မောင်တော ဗောဓိကုန်းတွင် လက်နက်ကြီးကျည်ထိမှန်၍ လူငယ်အမျိုးသား ၂ ဦးပြင်းထန်ဒဏ်ရာရ

သဥ္ဇာနွယ်၊ နိရဥ္စရာ၊ ဇွန် ၁၃/ ၂၀၂၄

ရခိုင်ပြည်၊မောင်တောမြို့နယ်၊ ဗောဓိကုန်းကျေးရွာတွင် လက်နက်ကြီးကျည်ထိမှန်၍ လူငယ်  ၂ ဦး ပြင်းထန် ဒဏ်ရာရရှိသွားကြောင်းသတင်းရရှိသည်။

ဒဏ်ရာရရှိသူများမှာ ဗောဓိကုန်းကျေးရွာမှ အသက် ၂၀ အရွယ် ကိုရဲထွန်းလင်း နှင့် ကိုနေဝင်းသန်းတို့ ဖြစ်ကြသည်။

၄င်းတို့ နှစ်ဦးသည်ယနေ့ ဇွန် ၁၃ ရက်နေ့ နံနက် ၉နာရီခန့်က တော၊တောင်များကို ထင်းသွားခွေစဥ် မောင်တောမြို့ အခြေစိုက် မြို့သူကြီးတပ်ရင်း နခခ(၅)မှ ပစ်ခတ်လိုက်သည့် လက်နက်ကြီးကျည် ထိမှန်သွား၍ ပြင်းထန်စွာဒဏ်ရာရရှိသွားခဲ့သည်ဟု မောင်တောဒေသခံတစ်ဦးက နိရဥ္စရာ သတင်းဌာန ကိုပြောသည်။

“ သူတို့နှစ်ယောက်က ထင်းသွားခွေကြတဲ့အချိန်မှာ မြို့သူကြီးတပ်ရင်းက ဗောဓိကုန်းရွာရဲ့ တောတန်း၊ တောင်တန်းတွေကို လက်နက်ကြီးနဲ့ ပစ်လိုက်တာမှာ  သုံးလုံးကျပြီး လူငယ်နှစ်ယောက်ဆီမှာ ထိသွားတာ”ဟု ပြောသည်။

ကိုရဲထွန်းလင်းတွင် ညာဖက်လက်မောင်းနှင့် နဖူးတွင်ဒဏ်ရာရရှိသွားပြီး ကိုနေဝင်းသန်းတွင် ကျောကုန်း၊ လက်များတွင် ပြင်းထန်ဒဏ်ရာရရှိသွားကာ  နီးစပ်ရာ ဆေးခန်းတွင် ဆေးကုသမှု ခံယူနေရသည်ဟု မောင်တောဒေသခံတစ်ဦးက နိရဥ္စရာသတင်းဌာနကို ပြောသည်။

“ ဒဏ်ရာကတော့ စိုးရိမ်ရတဲ့ အနေအထားရှိတယ်။ အသားတွေပဲ့ထွက်သွားတယ်။ လက်ရှိအထိတော့ ဆေးကုသမှု ပေးနေပါတယ်” ဟုပြောသည်။

လက်ရှိတွင် မောင်တောတောင်ပိုင်း အလယ်သံကျော်မှ ကစဥ့်ကလျားထွက်ပြေးနေသည့် စစ်ကောင်စီတပ်နှင့် အာရက္ခတပ်တော်တို့ တိုက်ပွဲ ဆက်လက်ဖြစ်ပွားလျက်ရှိနေပြီး မြို့သူကြီး အခြေစိုက် နခခ(၅)တပ်ရင်းမှ လက်နက်ကြီးများ ပစ်ခတ်နေသကဲ့သို့ လေကြောင်းများမှလည်း ပစ်ကူပေးလျက်ရှိကြောင်း ဒေသခံများက ပြောသည်။

ရခိုင်တွင် ဇွန်လ ၉ ရက်နေ့မှ ၁၃ ရက်နေ့ ( ၅) ရက်အတွင်း လက်နက်ကြီးကျည်ထိမှန်ပြီး သေဆုံးသူ   ၅ ဦးရှိပြီး ၂၃ ဦး ဒဏ်ရာရှိခဲ့ကာ ယင်းတို့မှာ မောင်တော၊ပေါက်တော၊မြေပုံ၊ ကျောက်ဖြူနှင့် အမ်းတို့မှ ‌ဒေသခံများ ဖြစ်ကြသည်ဟု သိရသည်။

စစ်ကောင်စီ၏ လက်နက်ကြီးကျည်ထိမှန်မှုကြောင့်  ၂၀၂၃ နိုဝင်ဘာ( ၁၃ )ရက်နေ့မှ ဇွန်လ (၈) ရက်နေ့အထိ အရပ်သား သေဆုံးသူ ၃၁၉ ဦးနှင့် ထိခိုက်ဒဏ်ရာရရှိသူ ၁၁၄၆ ဦး အထိရှိလာပြီဟု ဇွန်လ (၈) ရက်နေ့ကပြုလုပ်သည့် ရက္ခိုင်အမျိုးသားအဖွဲ့ချုပ် (ULA) ၏ သတင်းစာရှင်းလင်းပွဲတွင် ဦးခိုင်သုခက ပြောခဲ့သည်။