ကံ့ကော်နီနီ၊ နိရဥ္စရာ ၊ ဇွန် ၆ / ၂၀၂၄

အာရက္ခတပ်တော်၏ထိုးစစ်အရှိန်ဖြင့်တိုက်ပွဲပြင်းထန်နေသည့် သံတွဲတွင် ယမန်နေ့က စစ်ကောင်စီ၏လက်နက်ကြီးကျည် ကျရောက် ပေါက်ကွဲ၍ အဖွားအိုတစ်ဦးအပါအဝင်ကမန်လူမျိုးနှစ်ဦးထပ်မံဒဏ်ရာရရှိသွားကြောင်းသိ၇သည်။

ဒဏ်ရာရရှိသူများမှာသံတွဲမြို့နယ်၊ မြို့တောင်ကျေးရွာမှ ဒေါ်မိအေးမြင့် အသက်(၉၀) ကျော်နှင့်ဒေါ်လယ်တီစိန် အသက်(၅၀)ကျော်တို့ဖြစ်သည်။

၄င်းတို့သည်ယမန်နေ့ဇွန်လ ၅ ရက်မနက်ပိုင်းက စစ်ကောင်စီလက်နက်ကြီးကျည်များ ရွာစပ်သို့ ကျရောက်ပေါက်ကွဲရာမှကျည်စထိမှန်ဒဏ်ရာရရှိသွားခြင်းဖြစ်ကြောင်း သိ၇သည်။

" မနေ့ကနဲ့ဒီနေ့ ဇွန်လ ၆ ရက်မနက်ပိုင်းတွေမှာ ရွာနားကိုလက်နက်ကြီး ၄ လုံးထိကျကွဲတယ်။ ရွာက အဖွားအိုတစ်ယောက်နဲ့နောက်ထပ်မိန်းမတယောက်ဒဏ်ရာရတယ်။ သိပ်အများကြီးတော့ မဟုတ်ဘူး။ ဒါပေမယ့်တိုက်ပွဲဖြစ်နေတဲ့ နေရာနဲ့ အရမ်းနီးလွန်းနေတော့ဘယ်အချိန်ဘာထပ်ဖြစ်မလဲစိုးရိမ်နေ၇တယ်"ဟု ဒေသခံတစ်ဦးကပြောသည်။

ဒေါ်လယ်တီစိန်တွင်လက်မောင်းကျည်စရှပ်ထိဒဏ်ရာနှင့် ဒေါ်မိအေးမြင့်မှာ ကျောကုန်းကို ကျည်စရှပ်ထိခဲ့ကြောင်းသိ၇သည်။

မြို့တောင်ကျေးရွာသည်လက်ရှိတိုက်ပွဲပြင်းထန်နေသည့် ငပလီမြို့၊ဂေါ့ရပ်ကွက် ဂေါ့တောင်နှင့် စစ်ကောင်စီက ရက်ဆက်ဗုံးကြဲတိုက်ခိုက်နေသည့်ဆင်ခေါင်းကျေးရွာအကြားတည်ရှိပြီး ကမန်လူမျိုး အစ္စလာမ်ဘာသာဝင်အများစုနေထိုင်ကြသည်။

ဧပြီလနောက်ဆုံးပတ်က သူဌေးရေအားလျှပ်စစ်အနီး လင်းသီကျေးရွာတွင်လည်း စစ်ကောင်စီ လက်နက်ကြီးကျည်နေအိမ်များကိုကျကွဲပြီး ကမန်လူမျိုး ၉ ဦး အစုလိုက်အပြုံလိုက်သေဆုံးခဲ့၇သည်။