တနင်္ဂနွေ၊ ဇူလိုင်လ ၁၄ရက်၊ ၂၀၂၄

ကျောက်ဖြူဓည၀တီရေတပ်စခန်းအနီးတွင် စစ်ကောင်စီ စစ်ကြောင်းတစ်ခုကို AA မှ ကြားဖြတ်တိုက်ခိုက်


  • ရေးသူ: Web Master
  • | ရက်စွဲ: ၁၇ ဇွန် ၂၀၂၄
  • | ကြည့်ရှုသူ: 2.5k

သဥ္ဇာနွယ်၊ နိရဥ္စရာ၊ ဇွန် ၁၇/ ၂၀၂၄

ရခိုင်ပြည်၊ ကျောက်ဖြူမြို့နယ်တွင် စစ်ကောင်စီ စစ်ကြောင်းတစ်ခုကို အာရက္ခတပ်‌တော် (AA) မှ ကြားဖြတ် တိုက်ခိုက်ခဲ့သဖြင့်  ၄ နာရီကြာ တိုက်ပွဲဖြစ်ပွားခဲ့ကြောင်း ဒေသခံများထံမှ သိရသည်။

ကျောက်ဖြူမြို့နယ် ဓညဝတီရေတပ်ဌာနချုပ် အနီးရှိ တစ်မိုင်ခန့်အကွာ သစ်ပုတ်တောင် ကျော်လမ်းတွင် ယနေ့ ဇွန်လ ၁၇ ရက်နေ့ နံနက် ၆နာရီခန့်က စစ်ကြောင်းထိုးလာသည့် စစ်ကောင်စီနှင့် စစ်သင်တန်းဆင်းမွတ်ဆလင် အင်အား ၁၀၀ ကျော် ခန့်ကို အာရက္ခတပ်တော်မှ ကြားဖြတ် ဝင်ရောက်တိုက်ခိုက်ရာမှ တိုက်ပွဲ စတင်ဖြစ်ပွားခဲ့ကြောင်း  စစ်ရေး သတင်းရင်းမြစ် တစ်ဦးက နိရဥ္စရာ သတင်းဌာနကို ပြောသည်။

“ စစ်သားတွေနဲ့ စစ်သင်တန်းဆင်းမွတ်ဆလင်တွေ ပါဝင်တဲ့ စစ်ကြောင်းကို အေအေက ကြားဖြတ်ဝင်တိုက်တာ။ စစ်ကောင်စီဘက်က အင်အား ၁၀၀ကျော်လောက်ရှိမယ်။ သူတို့ကို အေအေက ကြားဖြတ် ဝင်ရောက်တိုက်ခိုက်တာမို့ အကျအဆုံး ရှိတယ်လို့ သိရပါတယ်။ တိုက်ပွဲလည်း ပြင်းထန်ခဲ့တယ်။ ၁၀နာရီအထိဖြစ်ခဲ့တယ်” ဟုပြောသည်။

တိုက်ပွဲအတွင်း  စစ်ကောင်စီဘက်က အထိနာ အကျအဆုံးများနေသဖြင့် ကျောက်ဖြူ  ရဲတပ်ရင်း(၃၂)နှင့် နှမ်းဖဲတောင်တွင် တပ်စွဲထားသည့် စစ်ကောင်စီ လက်နက်ကြီးစခန်းများမှ တိုက်ပွဲဖြစ်ပွားရာ အနီးအနားရှိ ကျေးရွာများကို လက်နက်ကြီးများဖြင့် ပစ်ခတ်သည့်အပြင် ဒရုန်းဖြင့်လည်း ပစ်ခတ်ခဲ့သည်ဟု စစ်ရေး သတင်းရင်းမြစ်တစ်ဦးက နိရဉ္စရာသတင်းဌာနကို ပြောသည်။ 

လက်နက်ကြီးကျည်များ ကျရောက်ပေါက်ကွဲ၍ ရွာကနေ ထွက်ပြေးနေရကြောင်း  မိကျောင်းတက် ကျေးရွာမှ ဒေသခံ အမျိုးသမီးတစ်ဦးက ပြောသည်။

“ လက်ရှိ ရဲတပ်ရင်းနဲ့  နှမ်းဖဲတောင်ကလည်း လက်နက်ကြီးပစ်တယ်။ ဒရုန်းတွေနဲ့လည်း ပစ်နေလို့ ရွာသားတွေ ထွက်ပြေးနေရပါတယ်” ဟုပြောသည်။

ထွက်ပြေးနေကြရသည် ကျေးရွာများမှာ လက်ရှိတွင်တိုက်ပွဲဖြစ်ပွားရာ နေရာအနီးတွင် တည်ရှိသည့်  ခန္တီးကျေးရွာ၊ မိကျောင်းတက်ကျေးရွာ၊ ဇိုင်ချောင်းနှင့် သိုင်းချောင်းကျေးရွာတို့ဖြစ်ကြသည်ဟု သိရသည်။

ဆက်စပ် သတင်းများ