AA ဒုစစ်ဦးစီးချုပ် ဒေါက်တာညိုထွန်းအောင် သျှမ်းပြည်တပ်မတော် နှစ် (၆၀) ပြည့် အခမ်းအနားတက်ရောက်ပြီး (ULA/AA)၏ ဂုဏ်ထူးဆောင်တံဆိပ်ကို ဥက္ကဋ္ဌ ဗိုလ်ချုပ်ကြီးပန်ဖအားချီးမြှင့်

လူထက်နိုင်(ဒွာရာမြီ)/ နိရဉ္စရာ၊ဧပြီ၂၃ / ၂၀၂၄

အာရက္ခတပ်တော်(AA) ဒုစစ်ဦးစီးချုပ် ဒေါက်တာညိုထွန်းအောင်သည် ဧပြီလ ၂၄ ရက် တွင် ကျရောက်သော သျှမ်းပြည်တပ်မတော် (SSA) နှစ် (၆၀) ပြည့်အခမ်းအနား သို့တက်ရောက်ခဲ့ ရခိုင်အမျိုးသားအဖွဲ့ချုပ် (ULA/AA) ၏ ဂုဏ်ထူးဆောင်တံဆိပ်ကို သျှမ်းပြည်တိုးတက်ရေးပါတီ/ သျှမ်းပြည်တပ်မတော် (SSPP/SSA)  ဥက္ကဋ္ဌ ဗိုလ်ချုပ်ကြီးပန်ဖအား ချီးမြှင့်ခဲ့ကြောင်း သတင်းရရှိသည်။

 ယနေ့ ဧပြီလ ၂၄ ရက်တွင် ကျရောက်သည့် သျှမ်းပြည်တပ်မတော် SSA ထူထောင်ခြင်း နှစ်(၆၀)ပြည့် အခမ်းအနားကို SSPP/SSA ဌာနချုပ်ဖြစ်သည့် ကျေးသီးမြို့နယ်၊ ဝမ်ဟိုင်းတွင် ကျင်းပခဲ့ရာ SSPP/SSA ဥက္ကဋ္ဌ ဗိုလ်ချုပ်ကြီးပန်ဖနှင့်အတူ အာရက္ခတပ်တော် (AA)၏ ဒုစစ်ဦးစီးချုပ် ဒေါက်တာညိုထွန်းအောင် တက်ရောက်ခဲ့ကြောင်း SHAN News (Burmese Version) တွင်ဖော်ပြထားသည်။

အဆိုပါအခမ်းအနားသို့ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) နှင့် ပအိုဝ်းအမျိုးသား လွတ်မြောက်ရေးတပ်မတော် (PNLO/PNLA) တို့က သဝဏ်လွှာ ပေးပို့ခဲ့ကြသည်။

“၂၀၂၁ အာဏာသိမ်းမှုနောက်ပိုင်းမှာ အပြောင်းအလဲ ရှိခဲ့သလို ၂၀၂၃ က “၁၀၂၇ စစ်ဆင်ရေး”ကာလ အပြီးမှာလည်း စစ်ရေး၊ နိုင်ငံရေး အပြောင်းအလဲတွေ အများကြီး ရှိခဲ့ပါတယ်။ ပြောင်းလဲလာတဲ့ နိုင်ငံရေး ရေစီးကြောင်းနဲ့အတူ ကိုယ့်လူမျိုး၊ ကိုယ့်ဒေသအတွက် အကျိုးဖြစ်ထွန်းတဲ့ အခြေအနေ အချိန်အခါ ပေါ်မှာ မူတည်ပြီး SSPP/SSA နဲ့ သျှမ်းပြည်သူလူထုအနေနဲ့  အဖွဲ့အစည်းရဲ့ ရည်မှန်းချက်တွေ ဒီထက်ပိုပြီးမှပဲ ပြည့်ဝနိုင်ပါစေ”ဟု ဒေါက်တာညိုထွန်းအောင်က ဂုဏ်ပြုအမှာစကားတွင် ပြောကြားသွားခဲ့သည်။

ထို့အပြင် ရခိုင်အမျိုးသားအဖွဲ့ချုပ် (ULA/AA) ၏ ဂုဏ်ထူးဆောင်တံဆိပ်ကို SSPP/SSA ဥက္ကဋ္ဌ ဗိုလ်ချုပ်ကြီးပန်ဖအား ဒုစစ်ဦးစီးချုပ် ဒေါက်တာညိုထွန်းအောင် ကိုယ်တိုင် ပေးအပ်ချီးမြှင့်ခဲ့ပြီး သျှမ်းပြည်တော်လှန်ရေးနှင့် ပတ်သက်ပြီး အားပေးစကားများ ပြောကြားခဲ့သည်။

၁၉၅၈ ခုနှစ် မေလ ၂၁ ရက်မှ စတင်ခဲ့သည့် သျှမ်းလက်နက်ကိုင် တော်လှန်ရေးလမ်းစဉ်တွင် တကွဲတပြား ဖြစ်နေသည့် သျှမ်းတပ်များကို ၁၉၆၄ ခုနှစ် ဧပြီလ ၂၄ ရက်တွင် စုစည်း၍ မြန်မာနိုင်ငံ၏ ပထမဆုံးသမ္မတဖြစ်သူ ညောင်ရွှေစော်ဘွား စဝ်ရွှေသိုက်၏ မဟာဒေဝီ စဝ်နန်းဟိန်းခမ်းအား နာယကအဖြစ် တင်မြောက်ပြီး သျှမ်းပြည်တပ်မတော် (Shan State Army – SSA) ဟူ၍ တည်ထောင်ခဲ့ခြင်း ဖြစ်ကြောင်းသိရသည်။

ဓာတ်ပုံ- SHAN News