မောင်တောမြို့မှ ဒေသခံအနည်းဆုံး ၁၀ ဦးခန့် ဖမ်းဆီးခံရပြီး ရွှေ၊ ငွေ၊ ပစ္စည်းများကို စစ်ကောင်စီတပ်က မွှေနှောက်ယူဆောင်သွား

Preview

မောင်တောမြို့မှ ဒေသခံအနည်းဆုံး ၁၀ ဦးခန့် ဖမ်းဆီးခံရပြီး ရွှေ၊ ငွေ၊ ပစ္စည်းများကို စစ်ကောင်စီတပ်က မွှေနှောက်ယူဆောင်သွား

မေ ၂၇/ ၂၀၂၄ | ကြည့်ရှုသူ :1566

နောင်မင်းသူ၊ နိရဉ္စရာ၊ မေလ ၂၇/၂၀၂၄

၇ခိုင်ပြည်၊မောင်တောမြို့မှ ဒေသခံအနည်းဆုံး ၁၀ ဦးကို နေအိမ်သို့ဝင်ရောက် ဖမ်းဆီးသွားပြီး ရွှေ၊ ငွေ၊ ပစ္စည်းများကို မွှေနှောက်ယူဆောင်သွားကြောင်း ဒေသခံများက နိရဉ္စရာသတင်းဌာနသို့ပြောသည်။

ယနေ့မေလ ၂၇ ရက် နံနက်ပိုင်းတွင် ရွှေဇားတံတားအနီး လမ်းဆုံတွင် အင်အား ၅၀ ကျော်ခန့်ရှိသည့် စစ်ကောင်စီတပ်သားများသည် ရွှေဇားကျေးရွာအတွင်း နေအိမ်များကို အတင်းဝင်ရောက်လာကာ မွှေနှောက်ရှာဖွေဖမ်းဆီးမှုများလုပ်ဆောင်ခဲ့ကြောင်း ဒေသခံများကပြောသည်။

အမည်မဖော်လိုသည့်မျက်မြင်အမျိုးသမီးတစ်ဦးက "ကျမပြောသံတွေကြားရတယ်။ ဒီနားက တယောက်ကို ထိန်းထား။ ထွက်ပြေးရင် ပစ်သတ်လို့ ဖုန်းနဲ့ ပြောနေတယ်။နောက်ပြီး လမ်းထိပ်က ထွက်လာတဲ့ တယောက်ကိုလည်း ဖမ်းထားပြီးအိမ်ရှေ့က အပင်အောက်မှာ ထိုင်ခိုင်းထားပါတယ်။နောက်ပြီးအိမ်တွေကို အတင်းကန်ကျောက်၊ဖြိုချပြီးဝင်ကြတယ်။ ရွာကိုပတ်ပြီးအိမ်တိုင်းကို ဝင်ရှာတယ်။ ကျမတို့အိမ်က မောင်တစ်ယောက်နဲ့ မတ်တစ်ယောက်ကိုလည်းခေါ်ယူသွားကြတယ်။ ကျမပုန်းနေတာကို သူတို့မတွေ့သွားဘူး။ နောက် ဝိမလ က ၆ ယောက်။အရှေ့မှာဖမ်းထားတဲ့တစ်ယောက်၊ နောက်ထပ် ၂ ယောက်နဲ့ဆိုရင်ပေါင်း ၉ယောက်လောက်ဖမ်းသွားတယ် "ဟု ပြောသည်။

မွန်းလွဲ ၃ နာရီခန့်တွင်ဖမ်းဆီးခံထားရသူတချို့ ပြန်လွတ်လာသော်လည်း အမျိုးသမီး နှင့် မွတ်ဆလင်များ အပါအဝင် ဒေသခံတချို့ကိုဖမ်းဆီးခေါ်ဆောင်သွားပြီး နေအိမ်များမှ မွှေနှောက်ယူဆောင်သွားသည့် ရွှေ၊ ငွေ ၊ဖုန်း နှင့် ပစ္စည်းများကိုလည်း ပြန်ပေးခြင်းမရှိဘဲသိမ်းယူသွားကြကြောင်း သိ၇သည်။

"ဖမ်းယူသွားတဲ့ လူတချို့ပြန်လွတ်လာကြပါတယ်။ ဒါပေမယ့် ကျမတို့အိမ်က ဓါးတိုတစ်လက် ၊ ငွေသား ၁၂သိန်းကျော်၊ လက်စွပ်တစ်ကွင်း၊ ဆွဲသီးတစ်ခု၊မှတ်ပုံတင် နဲ့ ဝန်ထမ်းကဒ်တွေကိုယူသွားတယ်။ ဖုန်း၄ လုံးလည်း ပါသွားတယ်။ ကျန်တဲ့အိမ်ကဟာတွေလည်း ပြန်မပေးဘူး ယူသွားတယ်လို့ ပြောကြတယ်။ နောက်ပြီး ဖမ်းယူသွားတဲ့သူတွေအထဲမှာ ရခိုင်အမျိုးသားတွေ သာမက အမျိုးသမီးတွေ၊မွတ်ဆလင်တွေလည်း ပါသွားတယ်လို့ သိရပါတယ်။ အရေအတွက်ကိုတော့ ကျမလည်းမသိပါဘူး"ဟု ပြောသည်။

အိမ်များကိုဝင်ရောက်ရှာဖွေစဉ် WY ဖမ်းဆီး၇မိသည်ဟုဆိုကာ ၎င်းနေအိမ်မှအမျိုးသား ၃ ဦးကို သီးသန့်ခေါ်ဆောင်သွားသည်ဟုဆိုသည်။

တစ်မြို့လုံးမှ ဖမ်းဆီးခံရသည့် ဒေသခံအရေအတွက်အများအပြားရှိသည်ဟု ဆိုသော်လည်းနိရဉ္စရာအနေနှင့် အရေအတွက် အတိအကျကို အတည်မပြုနိုင်သေးပါ။

ဒေသခံများဖမ်းဆီးခံရမှုနှင့်ပတ်သက်၍ စစ်ကောင်စီ၏ ရခိုင်ပြည်နယ် နယ်လုံဝန်ကြီး နှင့် ပြောရေး ဆိုခွင့်ရှိသူတို့ကို ဖုန်းဖြင့်ဆက်သွယ်မေးမြန်းဆက်သွယ်၍မ၇ခဲ့ပါ။

ယမန်နေ့မေလ ၂၆ ရက်ကလည်း ရွှေဇားတံတားဂိတ်တွင် လမ်းများကိုပိတ်ကာ ဒရုန်းတပ်ဖွဲ့ကရွှေဇားကျေးရွာအုပ်စုတွင် ဒရုန်းများ စမ်းသပ်မောင်းနှင်ခဲ့ကြောင်း ဒေသခံများကဆိုသည်။

အဆိုပါစစ်ကောင်စီတပ်သားများသည် ဘူးသီးတောင်မှစစ်ရှုံး၍ နခခ( ၅) သို့ထွက်ပြေးလာကြသည့်စစ်ကောင်စီတပ်သားများဖြစ်ပြီး နခခ(၅) မှ တဆင့် မောင်တောမြို့ထဲသို့ ရောက်ရှိနေကြသူများ ဖြစ်သည်ဟု မောင်တောမှ စစ်ရေး စောင့်ကြည့်သူတစ်ဦးကဆိုသည်။

၎င်းတို့သည်နံနက် ၄ နာရီကျော်ခန့်တွင် အင်အား ၂၀၀ ခန့်သည် တေဘာကား ၂ စီး ၊ ဖောကား ၃ စီးဖြင့် မြို့ထဲက ထွက်လာကာ ယင်းအနက်မှ မောင်တောမြို့မအနောက်ရပ်ကွက်သို့ ၄၀ကျော်ခန့်၊ မောင်တော မြို့မ အရှေ့ ရပ်ကွက်သို့ ၄၀ ကျော်ခန့် နှင့်မြို့မမြောက်ရပ်ကွက်ဘက်သို့ အင်အား ၅၀ ကျော် ခန့်သွားကြပါပြီးကျန်သည့်စစ်ကောင်စီတပ်သားများမှာ ကားများကိုရွှေဇားတံတားအနီးလမ်းဆုံတွင်ရပ်တန့်ကာ ရှာဖွေမှုများ ပြုလုပ်ခဲ့ကြခြင်း ဖြစ်ကြောင်း ဒေသခံများက ပြောသည်။

မောင်တောမြို့ အနီးပတ်ဝန်းကျင်ကိုအာရက္ခတပ်တော်က ဝိုင်းဝန်းပိတ်ဆို့ထားပြီး စစ်ကောင်စီ တပ်ကလည်း သူတို့လက်နက်တပ်ဆင်ပေးထားသည့် မွတ်ဆလင်လင်အင်အား ၁၀၀၀ ကျော်ခန့်နှင် စစ်အင်အားကိုလူနေရပ်ကွပ်များတွင် ဖြန့်ခွဲကာ ခံစစ်ဖြင့် ခုခံရန် ပြင်ဆင်နေသည်ဟု သိ၇သည်။

စစ်ကောင်စီသည်မောင်တောမြို့နယ် မြောက်ပိုင်းမှ အရေးပါသည့် ကြိမ်ချောင်း၊ ကျီးကန်းပြင်ဌာနချုပ်နှင့် လှဖိုးခေါင် နခခ(၁၀)နယ်ခြားစောင့်စခန်းများအပါအဝင် ဒါဇင်နှင့်ချီသောစစ်စခန်းများကို လက်လွှတ်ဆုံးရှုံးခဲ့ရပြီးနောက် မောင်တောမြို့ကိုသိမ်းပိုက်မခံရရန် နည်းမျိုးစုံဖြင့် ကြိုစား ပြင်ဆင်နေသည်ဟု သိ၇သည်။

#မောင်တောမြို့

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ဆက်စပ် အကြောင်းအရာများ

နောက်ဆုံးရသတင်းများ