စနေ၊ ဇွန်လ ၂၂ရက်၊ ၂၀၂၄

ရခိုင်ပြည်နယ် ပညာရေးမှူးရုံးမှ ဒု-ညွှန်မှူး (ဘဏ္ဍာ) ဖမ်းဆီးခံရ


  • ရေးသူ: Web Master
  • | ရက်စွဲ: ၂၈ မေ ၂၀၂၄
  • | ကြည့်ရှုသူ: 5.9k

အေးမြတ်ခိုင်

နိရဉ္စရာ၊ မေလ ၂၈/၂၀၂၄

ရခိုင်ပြည်နယ် ပညာရေးမှူးရုံးမှ ဒုတိယညွှန်ကြားရေးမှူးတစ်ဦးအား စစ်ကောင်စီက ဖမ်းဆီးသွားကြောင်း သိရသည်။

ဖမ်းဆီးခံရသူမှာ ရခိုင်ပြည်နယ် ပညာရေးမှူးရုံးမှ ဒုတိယညွှန်ကြားရေးမှူး(ဘဏ္ဍာ) ဦးညီထွေးဖြစ်သည်။ ၎င်းအား ပြီးခဲ့သည့် မေလ ၂၄ ရက်နေ့တွင် စစ်ကောင်စီ၏ စစ်ဘက်ရေးရာ လုံခြုံရေးတပ်ဖွဲ့ ( စရဖ)မှ စစ်ဆေးမေးမြန်းရန် ရှိသည်ဟုဆိုကာ ဖမ်းဆီးခေါ်ဆောင်သွားခြင်း ဖြစ်ကြောင်း သတင်းရရှိသည်။

ဖမ်းဆီးသွားသည့်အချိန်မှ ယနေ့အချိန်ထိ အဆက်အသွယ်မရရှိသလို ပြန်လွတ်လာခြင်း မရှိ‌သေးကြောင်းအမည်မဖော်လိုသည့် ပြည်နယ်ပညာရေးမှူးရုံးမှ အရာရှိတစ်ဦးက နိရဉ္ဇရာ သတင်းဌာနသို့ပြောသည်။

“မိုခါမုန်တိုင်းကာလက ငွေကြေးကိစ္စတွေနဲ့ ပတ်သက်ပြီးတော့ စစ်ဆေးမေးမြန်းစရာရှိတယ်ဆိုပြီး ဖမ်းသွားတာပါ။ ဒီကနေ့ထိတော့ ပြန်လွတ်မလာသေးဘူး”ဟုပြောသည်။

မိုခါမုန်တိုင်းတိုက်ခတ်ပြီး တစ်နှစ်ကျော်ကြာမှ မိုခါမုန်တိုင်းကာလက ငွေကြေးကိစ္စအကြောင်းပြကာ စစ်ကောင်စီက ဖမ်းဆီးခြင်းဖြစ်သည်ဟု သူက ဆက်ပြောသည်။

ဒု-ညွှန်မှူး ဦးညီထွေးအား စရဖမှ စစ်ဆေးမေးမြန်းပြီး ယမန်နေ့ မေလ ၂၇ရက်နေ့  ညပိုင်းအချိန်တွင် စရဖရုံးမှ  စစ်‌တွေ အမှတ်(၁) ရဲစခန်းသို့ပြောင်းရွေ့ထားကြောင်း ရဲသတင်းရင်းမြစ်ထံမှ သိရသည်။

ဒုတိယညွှန်ကြားရေးမှူး(ဘဏ္ဍာ) ဦးညီထွေးဖမ်းဆီးခံရသည့်အတွက် ရခိုင်ပြည်နယ်ပညာရေးမှူးရုံးမှ အခြားလ/ထညွှန်ကြားရေးမှူး နှင့် ဦးစီးအရာရှိတချို့တို့သည်လည်း ၎င်းနှင့် ပတ်သက်ဆက်နွှယ်ကာ ဖမ်းဆီးမည်ကို စိုးရိမ်သဖြင့် ရန်ကုန်သို့ ထွက်ပြေးတိမ်းရှောင်နေကြောင်း ပညာရေးဝန်ထမ်းအသိုင်းအဝိုင်းကပြောသည်။

၂၀၂၃ ခုနှစ်၊ နိုဝင်ဘာ ၁၃ ရက်မှ ၂၀၂၄ ခုနှစ်၊ မေလ ၁၃ ရက်အထိ ( ၆ ) လတာကာလအတွင်း ရခိုင်တွင် အမျိုးသား ၃၄၆ ဦး နှင့် အမျိုးသမီး ၇၉ ဦး စုစုပေါင်း အရပ်သား ၄၂၅ ဦးဖမ်းဆီးခံထားရပြီး  ဖမ်းဆီးခံရသူများအနက် မွတ်ဆလင် ၃၉ ဦး နှင့် ရခိုင်လူမျိုး ၃၈၆ ဦးတို့ပါဝင်ကြောင်း ရက္ခိုင်အမျိုးသားအဖွဲ့ချုပ်လူသားချင်းစာနာထောက်ထားရေးနှင့် ဖွံ့ဖြိုးရေးဆိုင်ရာပူးပေါင်းဆောင်ရွက်ရေးရုံး(HDCO)မှ ယနေ့ မေလ၂၈ ရက်တွင် ထုတ်ပြန်ထားသည်။

ဆက်စပ် သတင်းများ