နိရဉ္စရာ၊ မေလ ၁၈/၂၀၂၄

ဘူးသီးတောင်မြို့ အခြေစိုက် စစ်ကောင်စီတပ်ရင်း တစ်ခုမကျန်ကိုအာရက္ခတပ်တေဆာ် (AA)က သိမ်းပိုက်လိုက်ပြီဖြစ်ကြောင်း ယနေ့ ထုတ်ပြန်သည်။

ထုတ်ပြန်ချက်အထဲတွင် ရက္ခိုင်ပြည်၊ဘူးသီးတောင်မြို့ရှိ ဖက်ဆစ် အကြမ်းဖက် စစ်ကောင်စီ၏ နောက်ဆုံးလက်ကျန်စခန်းများ ဖြစ်သော ဘူးသီးတောင်  ဗျူဟာဌာနချုပ်အပါအဝင် ဗျူဟာလက်အောက်ခံတပ်ရင်းများ၊ အမြောက်တပ်၊ ထောက်ပို့တပ်ရင်း နှင့် ဒကစ (စစ်တွေ)လက်အောက်ခံ ဘူးသီးတောင် အခြေစိုက်တပ်ရင်းအချို့အပါအဝင် စခန်းအားလုံးကို အာရက္ခတပ်တော် (Arakan Army) မှ၂၀၂၄ ခုနှစ်၊ မေလ (၁၈) ရက်၊ မွန်းတည့် (၁၂) နာရီအချိန်ခန့်တွင်တစ်ခုမကျန်သိမ်းပိုက်ရရှိပြီး ဖြစ်ကြောင်း ဖော်ပြထားသည်။

ထုတ်ပြန်ချက်အပြည့်အစုံမှာအောက်ပါအတိုင်းဖြစ်သည်။

ရက္ခိုင်ဒေသအတွင်းတိုက်ပွဲသတင်းများ ၂၀၂၄ ခုနှစ်၊ မေလ (၁၈) ရက်

ရက္ခိုင်ပြည်၊ ဘူးသီးတောင်မြို့ရှိဖက်ဆစ် အကြမ်းဖက် စစ်ကောင်စီ၏ နောက်ဆုံးလက်ကျန်စခန်းများ ဖြစ်သော ဘူးသီးတောင်  ဗျူဟာဌာနချုပ်အပါအဝင် ဗျူဟာလက်အောက်ခံတပ်ရင်းများ၊ အမြောက်တပ်၊ ထောက်ပို့တပ်ရင်း နှင့် ဒကစ (စစ်တွေ)လက်အောက်ခံ ဘူးသီးတောင် အခြေစိုက်တပ်ရင်းအချို့အပါအဝင် စခန်းအားလုံးကို အာရက္ခတပ်တော် (Arakan Army) မှ၂၀၂၄ ခုနှစ်၊ မေလ (၁၈) ရက်၊ မွန်းတည့် (၁၂) နာရီအချိန်ခန့်တွင်တစ်ခုမကျန်သိမ်းပိုက်ရရှိပြီး ဖြစ်သည်။

ယနေ့နောက်ဆုံးသိမ်းပိုက်ခဲ့သောစခန်းများမှာဘူးသီးတောင်ဗျူဟာဌာနချုပ် အပါအဝင် အမတ (၃၇၈)၊ ခမ၇ (၂၃၄)၊ ခမ၇ (၃၄၅)၊ ခမ၇ (၃၅၂)တပ်ရင်းများ၊ အမြောက်တပ်၊ထောက်ပို့တပ်ရင်း နှင့် GE တပ်ရင်းတို့ဖြစ်ကြသည်။

မေလ (၁၄) ရက်နေ့ ၌ စစ်ကောင်စီ၏ ခမ၇(၃၅၃) ၊ ခမ၇ (၅၃၅) ၊ ခမ၇ (၂၆၃) နှင့် ခမ၇ (၂၃၃) စသည့် တပ်ရင်း (၄)ရင်းကိုလည်းသိမ်းပိုက်ရရှိခဲ့သည်။ မေလ(၁၃) ရက်နေ့တွင် နခခ (၃) အားလည်းကောင်း၊ မေလ (၁၆) ရက်နေ့တွင် နခခ (၈) စခန်းအားလည်းကောင်း အသီးသီးသိမ်းပိုက်ရရှိခဲ့သည်။

တစ်ပြိုင်နက်တည်းတွင် အဆိုပါ ဗျူဟာနှင့် တပ်ရင်းများမှ ထွက်ပြေးနေသော စစ်ကောင်စီတပ်သားများ နှင့် စစ်ကောင်စီထံသင်တန်းဆင်းပြီး အကြမ်းဖက်စစ်ကောင်စီနှင့် ပူးပေါင်းပြီးမိမိတို့အားတိုက်ခိုက်နေသော စစ်သွေးကြွဘင်္ဂလီတပ်ဖွဲ့ဝင်များအား မိမိတို့မှလိုက်လံရှင်းလင်း ပိတ်ဆို့တိုက်ခိုက်လျက်ရှိသည်။

ထို့ကြောင့် တိုက်ပွဲများမှာဘူးသီးတောင်မြို့ပတ်ဝန်းကျင်၌ ဆက်လက်ဖြစ်ပွားလျက်ရှိသည်။

စစ်ကောင်စီတပ်ဖွဲ့ဝင်များသည် ကစဉ့်ကလျားခြေဦးတည့်ရာဖြင့် လွတ်မြောက်မည်ဟုထင်ရသောနေရာများ နှင့် ကျေးရွာများ၊ ဘူးသီးတောင်မြို့အတွင်းသို့ထွက်ပြေးနေကြသောကြောင့် ဘူးသီးတောင်မြို့ ပတ်ဝန်းကျင်ရှိ ကျေးရွာများအနေဖြင့် စစ်ရေးသတိဖြင့်နေထိုင်ကြရန်ကိုလည်း"အထူး" သတိပေးအပ်ပါသည်။

သတင်းနှင့်ပြန်ကြားရေး အာရက္ခတပ်တော်