ကြိုင်ဟိန်းလင်း၊ နိရဉ္စရာ၊ဇွန် ၆ / ၂၀၂၄

ရခိုင်ပြည်၊ကျောက်တော်မြို့နယ်ကို ယနေ့နေ့လယ်က စစ်ကောင်စီ ဂျက်ဖိုင်တာတစ်စီးက လာရောက်ဗုံးကြဲခဲ့သည့်အတွက် အရပ်သားလူငယ် ၃ ဦး ဒဏ်ရာရရှိသွားကြောင်းသိရှိ၇သည်။

စစ်ကောင်စီဂျက်ဖိုင်တာသည် နေ့လယ် ၁ နာရီခွဲခန့်ကကျောက်တော်မြို့နယ်၊ ရှောက်ချောင်း ကျေးရွာကို ဗုံးကြဲတိုက်ခိုက်ခဲ့ပြီးရွာပြင်တွင်ကျရောက်ပေါက်ကွဲခဲ့၍ အဆိုပါကျေးရွာမှ လူငယ်သုံးဦး ထိခိုက်ဒဏ်ရာရရှိသွားသည်ဟုဒေသခံတစ်ဦးက ပြောသည်။

" ရှောက်ချောင်း ကျေးရွာကို စစ်ကောင်စီဂျက်ဖိုင်တာကဗုံးတစ်လုံးကြဲသွားတယ်။ အပြစ်မရှိတဲ့ အရပ်သားပြည်သူ ၃ ယောက် ထိခိုက်ဒဏ်ရာရသွားပါတယ်။ဒဏ်ရာအခြေအနေကတော့ စိုးရိမ်စရာ မရှိပါဘူး"ဟု ပြောသည်။

ထိခိုက်ဒဏ်ရာရသွားသူများ၏အမည်နှင့်အသက်တို့ကိုနိရဥ္စရာက ဆက်လက်စုံစမ်းနေသည်။

ပြီးခဲ့သည့်မေလ ၁၅ ရက်၊ ညဥ့်အချိန်ကလည်း ကျောက်တော်မြို့နယ်၊ ဝဲကြီးထောင့် တိုက်နယ် ဆေးရုံနှင့် လမ်းမတော်စာသင်ကျောင်းတို့ကို စစ်ကောင်စီက ဂျက်တိုက်လေယာဥ်ဖြင့်ဗုံးကြဲမှုကြောင့် ကျောင်းဆရာတစ်ဦးသေဆုံးပြီးလူ ၂၀ ဦးထက်မနည်း ဒဏ်ရာရရှိသွားခဲ့သည်။

ပြီးခဲ့သည့်ဇွန်လတစ်ရက်နေ့ကလည်း ပေါက်တောမြို့နယ်မှကြိမ်ခွေမော်၊ တောင်ဦးမော်၊ ဆင်တက်မော်၊ သဲခုံ စသည့်ကျေးရွာများအပါအဝင်ပုဏ္ဏားကျွန်းမြို့နယ်မှ ယိုးတရုတ်စံပြ ကျေးရွာတို့ကိုစစ်ကောင်စီ Y-12 ထောက်ပို့လေယာဉ်မှ ဗုံးကြဲတိုက်ခိုက်မှုကြောင့်အရပ်သားပြည်သူ ၄ ဦး သေဆုံးသွားခဲ့ပြီး ၁၀ ကျော်ဒဏ်ရာရရှိသွားခဲ့သည်။

ထို့အပြင်ရခိုင်စစ်မြေပြင်တွင် စစ်ရှုံးနေသောစစ်ရှုံးစစ်ကောင်စီသည် အာရက္ခတပ်တော် (AA) က သိမ်းပိုက်ထားသော မြို့နယ်များမှအရပ်သားပြည်သူများနေထိုင်ရာ ကျေးရွာများ ဆေးရုံ၊ဆေးခန်းများနှင့် စာသင်ကျောင်း၊ ဘုန်းတော်ကြီးကျောင်းများကိုလည်း မကြာခဏ လက်နက်ကြီးများနှင့် ပစ်ခတ်ခြင်းလေကြောင်းမှ ဗုံးကြဲတိုက်ခိုက်ခြင်းစသည့် စစ်ရာဇဝတ်များကို အစဉ်မပြတ် ကျူးလွန်လျက်ရှိသည်။

ပြီးခဲ့သည့်မေလ ၂၈ ၊ ၂၉ ရက်နေ့များကလည်စစ်ကောင်စီတပ်များသည် စစ်တွေမြို့နယ်၊ဗျိုင်းဖြူကျေးရွာသို့ဝင်ရောက်လာပြီး အရပ်သားပြည်သူများကို ဖမ်းဆီးကာ လူ ၇၆ ဦးကို အစုလိုက်အပြုံလိုက်သတ်ဖြတ်ခဲ့ပြီး အမျိုးသမီးအချို့ကိုလည်း မုဒိမ်းပြုကျင့်ခဲ့ကြောင်းသိရှိရသည်။

စစ်ကောင်စီသည်ရခိုင်ပြည်တွင် မြို့နယ်တစ်ခုပြီးတစ်ခု၊စခန်း၊ တပ်မ၊ ဗျူဟာကုန်းများကို တစ်ခုပြီးတစ်ခု စွန့်လွှတ်လာရသည့်အတွက် သူတို့ရဲ့ထုံးစံအတိုင်း အရပ်သားပြည်သူများကိုဓားစာခံပြုလုပ်ကာအကြမ်းဖက် တိုက်ခိုက်လာနေသည်ဟု နိုင်ငံရေးသမားများက သုံးသပ်ပြောဆိုကြသည်။

ဓာတ်ပုံ- ပုံဟောင်း