ရခိုင်ပြည်၊ သံတွဲမြို့သို့  ဆေးဝါးသယ်ယူခွင့်ကိုစစ်ကောင်စီတပ်မှ ပိတ်ပင်တားဆီးလိုက်ပြီး သယ်ယူလာသော ဆေးဝါးများအားလည်း ဖမ်းဆီးနေကြောင်းသတင်းရရှိသည်။

သံတွဲမြို့မှ ဆေးဆိုင်ပိုင်ရှင်တစ်ဦးက  “ အခုဆိုရင်  ဆေးတွေကိုပါ စစ်ကောင်စီကသယ်ယူခွင့် ပိတ်လိုက်ပြီ။ ဒီလအတွင်းမှာ လာသမျှဆေးတွေ အကုန်လုံးကို ဖမ်းတယ်။ ပြည်မဖက်ကမှာထားတဲ့ ဆေးတွေအကုန်လုံး  လေဆိပ်မှာအဖမ်းခံရတယ်။ စစ်ကောင်စီတပ်ရင်းတွေကဖမ်းတာ။ ဘာကြောင့် ဖမ်းလဲဆိုတာတော့ ကျနော်တို့မသိရဘူး။ ကျနော်တို့အတွက်တော့ ဆုံးရှုံးမှုကြီးတစ်ခုပါပဲ”ဟု နိရဉ္စရာသတင်းဌာနသို့ ပြောသည်။

သံတွဲမြို့သို့ ဆေးဝါးတင်သွင်းခွင့်ကို ယခုရက်ပိုင်းအတွင်းတွင် စစ်ကောင်စီမှသယ်ယူခွင့် မပြုတော့ကြောင်း၊  လေယာဥ်ဖြင့် တင်ဆောင်လာသည့် ဆေးဝါးများကိုလည်း ဖမ်းဆီးနေကြောင်း၊သံတွဲလေဆိပ်အနီးရှိ ခမ၇ ( ၅၆၆) တပ်ရင်းနှင့် ငပလီလမ်းဆုံအနီးရှိ ခလ၇ (၅၅)တပ်ရင်းများမှအဓိက ဖမ်းဆီးနေကြောင်း ၎င်းဒေသခံက ပြောကြားသည်။

ယခုကဲ့သို့ ဆေးဝါးများကို စစ်ကောင်စီက တားမြစ်လာသည့်အတွက် ကျန်းမာရေး မကောင်းသူများ အတွက် စိုးရိမ်မိသည်ဟု သံတွဲမြို့ခံအမျိုးသမီးတစ်ဦးက နိရဉ္စရာသတင်းဌာနကိုပြောသည်။

“ အန်တီမှာဆိုမြေးလေးတွေ နေမကောင်းတာတွေ ခဏခဏဖြစ်တယ်။ ဆေးကိုလည်းစွဲတိုက် နေရတာရှိတယ်။ ဆေးတွေသာပြတ်သွားရင် ဒုက္ခရောက်ပြီ။ရောဂါခံစားနေရသူတွေ၊ ကလေးငယ်တွေရဲ့ အသက်အန္တရာယ် အထိကြုံတွေ့ လာရနိုင်တယ်။  အခုလက်ရှိတော့ လက်ကျန်လေးတွေကိုဘဲ ဆေးဆိုင်တွေက ရောင်းနေတာတွေ့တယ်” ဟုပြောသည်။

စစ်ကောင်စီသည် သံတွဲမြို့ကို သယ်ယူပို့ဆောင်ရေး ကုန်းလမ်းများကို ပိတ်ဆို့ထားသဖြင့်လက်ရှိတွင် သံတွဲမြို့တွင် စားနပ်ရိက္ခာရှားပါနေပြီး ဂွမြို့မှ သံတွဲမြို့သို့ ပို့ဆောင်သည့်စားနပ်ရိက္ခာကားများကိုပါ ဖမ်းဆီးမှုများ ရှိနေကြောင်း သိ၇သည်။

စားနပ်ရိက္ခာ အနည်းအကျဉ်း တင်ယူလာသည့် ဆိုင်ကယ်များကိုလည်း စစ်ကောင်စီ၏ဂိတ်များကဖမ်းဆီးမှုများ ရှိနေသဖြင့် မကြာမီ အချိန်တိုအတွင်းတွင် သံတွဲမြို့နယ်တစ်ခုလုံး အငတ်ဘေး ဆိုက်ရောက်နိုင်သည်ဟု သံတွဲမြို့ခံနောက်ထပ် အမျိုးသမီးတစ်ဦးက ပြောသည်။

“ ကုန်လမ်းတွေ ပိတ်ထားတာက ရခိုင်မှာ တိုက်ပွဲစဖြစ်ကတည်းကဆိုရင်၄ လလောက်ရှိပြီ။ ဒေသအတွင်း မှာဆိုရင် စားဝတ်နေရေး အဆင်ပြေရင်  ပြေတဲ့နည်းနဲ့ ကုန်ပစ္စည်းတွေ သွင်းကြတယ်။ သံတွဲမှာတိုက်ပွဲ မဖြစ်ခင်က ဖမ်းဆီးတာတွေ သိပ်မရှိဘူး။ အခု ရက်ပိုင်းအတွင်းမှာဆိုရင် ဂွမြို့ဖက်က လာတဲ့ စားသောက်ကုန်တွေ အကုန်လုံးကို စစ်တပ်ကဖမ်းတယ်။ အေအေဆီရောက်သွားမှာ စိုးလို့လား၊ ပြည်သူတွေကို ဒုက္ခရောက်အောင် လုပ်တာလားမသိဘူး။ဒီလိုဆိုရင် မကြာဘူး အငတ်ဘေး ရောက်ကြတော့မှာ အခုတောင် ကုန်ဈေးနူန်းတွေတက်နေပြီ။ ဆန်ကွဲတောင် စားနေရတဲ့ သူတွေ ရှိနေပြီ” ဟုပြောသည်။

သံတွဲမြို့အထိ တိုက်ပွဲဖြစ်ပွားလာမည်စိုးရိမ်၍ ယခုလအတွင်းတွင် ငွေကြေးတတ်နိုင်သူတချို့ မြို့ကိုစွန့်ခွာမှုများ ရှိနေသည်ဟု မြို့ခံများကပြောသည်။

စစ်ကောင်စီသည် ကုန်းလမ်းမှ ကုန်ပစ္စည်းသယ်ယူခွင့် အပြင် ရေလုပ်ငန်း လုပ်ကိုင်စားသောက်သူများကို လည်း ပင်လယ်ပြင်သို့ ငါးဖမ်းမထွက်ကြရန် ပိတ်ပင်ထားသည့်အတွက်ရေလုပ်ငန်းဖြင့် အသက်မွေး ဝမ်းကျောင်း ပြုလုပ်နေကြသည့် ဒေသခံအများစုမှာ စားဝတ်နေရေးကျပ်တည်းနေပြီး တချို့ နေရာများတွင် တောင်းရမ်း စားသောက်သူများပင် ရှိလာနေသည်ဟုသံတွဲဒေသခံများကပြောသည်။

အာရက္ခတပ်တော်သည် သံတွဲတမြို့လုံးကို ဝိုင်းရံပိတ်ဆို့ထားသည့် သတင်းများထွက်ပေါ် နေသောကြောင့် စစ်ကောင်စီတပ်သားများမှာ စိုးရိမ်မှုများဖြစ်နေပြီး အာရက္ခတပ်တော်ထံဆေးဝါးများ၊ စားနပ်ရိက္ခာများ ရောက်ရှိသွားမည်ကို စိုးရိမ်သဖြင့် သယ်ယူပို့ဆောင်ခွင့်ပိတ်ပင် လိုက်သဖြင့် ကုန်စည်ပြတ်တောက်မှုများ ဖြစ်ပေါ်နေကြောင်း သိ၇သည်။

၇ခိုင်တွင် ၂၀၂၃ ခုနှစ်  နိုဝင်ဘာ၁၃ ရက်မှ စတင်ပြီး ပြန်လည်ဖြစ်ပွားခဲ့သည့် အချိန်မှစ၍ စစ်ကောင်စီသည် ရခိုင်တပြည်လုံးကိုလမ်းပိတ်ထားသည့်အတွက် ဒေသအတွင်းတွင် ကုန်ဈေးနူန်း မြင့်တက်ခြင်းနှင့် စားဝတ်နေရေးကျပ်တည်းခြင်းစသည့်ဒုက္ခမျိုးစုံကို ခံစားနေကြ၇သည်ဟု ဒေသခံများက ပြောသည်။