တိုက်ပွဲအန္တရာယ်ကြောင့် ရခိုင်မှ မြို့ ရ ခုတွင်သာ ကျောင်းများဖွင့်လှစ်နိုင်ပြီး ကျောင်းသားများအနေဖြင့်လည်း စိုးရိမ်ထိတ်လန့်စွာ ပညာသင်ကြားနေကြရ

Preview

တိုက်ပွဲအန္တရာယ်ကြောင့် ရခိုင်မှ မြို့ ရ ခုတွင်သာ ကျောင်းများဖွင့်လှစ်နိုင်ပြီး ကျောင်းသားများအနေဖြင့်လည်း စိုးရိမ်ထိတ်လန့်စွာ ပညာသင်ကြားနေကြရ

ဇွန် ၀၇/ ၂၀၂၄ | ကြည့်ရှုသူ :2592

စောရှင်မေ၊နိရဉ္စရာ၊ ဇွန် ၇/၂၀၂၄

ရခိုင်တွင်စစ်ကောင်စီက မြို့ (ရ) ခုတွင်အခြေခံပညာစာသင်ကျောင်းများ ဖွင့်လှစ် ထားသော်လည်းတိုက်ပွဲအန္တရာယ်ကြောင့် ကျောင်းသူ/ ကျောင်းသားများအနေဖြင့် စိုးရိမ်ထိတ်လန့်စွာ ပညာသင်ကြားနေကြရသည်ဟု ကျောင်းသားမိဘများက ပြောသည်။

၇ခိုင်ပြည်နယ်တွင် မြို့နယ် (၁ရ) မြို့နယ် ရှိသော်လည်း မြို့ (ရ) ခုတွင်သာ စာသင်ကျောင်းများအားဖွင့်လှစ်သင်ကြားနေကြရကြပြီး အများစုမှာ မြို့ပေါ်ကျောင်းများ ဖြစ်ကြသည်ဟု သိ၇သည်။

စာသင်ကျောင်းများ ဖွင့်လှစ်သင်ကြားနေကြသည့် မြို့များမှာ ကျောက်ဖြူ၊ တောင်ကုတ်၊ မာန်အောင်၊ အမ်း၊ ဂွနှင့် စစ်တွေမြို့တို့ဖြစ်ပြီး ပြီးခဲ့သည့်ဇွန်လ ၃ ရက်မှ စတင်ကာ တစ်နိုင်ငံလုံးအတိုင်းအတာဖြင့်ဖွင့်လှစ်ကြားနေရခြင်းဖြစ်သည်။

တောင်ကုတ်မြို့နယ်မှ ကျောင်းသားမိဘတစ်ဦးက "လောလောဆယ်တော့ အခြေအနေ ကြည့်ပြီးကလေးတွေကို ကျောင်းလည်းဖွင့်တော့ကျောင်းတက်ခိုင်းထားတယ်။ ကျောင်းမတက်ဘဲနေရင်လည်း တစ်နှစ်နောက်ကျသွားမှာစိုးလို့လေ။စစ်ပွဲက ဘယ်အချိန် ဘာဖြစ်မလဲဆိုတာမသိတော့မိဘတွေအနေနဲ့ကတော့ ကိုယ့်သားသမီးအပေါ်စိုးရိမ်မှုတော့ ရှိတယ်။အခြေအနေမကောင်းရင်တော့ ကိုယ့်သားသမီးတွေ ပြန်ခေါ်ထုတ်ဖို့စီစဥ်ထားတာတွေတော့ရှိတယ်"ဟုပြောသည်။

ကျောက်ဖြူဒေသခံတစ်ဦးကလည်းကျောက်ဖြူတွင် လက်ရှိ စစ်ရေးအခြေအနေငြိမ်သက်နေ၍ ကျောင်းများဖွင့်လှစ်ထားကြသည့်အတွက် မိဘများအနေဖြင့်သားသမီးများကို ကျောင်းအပ်နှံပေးထားရသော်လည်း စိုးရိမ်ပူပင်မှုများဖြင့်နေနေရကြောင်းပြောသည်။

"အခုကတော့ တိုင်းရေးပြည်ရေးအခြေအနေမကောင်းတော့ စစ်ပွဲက ဗြုန်းစားကြီး တစ်ခုခုဖြစ်လာခဲ့ရင် ကျောင်းနဲ့အိမ် နည်းနည်းဝေးတဲ့ကလေးတွေဆိုရင် ကြောက်စိတ်ကြောင့် ထိတ်လန့်မှုဖြစ်မှာတို့မိဘတွေအနေနဲ့ကတော့ အဘက်ဘက်ကစိုးရိမ်ရတာပေါ့။ ကျောင်းလည်းဖွင့်တယ်။သူများတွေလည်းတက်နေကြတော့ အဲ့လိုပဲကျောင်းအပ် ထားရတာပါပဲ"ဟုပြောသည်။

ယခုဖွင့်လှစ်ထားသည့်မြို့နယ်များအနက် ကျောက်ဖြူ၊ တောင်ကုတ်၊ မောင်တော၊သံတွဲနှင့် အမ်းမြို့နယ်များတွင် စစ်ကောင်စီတပ်နှင့် အာရက္ခတပ်တော်(AA)တို့ တိုက်ပွဲများ ဖြစ်ပွားနေသလို စစ်ရေးတင်းမာမှုလည်း ရှိနေသဖြင့် မြို့ပေါ်ကျောင်းများကိုသာ ဖွင့်လှစ် သင်ကြားနိုင်ပြီးနယ်ကျောင်းများကို ပိတ်ထားရသည်ဟု သိ၇သည်။

သံတွဲမြို့တွင် ကျောင်းများ ဖွင့်လှစ်ခဲ့သော်လည်း တိုက်ပွဲဧရိယာနှင့်နီးလာသောကြောင့် မြို့ပေါ်ရှိ စာသင်အချို့ကို ပိတ်ထားရသည်ဟု ဒေသခံများကပြောသည်။

သံတွဲဒေသခံတစ်ဦးက"ဘယ်ကလာ ကျောင်းတက်ရမှာလဲ။ကျောင်းလည်းမဖွင့်ဘူး။ ဆရာ၊ ဆရာမတွေတောင် ပြေးကုန်ကြပြီ။ လေယာဥ်တွေနဲ့ ခဏခဏဗုံးလာကြဲနေလို့ပြေးနေရတာ"ဟု ပြောသည်။

ဖွင့်လှစ်သင်ကြားနေရသည့်ကျောင်းများတွင်လည်းကိုယ့်သားသမီးလုံခြုံရေးအတွက် စိုးရိမ်နေရသည်ဟု ဒေသခံများက ပြောသည်။

နောက်ထပ်သံတွဲဒေသခံတစ်ဦးက "ကျောင်းဖွင့်တော့သမီးလေးကိုကျောင်းတင်ထားတယ်။ ဒီနေ့တော့ နေ့တစ်ပိုင်း မတက်ရဘူးဆိုပြီး ပြန်လွှတ်လိုက်တယ်။ဆရာမတွေမရောက်လို့လား။ ကျောင်းသားတွေမစုံလို့လားတော့သေချာမသိဘူး။ သမီးလေးကို စိုးရိမ်လို့လည်း ကျောင်းတက်ကတည်းကနေကျောင်းဆင်းအောင်ထိစောင့်နေရတာပါပဲ" ဟုပြောသည်။

အဆိုပါကိစ္စနှင့်ပတ်သက်ပြီးရခိုင်ပြည်နယ်ပညာရေးမှူး ဦးဘထွီးစိန်အား နိရဉ္စရာက ဖုန်းဖြင့်အကြိမ်ကြိမ်ဆက်သွယ်ခဲ့သော်လည်းဖုန်းလက်ခံဖြေကြားခြင်းမရှိခဲ့ပါ။

တနိုင်ငံလုံးတွင်ကျောင်းအပ်နှံရေး ရက်သတ္တပတ်အဖြစ်မေလ ၂၃ ရက်မှ ဇွန်လ ၂ ရက်အထိကို စစ်ကောင်စီက ကြေညာထားပြီး ဇွန် ၃ ရက်မှစတင်ကာ ကျောင်းများကိုဖွင့်လှစ်သင်ကြားနေခြင်းဖြစ်သည်။

ရခိုင်တွင်စစ်ကောင်စီက မြို့နယ် (၇)ခုတွင်သာကျောင်းဖွင့်လှစ်ထားနိုင်ပြီး ကျောင်းအပ်နှံသူ မေလ ၂၆ ရက်အထိ ၃၈၀၀၀ ကျော်သာ ရှိကြောင်းပြည်နယ်ပညာရေးမှူးရုံးမှ သိရသည်။

၇ခိုင်တွင်ယခင် ၂၀၂၁ ခုနှစ်မှ ၂၀၂၃ ခုနှစ်တို့အတွင်းကျောင်းသား၊ ကျောင်းသူ ဦးရေ သုံးသိန်းမှ ငါးသိန်းကျော်အထိ ကျောင်းအပ်ခဲ့ကြောင်းပြည်နယ်ပညာရေးမှူးရုံး၏ စာရင်းများအရ သိရသည်။

၇ခိုင်၌အခြေခံပညာစာသင်ကျောင်းပေါင်း ၃,၀၀၀ ကျော်ရှိပြီး လက်ရှိတွင်ပုဏ္ဏားကျွန်း၊ ရသေ့တောင်၊ ဘူးသီးတောင်၊ မောင်တော၊ကျောက်တော်၊ မင်းပြား၊ မြောက်ဦး၊ ရမ်းဗြဲ၊ မြေပုံ၊ ပေါက်တောနှင့် သံတွဲမြို့နယ်တို့တွင် စာသင်ကျောင်းများထောင်နှင့်ချီ ပိတ်ထားရကြောင်း သိ၇သည်။

ဓာတ်ပုံ- စစ်တွေရှိစာသင်ကျောင်းတစ်ကျောင်းတွင် စာသင်ကြားနေမှုအား ဇွန်လ ၃ ရက်ကတွေ့၇စဥ်။/Photo - သိကြားစေချင် ငွေသဇင်

#ပညာရေး

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ဆက်စပ် အကြောင်းအရာများ

နောက်ဆုံးရသတင်းများ