စောရှင်မေ၊နိရဉ္စရာ၊ မေ ၂၇/ ၂၀၂၄

ရခိုင်ပြည်၊ပုဏ္ဏားကျွန်းမြို့၌ ယခုရက်ပိုင်းအတွင်းမိုးရွာသွန်းနေသည့်အတွက်စစ်ဘေးရှောင်စခန်းများတွင် အရေးပေါ်အမိုးအကာများအကူအညီလိုအပ်နေကြောင်းစစ်ဘေးရှောင်များက နိရဥ္စရာကိုပြောသည်။

"အခုက မိုးတွေရွာလာပြီ။ မနက်မိုးရွာရင်ထမင်းချက်စားရတာအဆင်မပြေဘူး။ ညအချိန် မိုးရွာလည်းမအိပ်ရဘူး။ နည်းနည်းခိုလှုံလို့ရတဲ့ အိမ်တွေမှာကပ်ခိုနေကြရတယ်။ မိုးရွာ၊ လေတိုက်တော့တာပေါ်လင်တွေအကုန်လန်ကုန်ပြီ။ ကူညီကယ်ဆယ်ရေးပေးတာတွေလည်း လုံး၀မ၇သေးပါဘူး။စားသောက်ဖို့တောင်အဆင်မပြေတာ။ အမိုးအကာအတွက်ဝယ်နိုင်ဖို့ လုံး၀မတတ်နိုင်ကြပါဘူး " ဟုမြတ်လေးစစ်ဘေးရှောင်စခန်းတာဝန်ခံ ဦးအောင်မြင့်က နိရဉ္စရာကို ပြောသည်။

အဆိုပါစစ်ဘေးရှောင်စခန်းကို ပြီးခဲ့သည့် ၂၀၁၉ ခုနှစ်ကတည်ထားခဲ့ပြီးလက်ရှိတွင် စစ်တွေ၊ ကျောက်တော်၊ ပုဏ္ဏားကျွန်းနှင့်မောင်တောမြို့နယ်တို့မှ အိမ်ထောင်စု ၁၃၀ ကျော်နေထိုင်ကြကာလူဦးရေ ၇၀၀ ကျော်ခန့်ရှိသည်ဟု ဦးအောင်မြင့်က ပြောသည်။

ယခုရက်ပိုင်းအတွင်မိုးရွာသွန်းမှုများရှိလာ၍ မိုးသက်လေပြင်းများကျရောက်သည့်အခါတာပေါ်လင်များနှင့် ကောက်ရိုးမျှင်များဖြင့် အုပ်မိုး၍ကာထားသည့်အိမ်အမိုးများမှာလေဖြင့်လွင့်ထွက်သွားသည်ဟုလည်း ပန်းနီလာစစ်ဘေးရှောင်စခန်းမှတာဝန်ခံမမြသန်းအေးက ပြောသည်။

"မိုးရွာတော့ နေထိုင်လို့အဆင်မပြေဘူး။အပေါ်ကမိုးရွာချရင် အောက်ကိုအကုန်စီးကျတော့ အကုန်လုံးကရေအိုင်တင်နေတယ်။ ညဘက်ဆို မိုးရွာရင် လုံခြုံတဲ့နေရာကို ဝင်ခိုရတယ်။ ကလေးတွေ၊သက်ကြီးရွယ်အိုတွေနဲ့ဆို ပိုဆိုးကြတာပေါ့။ အခက်အခဲတွေကစားသောက်ဖို့တောင် ကြပ်တည်းနေတဲ့အချိန်မှာ ကိုယ်ထူကိုယ်ထ အမိုးအကာတွေဝယ်ဖို့ကမတတ်နိုင်ကြဘူး" ဟုပြောသည်။

ပန်းနီလာစစ်ဘေးရှောင်စခန်းတွင်မေလ တတိယအပတ်က တာပေါ်လင်စ ၆ ထောင်ပတ်လည် ထောက်ပံ့လှူဒါန်းမှုရှိခဲ့သော်လည်းအိမ်ထောင်စု ၅ စုသာ ရရှိခဲ့သည်ဟုလည်း သူမက ဆက်ပြောသည်။

"လာလှူတဲ့သူတွေကလည်း အကုန်လုံးအတွက် မလောက်လို့ဆိုပြီး လုံး၀အဆင်မပြေတဲ့အိမ် ၅ ဆောင်အတွက်လှူခဲ့တယ်။ အမိုးအကာအတွက်ကတော့အကုန်လုံးလိုအပ်နေကြတာပါ။ တတ်နိုင်သလောက် အမိုးအကာအတွက် ထောက်ပံ့ပေးဖို့တောင်းဆိုချင်ပါတယ်" ဟုပြောသည်။

အဆိုပါစစ်ဘေးရှောင်စခန်းကို ပုဏ္ဏားကျွန်းမြို့ပေါ်မှ ရွာဟောင်း၊မြို့သစ်နှင့် စံပြရပ်ကွက်တို့မှ နေထိုင်ကြပြီး၊ပြီးခဲ့သည့် ၂၀၂၃ ခုနှစ် နိုဝင်ဘာလတွင်တည်ထားခဲ့ကာ အိမ်ထောင်စု ၈၅ စုရှိကာ လူဦးရေ ၃၀ရဦးနေထိုင်ကြသည်။

ပုဏ္ဏားကျွန်းမြို့နယ်တွင်မြတ်လေး၊ ပန်းနီလာ၊ သရက်ချို၊အောင်ဖြူပြင်၊ ကြံခင်းနှင့် ကဏန်းတောင်စသည့်ကျေးရွာများရှိစာသင်ကျောင်း၊ ဘုန်းကြီးကျောင်း နှင့်လမ်းဘေးတို့တွင်ယာယီတဲထိုးကာ စစ်ဘေးရှောင်များ ခိုလှုံနေထိုင်လျက်ကြသည်။