တိုက်ပွဲကြောင့် ရခိုင်ရှိ တရုတ်စီမံကိန်များ၏ ရှေ့အလားအလာကို စစ်ဆေးရန် တရုတ်သံအရာရှိ အဖွဲ့တစ်ဖွဲ့ ကျောက်ဖြူသို့ ရောက်ရှိလာ

ကံ့ကော်နီနီ ၊ နိရဥ္စရာ၊ ဇွန် ၈ / ၂၀၂၄

ရခိုင်တွင် ဖြစ်ပွားနေသော တိုက်ပွဲများကြောင့် ကျောက်ဖြူမြို့နယ်ရှိ ရေနံနှင့် သဘာဝ ဓာတ်ငွေ့ ပိုက်လိုင်းများအပါအဝင် တရုတ်စီမံကိန်းများ၏ ရှေ့အလားအလာနှင့် ၎င်းစီမံကိန်းများ ထိခိုက်မှု ရှိ/မရှိကို စစ်ဆေးရန် တရုတ်သံရုံးအရာရှိအဖွဲ့ တစ်ဖွဲ့သည် ယနေ့တွင် ကျောက်ဖြူမြို့သို့  ရောက်ရှိ လာကြောင်း သတင်းရရှိသည်။

ကျောက်ဖြူမြို့သည် အာရက္ခတပ်တော် (AA)က ထိုးစစ်ဆင်သိမ်းပိုက်ရန်ကြေညာထားသည့် မြို့တစ်ခုဖြစ်ပြီး လက်ရှိတွင်လည်း ကျောက်ဖြူမြို့ပေါ်မှ အပ နယ်ကျေးလက်ဒေသများကို AA က သိမ်းပိုက် ထိန်းချုပ်ထားသဖြင့် တရုတ်စီမံကိန်းများ၏ အခြေအနေကို ၎င်းတရုတ်သံအဖွဲ့က လာရောက် စစ်ဆေးခြင်းဖြစ်ကြောင်း တရုတ်သံတမန်အသိုင်းအဝိုင်းနှင့် နီးစပ်သူ တစ်ဦးက ပြောသည်။

“တိုက်ပွဲတွေက ကျောက်ဖြူမြို့အနီးအနားထိ ဖြစ်လာတယ်။ ကျောက်ဖြူမြို့ပေါ် ကွက်ကွက်ကလေးဘဲ စစ်ကောင်စီလက်ထဲမှာ ရှိတာ။ နယ်တစ်ခုလုံလည်း အေအေ လက်ထဲကျရောက်သွားပြီ။  ရမ်းဗြဲမြို့နယ် တစ်ခုလုံးဆိုရင်လည်း အေအေ လက်ထဲကျသွားပြီ။ ဒီတော့ တရုတ်စီမံကိန်းတွေကလည်း စိုးရိမ်စရာ ရှိလာတာပေါ့။ ဒါကြောင့်သူတို့ ရဲ့ စီမံကိန်း အခြေအနေ အရပ်ရပ်ကို လာစစ်ဆေးတာပါ”ဟု ၎င်းက ပြောသည်။  

ယနေ့ဇွန်လ ၈ ရက်တွင် မြန်မာနိုင်ငံဆိုင်ရာ တရုတ်သံရုံးမှ အရာရှိ ၈ ဦးခန့်သည် ရန်ကုန်မှ ကျောက်ဖြူသို့ လေယာဥ်ဖြင့်ရောက်ရှိလာခြင်းဖြစ်ပြီး မဒေးကျွန်းအထိ သွားရောက် စစ်ဆေးကြမည် ဖြစ်ကြောင်း တရုတ်စီမံကိန်းများ လေ့လာ စောင့်ကြည့်နေသည့် ကျောက်ဖြူဒေသခံလူငယ်တစ်ဦးက ပြောသည်။

" ကျောက်ဖြူကိုဒီနေ့ တရုတ်သံရုံးကအဖွဲ့ရောက်နေတယ်။ သူတို့မဒေးကျွန်းမှာနှစ်ရက်နေပြီး စစ်ဆေးတာတွေ လုပ်မယ်လို့သိရတယ်။ သူတို့ ရေနံနဲ့ဓာတ်ငွေ့ပိုက်လိုင်းတွေကိုစစ်ဆေးကြမှာပါ။ ပြီးရင် တရုတ်စီမံကိန်းတွေရဲ့  အနာဂတ် အခြေအနေတွေကို သုံးသပ်ကြမှာ ဖြစ်ပါတယ်" ဟု ၎င်းက နိရဥ္စရာသတင်းဌာနသို့ပြောသည်။

၄င်းတရုတ်သံရုံးအရာရှိအဖွဲ့သည့် မဒေးကျွန်းတွင် ၂ ရက်ကြာစစ်ဆေးပြီး ဇွန်လ ၁၀ ရက်တွင် ရန်ကုန်သို့ပြန်လည်ထွက်ခွာမည်ဖြစ်ကြောင်း သိရှိရသည်။

တရုတ်စီမံကိန်းများရှိရာ ကျောက်ဖြူမြို့အပါအဝင် ရခိုင်တောင်ဘက်ပိုင်းမြို့နယ် ၈ ခုစလုံးမှ စစ်ကောင်စီ တပ်စခန်းများတစ်ခု မကျန်ဆက်လက်ထိုးစစ်ဆင်သွားမည်ဟု AA က အတိအလင်း ကြေညာထားပြီဖြစ်သဖြင့် တရုတ်စီမံကိန်းများ၏ အခြေအနေမှာ မည်သို့ ဖြစ်လာမည်ကို မခန့်မှန်းတတ်ဟု အဆိုပါ လူငယ်က ပြောကြားသည်။

တရုတ်သဘာ၀ဓာတ်ငွေ့စီမံကိန်းမှ မြန်မာအစိုးရသည် နှစ်စဉ် အမေရိကန် ဒေါ်လာ (၁) ဘီလီယံထိ ဝင်ငွေရရှိနေပြီး ပြီးခဲ့သည့်  ၂၀၂၂ ခုနှစ် တစ်နှစ်တာအတွင်း မြန်မာစစ်ကောင်စီသည်  တရုတ်နိုင်ငံထံ အမေရိကန်ဒေါ်လာ (၁.၄၃) ဘီလီယံတန်ဖိုးရှိသည့် ရခိုင်ကထွက်သည့် သဘာဝဓာတ်ငွေ့များကို တင်ပို့ရောင်းချခဲ့သည်ဟု BETV သတင်းတွင် ဖော်ပြထားသည်။

ရခိုင်တွင် တိုက်ပွဲများ ရပ်တန့်သွားရန်  အာရက္ခတပ်တော်နှင့်  စစ်ကောင်စီတို့အကြား တွေ့ဆုံ ဆွေးနွေးပွဲများကို တရုတ်ဘက်က တောက်လျှောက်ကြားဝင်ညှိနှိုင်းလာနေသော်လည်း လက်တွေ့အပစ်ရပ်ရေးသဘောတူညီချက်ဖြစ်မလာသေးကြောင်း သိရသည်။

ထိုသို့ ရခိုင်တွင်အပစ်ရပ်ရန်တရုတ်ဘက်ကကြားဝင်ညှိနှိုင်းနေသော်လည်း စစ်ကောင်စီက ပြည်သူလူထုကို ပစ်မှတ်ထားပစ်ခတ်နေမှုကြောင့် ရခိုင်တိုက်ပွဲရပ်တန့်ရန် အလွန်ခက်ခဲကြောင်း AA ပြောခွင့်ရအရာရှိ ဦးခိုင်သုခက ယနေ့ဇွန်လ ၈ ရက် သတင်းစာရှင်းလင်းပွဲတွင်ပြောဆိုသည်။

ပုံစာ- ရောက်ရှိလာသည့် တရုတ်သံအဖွဲ့ဝင်များနှင့် ကျောက်ဖြူ မဒေးကျွန်းရှိ တရုတ်စီမံကိန်း