မွတ်ဆလင်အကြမ်းဖက်အဖွဲအစည်းများက အေအေနှင့် ပူးပေါင်းဆောင်ရွက်နေသယောင် လိမ်လည်ကာ လူသစ်စုဆောင်းနေမှုအပေါ် AA ကန့်ကွက်ရှုတ်ချ

အေးမြတ်ခိုင်၊နိရဥ္စရာ၊မေလ၉/၂၀၂၄

မွတ်ဆလင်အကြမ်းဖက်အဖွဲအစည်းများဖြစ်သည့် ARSA. ARA, RSO စသည့် အဖွဲ့အစည်းများသည် အာရက္ခတပ်တော်နှင့် ပူးပေါင်းဆောင်ရွက်နေသယောင်၊ တိုက်ပွဲများအတူတကွတိုက်နေသယောင် လိမ်လည်လှည့်ဖြားပြီး ဘင်္ဂလားဒေ့ရှ်နိုင်ငံ အတွင်းရှိဒုက္ခသည်စခန်းများမှ မူဆလင်လူငယ်များအား စည်းရုံးကာ စစ်ကောင်စီအတွက် လူသစ် စုဆောင်းပေးနေကြောင်း အာရက္ခတပ်တော် (AA) ပြောခွင့်ရဦးခိုင်သုခ၏ တယ်လီဂရမ် ချန်နယ်မှ မေလ ၈ တွင် ထုတ်ပြန်ပြောဆိုသည်။

လက်ရှိဖြစ်ပေါ်နေသော နိုင်ငံရေးအခင်းအကျင်း အပေါ်ခုတုံးလုပ်ကာ  မွတ်ဆလင်လူငယ်များ (အထူးသဖြင့်) အရွယ်မရောက်သေးသည့်လူငယ်များအား စစ်ကောင်စီ နှင့် မွတ်ဆလင် အကြမ်းဖက်အဖွဲအစည်းများက သူတို့၏ အကျိုးစီးပွားအတွက် လိမ်လည်လှည့်ဖြား၍ လူသစ်စုဆောင်းနေခြင်းဖြစ်ကြောင်းဖော်ပြထားသည်။

ယခုကဲ့သို့လုပ်ရပ်များသည် လွန်စွာယုတ်မာအောက်တန်းကျသည့် လုပ်ရပ်ဖြစ်သည့်အတွက် ULA/AA အနေဖြင့် ယခုလုပ်ရပ်များကို ပြုလုပ်နေသောသူများ၊ အဖွဲအစည်းများအပေါ် ပြင်းထန်စွာ ကန့်ကွက်ရှုတ်ချသည်ဟု ဆိုသည်။

ထို့အပြင် ULA/AA အနေဖြင့် အကြမ်းဖက်လုပ်ရပ်မှန်သမျှကို ဆန့်ကျင်ပြီး မည်သည့် အကြမ်းဖက်အဖွဲ့အစည်းနှင့် မည်သည့်အခါတွင်မျှ ဆက်စပ်ပတ်သက်မှု၊ပူးပေါင်း ဆောင်ရွက်မှု လုံးဝမရှိကြောင်း အသိပေးထားသည်။

ရခိုင်ပြည် မြို့သိမ်းတိုက်ပွဲများအတွင်း အထိနာနေသော စစ်ကောင်စီသည် ဘူးသီးတောင်၊ မောင်တော ဒေသတွင် ရခိုင်နှင့် မွတ်ဆလင် အကြား လူမျိုးရေး၊ ဘာသာရေး အဓိကရုဏ်းများကို မွတ်ဆလင် အကြမ်းဖက်အဖွဲ့အစည်းများဖြင့် ပူးပေါင်းကာ ဖန်တီးလျက်ရှိကြောင်း ဒေသခံများက ပြောကြားသည်။