိုင်း၍ ထွက်ပြေးရှောင်တိမ်းနေသည့် မွတ်ဆလင် လူငယ်တစ်ဦးက "ကျွန်တော်တို့ကိုမြန်မာစစ်တပ်က ဖိအားပေးပြီး အတင်းအဓမ္မ ဆန္ဒပြခိုင်းနေတာပါ။ သူတို့ ခိုင်းတာမလုပ်ရင် ၂၀၁၂ ခုနှစ်ကလိုလူမျိုးရေ အဓိကရုဏ်းဖြစ်အောင် ဖန်တီးလုပ်ပေးမယ်။ AAကို ထောက်ခံအားပေးနေတဲ့ ရွာတွေအဖြစ်သတ်မှတ်မယ်လို့ ခြိမ်းခြောက်ပါတယ်။ သူတို့ ခိုင်းတာ မလုပ်ရင် အရေးယူမယ်ဆိုလို့ကြောက်ပြီးတော့ တချို့မွတ်ဆလင်တွေက အခု ဘုမေရွာကနေ စပြီး စစ်တွေမြို့အနှံ့ ဆန္ဒပြနေကြတယ်။လမ်းတိုင်းကြောင်းတိုင်းမှာလည်း မြန်မာစစ်တပ်က လက်နက် အပြည့်အစုံနဲ့ နေရာယူထားပါတယ်" ဟု ပြောသည်။

စစ်ကောင်စီကအတင်းဖိအားပေးစေခိုင်းသည့်အတိုင်း AAအလိုမရှိကြောင်းဆန္ဒပြသူ မွတ်ဆလင်များကို တစ်ဦးလျှင် ငွေကျပ်၂သိန်း၊ ၃သိန်း၊ ၄သိန်းကျပ်အထိပေးဆောင်မည်ဟု မက်လုံးပေးထားပြီးဆန္ဒပြရာ၌မပါဝင်သူများကို သေနတ်ဖြင့်ပစ်သတ်ကာ ပြင်းထန်းစွာ အရေးယူသွားမည်ဟုစစ်ကောင်စီကခြိမ်းခြောက်ထားသည်။

 စစ်တွေမြို့တွင်ရခိုင်ပြည်နယ်ဝန်ကြီးချုပ်က စစ်တွေမြို့ရှိမွတ်ဆလင်ကျေးရွာအုပ်ချုပ်ရေးမှူးများနှင့် ခေါင်းဆောင်များကို ပြီးခဲ့သည့်ဧပြီလ၆ရက်နေ့က ရခိုင်ပြည်နယ်အစိုးရအဖွဲ့ရုံးသို့ခေါ်ဆောင်ကာ ဧပြီလ ၂၀ရက်နေ့၌ AAအလိုမရှိကြောင်းဆန္ဒပြရန်အတင်းအဓမ္မဖိအားပေးစေခိုင်းခဲ့သည်ဟု မွတ်ဆလင် အသိုင်းအဝိုင်းမှ သိ၇သည်။

ထိုသို့ဆန္ဒပြရာ၌လည်းစစ်တွေမြို့၊ အောင်မင်္ဂလာရပ်ကွက်၊ မကျည်းမြိုင်ရပ်ကွက်၊ ကသည်းရပ်ကွက်၊ဘုမေရပ်ကွက်နှင့် မြို့အနီး မွတ်ဆလင်ကျေးရွာများ အသက် ၁၈နှစ်အထက်မွတ်ဆလင်လူဦးရေ ၁၀၀၀ ကျော်ခန့်အထိပါဝင်ရမည်ဟု ခြိမ်းခြောက်ထားသည်ဟုလည်း သိ၇သည်။

 စစ်ကောင်စီ၏ ဗဟိုအုပ်ချုပ်ရေးအဆင့်ပြောခွင့်ရ ဗိုလ်ချုပ်ဇော်မင်းထွန်းက ရခိုင်ပြည်အတွင်း ရခိုင်နှင့်မွတ်ဆလင်လူမျိုးရေး၊ ဘာသာရေး ပဋိပက္ခဖြစ်ပွားစေရန် ပုံဖော်ဖန်တီးခြင်း မရှိဟုပြောဆိုထားသော်လည်း မြေပြင်တွင် စစ်ကောင်စီ အုပ်ချုပ်ရေးအဖွဲ့များက လူမျိုးရေး အဓိကရုဏ်း ဖြစ်အောင် ဖန်တီးနေနေသည်ဟု မွတ်ဆလင်အရပ်လူကြီးတစ်ဦးကပြောသည်။

 "စစ်ကောင်စီကကျွန်တော်တို့မွတ်ဆလင်နဲ့ရခိုင်တွေ သဟဇာတဖြစ်နေကြတာကို ရည်ရွယ်ချက်ရှိရှိလူမျိုးရေပဋိပက္ခတွေဖြစ်အောင် တမင်ဖန်တီးနေတာ။ ဒါကိုကျွန်တော်တို့ မွတ်ဆလင် အသိုင်းအဝိုင်းကရော ရခိုင်လူမျိုးတွေကပါသိဖို့လိုအပ်တယ်။ စစ်ကောင်စီရဲ့ အဲ့ဒီလိုလုပ်ရပ်တွေကို ကျွန်တော်တို့ဘယ်လိုကျော်လွှားသွားကြမလဲ။ အဓိကတော့ ရခိုင်မှာ အရှုံးနဲ့ရင်ဆိုင်နေရတဲ့စစ်ကောင်စီက လူမျိုးရေအဓိကရုဏ်းတွေဖြစ်အောင် တမင်ဖန်းတီးနေတာ။ ဒါကိုကျွန်တော်တို့မွတ်ဆလင်အသိုင်းအဝိုင်းကပါ သိဖို့လိုအပ်တယ်။ ဘာပဲဖြစ်ဖြစ် ကျွန်တော်တို့ မွတ်ဆလင် တွေကတော့ ရခိုင်မြေမှာရခိုင်လူမျိုးတွေနဲ့အတူ တစ်သားတည်းရှိမယ်။ အသက်ဘေးကို ကြောက်နေရလို့သာသူတို့(စကစ)ခိုင်းတဲ့အတိုင်း မလုပ်ချင်ဘဲ လုပ်နေကြရုံပါ" ဟုပြောသည်။

ယင်းအပြင်တိုက်ပွဲဖြစ်ပွားမည်ကိုစိုးရိမ်၍ ဘေးလွတ်ရာကို ရှောင်တိမ်းနေကြသည့်ဘူးသီးတောင်မြို့တွင်လည်း စစ်ကောင်စီက လူမျိုးရေးအဓိကရုဏ်းဖြစ်အောင်ဘူးသီးတောင်မြို့ပေါ်ရှိ ရခိုင်လူနေအိမ်များကို မွတ်ဆလင်များအားအတင်းအဓမ္မဖိအားပေးကာ မီးရှို့ဖျက်စီးစေခဲ့သည်။

ရခိုင်ပြည်၊ဘူးသီးတောင်မြို့နယ်တွင်လည်း နေထိုင်ကြသော မွတ်ဆလင်များသည် ရက္ခိုင့်တပ်တော်(AA)အလိုမ ရှိကြောင်း၂၀၂၄ ခုနှစ်၊ မတ်လ ၁၉ ရက်နေ့က ဆန္ဒပြကန့်ကွက်ခဲ့သည်။ အလားတူ ပြီးခဲ့သည့်မတ်လ ၂၁ရက်နှင့် ၂၂ရက်နေ့ကလည်း စစ်တွေမြို့တွင် မွတ်ဆလင်များက AA ကို အလိုမရှိကြောင်းဆန္ဒပြခဲ့သည်။