တိုက်ပွဲဖြစ်ပွားခြင်းမရှိသည့် စနဲမြို့ကို စစ်ကောင်စီမှ ဒရုန်းဖြင့်ထပ်မံ ဗုံးကြဲ၍ အပျက်အစီးရှိ

(မြို့ထဲတွင် အရပ်သားတချို့ ပိတ်မိနေ)

သဉ္စာနွယ်/ နိရဉ္စရာ၊ မေ ၉ / ၂၀၂၄

ရခိုင်ပြည်၊ ကျောက်ဖြူခရိုင်၊စနဲမြို့ကို တိုက်ပွဲဖြစ်ပွားခြင်းမရှိဘဲ အကြမ်းဖက် စစ်ကောင်စီမှ ဒရုန်းဖြင့် ဗုံးထပ်မံလာကြဲခဲ့သည့်အတွက် အပျက်အစီး တချို့ရှိကြောင်း သတင်းရရှိသည်။

စနဲမြို့ကို ယနေ့ မေလ ၉ ရက်နေ့ နံနက် ၁၁နာရီ ခန့်က တိုက်ပွဲတစုံတရာဖြစ်ပွားခြင်းမရှိဘဲ ဒရုန်းဖြင့် သုံးကြိမ်တိုင်တိုင်  ဗုံးလာကြဲခဲ့သည်ဟု ကျောက်ဖြူဒေသခံတစ်ဦးက နိရဥ္စရာ သတင်းဌာနကို ပြောသည်။

“ မနေ့ကလည်း လာကြဲတယ်။ ဒီနေ့လည်းထပ်ကြဲတယ်။ လူတော့အထိအခိုက်မရှိဘူး။ အပျက်အစီးတော့ နည်းနည်းရှိတယ်။ အိမ်တချို့နဲ့ အဆောက်အအုံတစ်ချို့လည်းမီးလောင်တယ်” ဟုပြောသည်။

စနဲမြို့ရှိ စျေးနှင့် ကားဂိတ်အနီးကို လာကြဲခြင်းဖြစ်ပြီး အဆောက်အဦတချို့ ပျက်စီးမှုရှိကြောင်း ၎င်းက ပြောသည်။ 

မြို့ထဲတွင်လည်း ထွက်မပြေးနိုင်သေးသည့် လူများလည်း အနည်းငယ်ရှိနေသေးသည်ဟု ကျောက်ဖြူမြို့နယ်မှ ဒေသခံအမျိုးသမီးတစ်ဦးက နိရဥ္စရာ သတင်းဌာနကိုပြောသည်။

“စနဲမြို့က UlA/AA ထိန်းချုပ်ထားတဲ့မြို့ဖြစ်တာကြောင့်  သူတို့က ကိုယ့်ဖက်ကလူတွေရှိတယ် ဆိုတဲ့ သံသယနဲ့လာကြဲကြတာ။ မြို့ပေါ်က လူအများစုကတော့ တိမ်းရှောင်နေကြတာကြာပြီ။ တချို့အနည်းငယ်လောက်တော့ ကျန်နေသေးတယ်” ဟုပြောသည်။

ယမန်နေ့ မေလ ၈ ရက်နေ့မနက် ရှစ်နာရီအချိန်ကလည်း စနဲမြို့ကို စစ်ကောင်စီဒရုန်းက ဗုံး ၇ လုံးထိကြဲချခဲ့ရာ တစ်လုံးမှာ ဈေးအပြင်တန်းဟင်းသီးဟင်းရွက်တန်းကို ကျကွဲပြီး အမျိုးသမီး တစ်ဦးသေဆုံးကာ ခုနစ်ဦးဒဏ်ရာပြင်းထန်ရရှိသွားကြောင်းသတင်းရရှိသည်။

ယင်းအပြင် တိုက်ပွဲဖြစ်ပွားခြင်းမရှိသည့် ကျောက်ဖြူမြို့နယ် ဂန့်ဂါကျေးရွာကိုလည်း စစ်ကောင်စီ၏ တော်ဦးမော်ရေတပ်စခန်းအနီးက ဖရုံသီးကျွန်းတွင်ရပ်နားထားသည့် နေဗီမှ လက်နက်ကျည်များဖြင့် ပစ်ခတ်ခဲ့သည့် အတွက် အသက် ၁၉ နှစ်အရွယ် ကျောင်းသားတစ်ဦး အသက်ဆုံးရှုံးခဲ့ရသည်။