တောင်ကုတ်သို့ စစ်ကူလာသည့် စစ်ကောင်စီစစ်ကြောင်းတစ်ခုကို AAက ကြားဖြတ်တိုက်ခိုက်၍ ဗိုလ်ကြီးတစ်ဦးအပါအဝင် စစ်သား ၆၀ ကျော်သေဆုံး

Preview

တောင်ကုတ်သို့ စစ်ကူလာသည့် စစ်ကောင်စီစစ်ကြောင်းတစ်ခုကို AAက ကြားဖြတ်တိုက်ခိုက်၍ ဗိုလ်ကြီးတစ်ဦးအပါအဝင် စစ်သား ၆၀ ကျော်သေဆုံး

ဇွန် ၂၁/ ၂၀၂၄ | ကြည့်ရှုသူ :6753

အေးမြတ်ခိုင်၊ နိရဥ္စရာ၊ဇွန်လ ၂၁ /၂၀၂၄

၇ခိုင်ပြည်၊ တောင်ကုတ်မြို့သို့ ပဲခူးတိုင်း ပြည်မြို့ဘက်က စစ်ကူလာသည့် အင်အား (၁၆၀)ခန့်ပါသည့် စစ်ကြောင်း တစ်ကြောင်းကို အာရက္ခတပ်တော်(AA)မှ ဖြတ်တောက်တိုက်ခိုက်၍ ဗိုလ်ကြီးတစ်ဦးအပါအဝင် စစ်ကောင်စီတပ်သား ၆၀ ကျော်သေဆုံးသွားကြောင်း ခိုင်လုံသည့်သတင်းရင်းမြစ် အရ သိရှိ၇သည်။

ပြည်ဘက်မှဆင်းလာသည့် အင်အား ၁၆၀ ခန့်ပါစစ်ကြောင်းအား အေအေကတောင်ကုတ် မြို့နယ်အတွင်း တောင်ကုတ်- ပန်းတောင်း ကားလမ်းမကြီး နေပူတောင်အနီးတွင် ဇွန်လ ၂၀ ရက်နေ့လယ်က ကြားဖြတ်တိုက်ခိုက်ခဲ့သည်ဟု ပြောသည်။

“ တိုက်ပွဲက ဇွန် ၂၀ ရက် နေ့လယ်ကနေ ဒီကနေ့ ဇွန်လ ၂၁ ရက် မနက်ပိုင်းအထိ အပြင်းအထန် ဖြစ်တယ်။ပတ်လည်ရွာနဲ့ နေပူတောင်ကြားမှာဖြစ်တာ။ တပ်တော်က နေရာသေချာယူပြီး ဖြတ်တောက် တိုက်ခိုက်တာ။ဒါကြောင့် စစ်တပ်ဘက်က အကျအဆုံးများတယ်”ဟု ပြောသည်။

တိုက်ပွဲအတွင်းသေဆုံးသွားသည့် ဗိုလ်ကြီးမှာ တောင်ကုတ်မြို့၊ ဂူတာရပ်ကွက်ဇာတိဖြစ်သည်ဟု သိရသော်လည်း နိရဉ္စရာသတင်းဌာန အနေဖြင့် အတည်ပြုနိုင်ခြင်းတော့မရှိသေးပါ။

တိုက်ပွဲအတွင်း အေအေဘက်ကလည်းထိခိုက်ကျဆုံးမှုတချို့ရှိကြောင်း ၎င်းသတင်းရင်းမြစ်ကပြောသည်။

“စစ်ကြောင်း ၁၆၀ လောက် ပြည်ဖက်ကတောင်ကုတ်ကို စစ်ကူလာတာ။ စစ်သား ၆၀ နီးပါး ကျသွားပါတယ်။ ဒါကြောင့် အခုထိ လက်နက်ကြီးတွေ တက္ကသိုလ်မှာတပ်စွဲထားတဲ့ တပ်ကလည်းပစ်ကူတယ်။၅၄၄ ဖက်ကလည်း ပစ်ကူနေပါတယ်။ တပ်ဦးတောင်ထက်ကလည်း ပစ်ကူနေတယ်။ အပြင်းအထန်ပဲ။လေယာဥ်လည်း ကူပေးနေတာ တွေ့တယ်။ အေအေဖက်ကလည်း ဒဏ်ရာရတာ၊ထိခိုက်တာတွေ တချို့ ရှိပါတယ်”ဟု ပြောသည်။

မြေပြင် အထိုင်တပ်များမှ လက်နက်ကြီးများဖြင့် ပစ်ကူပေးသည်သာမက လေကြောင်းမှလည်း ဗုံးကြဲကာပစ်ကူပေးခဲ့သဖြင့် နှစ်ဖက် တိုက်ပွဲမှာ ပြင်းထန်သည်ဟု သိ၇သည်။

တောင်ကုတ်တက္ကသိုလ်မှပါမောက္ခချုပ်နှင့် ဆရာ၊ ဆရာမများကို မောင်းထုတ်ကာ တောင်ကုတ် တက္ကသိုလ်အတွင်းစစ်ကောင်စီက လက်နက်ကြီးများအထိုင်ချကာ တပ်စွဲထားပြီး ယခုရက်ပိုင်းအတွင်းအေအေနှင့် တိုက်ပွဲဖြစ်ပွားမှုများ ရှိခဲ့သည်ဟုလည်း သိ၇သည်။

တောင်ကုတ်မြို့နယ်အတွင်း စစ်ကောင်စီတပ် နှင့် အေအေတို့အကြား တိုက်ပွဲများဖြစ်ပွားနေသည့်အတွက်ဒေသခံထောင်ချီ အိုးအိမ်စွန့်ခွါထွက်ပြေးနေကြရပြီး အရပ်သားများနေထိုင်သည့်မြို့ပေါ်နှင့် ကျေးရွာများကို လက်နက်ကြီး နှင့် လေကြောင်း ပစ်ခတ်မှုများကြောင့်ထိခိုက်သေဆုံးမှုများလည်းရှိနေကြောင်းသိ၇သည်။

တောင်ကုတ်မြို့နယ်၊ပန်းတင်တိုက်နယ် ပန်းတင်ခုံဘုရားကုန်းအနီးတစ်ဝိုက်နှင့် ကျေးရွာ အနီးအနားတစ်ဝိုက်ကို တိုက်ပွဲဖြစ်ပွား ခြင်းမရှိဘဲဇွန်လ ၁၈ ရက်နေ့က မကွေးဖက်မှ တက်လာသည့် စစ်ကောင်စီ၏ ဂျက်ဖိုက်တာတစ်စီးဖြင့်လာရောက်ဗုံးကြဲခဲ့၍ ရွာထဲသို့ ကျရောက် ပေါက်ကွဲကာ လက်နက်ကြီးကျည်စ ထိမှန်၍ အမျိုးသမီး၂ ဦးအပါအဝင် ဒေသခံ၃ ဦးသေဆုံးပြီးအများအပြား ထိခိုက်ဒဏ်ရာရရှိခဲ့ကြသည်။

(ပုံစာ -AAတပ်ဖွဲ့ဝင်များ)

#တောင်ကုတ်

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ဆက်စပ် အကြောင်းအရာများ

နောက်ဆုံးရသတင်းများ