အိမ်စိုးဖြူ၊နိရဉ္စရာ၊မေ ၂၆/ ၂၀၂၄

ရခိုင်တွင်စစ်ကောင်စီက မြို့နယ်(၇)ခုတွင်သာ ကျောင်းဖွင့်ခဲ့ပြီး ကျောင်းအပ်နှံသူ ယနေ့ မေလ ၂၆ ရက်နေ့အထိ၃၈၀၀၀ ကျော်သာရှိသေးကြောင်း ရခိုင်ပြည်နယ်ပညာရေးမှူးရုံးမှ သိရသည်။

တနိုင်ငံလုံးတွင် ကျောင်းအပ်နှံရေး ရက်သတ္တပတ်အဖြစ် မေလ၂၃ ရက်နေ့မှ ဇွန်လ ၂ ရက်နေ့အထိကို  စစ်ကောင်စီက ကြေညာထားသည်။

ရခိုင်မှကျောက်ဖြူ၊ တောင်ကုတ်၊မာန်အောင်၊ သံတွဲ၊ အမ်း၊ ဂွနှင့် စစ်တွေမြို့နယ်စသည့် မြို့နယ်(၇)ခုတွင်ကျောင်းသား ၃၈,၀၀၀ကျော်ကျောင်းအပ်ကြောင်း ရခိုင်ပြည်နယ်ပညာရေးမှူး ဦးဘထွီးစိန်ကနိရဉ္စရာအားပြောသည်။

“လျာထားတာတော့မရှိဘူး။ဝင်လာတာကိုလက်ခံတာပဲပေါ့။ လောလောဆယ် ခုနှစ်မြို့နယ်မှာ သုံးသောင်းကျော်လောက်ပေါ့”ဟုပြောသည်။

ကျန်နေသည့်မြို့နယ်များတွင် ကျောင်းများဖွင့်လှစ်နိုင်မည်မဟုတ်သည့်အတွက် ကျောင်းမဖွင့်နိုင်သည့်မြို့နယ် ၁၀ ခုမှ ကျောင်းသားများအတွက် တစ်စုံတရာအစီစဉ်မရှိကြောင်း၊ လက်ရှိ(ရ)မြို့နယ်တွင်သာ ဆက်လက် ဖွင့်လှစ်သွားမည်ဟု ၎င်းကဆက်ပြောသည်

“ အဲဒါတွေကလုပ်ဖို့အစီစဉ်က လောလောဆယ်မရှိသေးဘူး။ ကျောင်းလည်းမဖွင့်ဘူးဆိုတော့ သူတို့ကိုဘယ်လိုလုပ်၇မလဲမသိဘူး” ဟုပြောသည်။

လွန်ခဲ့သည့် ၂၀၁၉ခုနှစ်တိုက်ပွဲများမှစ၍ ရခိုင်မြောက်ပိုင်းမြို့နယ်များတွင် စာသင်ကျောင်းများယာယီပိတ်ထားခဲ့ရပြီးနောက် ဖုန်းနှင့်အင်တာနက်လိုင်းများ အပိတ်ခံရခြင်း၊လမ်းခရီးများ ပိတ်ပင်ခံရမှုများကြောင့် ကျောင်းသားများ ပညာသင်ယူခွင့်ဆုံးရှုံးခဲ့ကြသည်။

၇ခိုင်တွင် အခြေခံပညာစာသင်ကျောင်းပေါင်း၃,၀၀၀ ကျော်ရှိပြီးလက်ရှိတွင် ပုဏ္ဏားကျွန်း၊ ရသေ့တောင်၊ ဘူးသီးတောင်၊ မောင်တော၊ကျောက်တော်၊ မင်းပြား၊ မြောက်ဦး၊ ရမ်းဗြဲ၊မြေပုံနှင့်ပေါက်တောမြို့နယ်တို့တွင် စာသင်ကျောင်းများ ထောင်နဲ့ချီ၍ပိတ်ထားရကြောင်းသိရသည်။

၇ခိုင်တွင် ယခင်၂၀၂၁ ခုနှစ်မှ ၂၀၂၃ ခုနှစ်တို့အတွင်း ကျောင်းသား၊ ကျောင်းသူ ဦးရေ သုံးသိန်းမှငါးသိန်းကျော်အထိ ကျောင်းအပ်ခဲ့ကြောင်း ရခိုင်ပြည်နယ်ပညာရေးမှူးရုံး၏စာရင်းများအရသိ၇သည်။

ပုံ-ယခင် စစ်တွေမြို့ပေါ်ရှိ အခြေပညာအထက်တန်းကျောင်းပုံဖြစ်သည်။