- Web Master
- ၂၉ မတ် ၂၀၂၄
(စစ်ကောင်စီက လေယာဥ်ဖြင့်ဗုံးကြဲတိုက်ခိုက်)
စိုးစံအောင် ၊ နိရဉ္စရာ ၊ ဧပြီ ၂၂ / ၂၀၂၄
ရခိုင်ပြည်၊ သံတွဲမြို့နယ်၊ သူဌေးရေအားလျှပ်စစ်စီမံကိန်းနှင့် တစ်မိုင်ခန့်အကွာတွင် အာရက္ခတပ်တော်(AA) နှင့် စစ်ကောင်စီတပ်တို့ ယနေ့ နေ့လယ်ပိုင်းကစတင်ပြီး တိုက်ပွဲဖြစ်ပွားနေကာ စစ်ကောင်စီတပ်ကလေယာဥ်နှင့်ဗုံးကြဲတိုက်ခိုက်နေကြောင်း ဒေသခံများကပြောသည်။
လက်ရှိတိုက်ပွဲဖြစ်ပွားနေသောနေရာမှာ သူဌေးရေအားလျှပ်စစ်စီမံကိန်းနှင့် တစ်မိုင်ခန့်သာဝေးသည့် ဒေါ်မြရွာဟောင်းအနီးဖြစ်ကြောင်းသိရသည်။
ယနေ့ နေ့လယ် ၁၂ နာရီဝန်းကျင်စတင်ပြီး စစ်ကောင်စီတပ်က လေယာဥ်ဖြင့်ဗုံးကြဲတိုက်ခိုက်နေပြီး နှစ်ဖက်ပစ်ခတ်သံများလည်း ကြားနေရကြောင်း ဒေသခံများကပြောသည်။
" အခုနှစ်ဖက်ပစ်သံတွေကြားနေရတယ်။ လေယာဥ်နဲ့လည်းဗုံးကြဲနေတယ်။ ဖုန်းပြောလို့ အဆင်မပြေဘူး"ဟု တိုက်ပွဲဖြစ်ရာအနီး ဒေါ်မြကျေးရွာမှ ဒေသခံတစ်ဦးကပြောသည်။
ရွှေလှေကျေးရွာဒေသခံတစ်ဦးကလည်း"အခု ၁၂ နာရီမတီးခင်လေးက စပြီးလေယာဥ်ဝဲပြီး ဗုံးကြဲနေတာ။ ဒေါ်မြရွာဟောင်းအနီးအနားတွေကိုဗုံးကြဲတယ်လို့ကြားတယ်။ စက်သေနတ် ဆွဲသံတွေလည်း ကြားရတယ်" ဟု နိရဥ္စရာသတင်းဌာနသို့ ပြောသည်။
အဆိုပါတိုက်ပွဲနှင့် ပတ်သက်ပြီး အတည်ပြုချက်ရယူနိုင်ရန် အာရက္ခတပ်တော်ဘက်ကို နိရဥ္စရာသတင်းဌာနက ကြိုးစားဆက်သွယ်နေဆဲဖြစ်သည်။
ဧပြီလ ၁၅ ရက်မွန်းလွဲပိုင်းကလည်း စစ်ကောင်စီတပ်သည် သံတွဲမြို့နယ်၊ရွှေလှေတိုက်နယ်၊ ပေါက်တောကျေးရွာအနောက်ဘက်တောင်ကုန်းနှင့် ရှင်စောပြင်ကျေးရွာများအနီးသို့ တိုက်ပွဲဖြစ်ပွားခြင်းတစ်စုံတစ်ရာမရှိဘဲ လေကြောင်းဗုံးကြဲတိုက်ခိုက်ခဲ့သည်။
အာရက္ခတပ်တော်(AA)နှင့် စစ်ကောင်စီတပ်တို့၏ တိုက်ပွဲဒေသပိုမိုကျယ်ပြန့်လာပြီး ရခိုင်တောင်ဖက်ပိုင်းသံတွဲမြို့နယ်အထိတိုက်ပွဲများဖြစ်ပွားလာနေသည်။
ဧပြီလ ၁၃ ရက်က သံတွဲမြို့နယ်၊ ကွေ့ချောင်းကျေးရွာနှင့် ရေစင်ကျေးရွာကြားတွင် အာရက္ခတပ်တော်နှင့် စစ်ကောင်စီတပ်တို့တိုက်ပွဲဖြစ်ပွားခဲ့ပြီး သံတွဲ-တောင်ကုတ်ကားလမ်းကို စစ်ကောင်စီတပ်ကပိတ်ထားလိုက်သည်။