တောင်ကုတ်တိုက်ပွဲ ၅ ရက်အတွင်း စစ်ကောင်စီဘက်က ဗိုလ်ကြီးနှစ်ဦးနှင့် တပ်ဖွဲ့ဝင် ၇၀ ကျော်သေဆုံး

ကံ့ကော်နီနီ ၊ နိရဥ္စရာ ၊ ဇွန် ၂၂ / ၂၀၂၄

ဇွန်လတတိယပတ်မှ စတင်ဖြစ်ပွားလာခဲ့သည့် တောင်ကုတ်တိုက်ပွဲ (၅)ရက် အတောအတွင်း စစ်ကောင်စီဘက်က ဗိုလ်ကြီးနှစ်ဦးနှင့် တပ်ဖွဲ့ဝင် ၇၀ ကျော်သေဆုံးခဲ့ကြောင်း စစ်ရေး သတင်းရင်း မြစ်များက နိရဥ္စရာသတင်းဌာနသို့ပြောသည်။

တိုက်ပွဲအတွင်း ကျဆုံးသွားသည့် ဗိုလ်ကြီးနှစ်ဦးမှာ ခမရ (၅၄၄)မှ ဗိုလ်ကြီးအောင်ဇော်ထွန်းနှင့် ဗိုလ်ကြီးကျော်မင်းသူတို့ဖြစ်ပြီး အခြားတပ်ဖွဲ့ဝင် ၇၀ ကျော်လည်း သေဆုံးခဲ့ကြောင်း စစ်ရေး သတင်းရင်းမြစ် တစ်ဦးက ပြောသည်။'

" တောင်ကုတ်တိုက်ပွဲမှာ စစ်တပ်ဘက်ကဗိုလ်ကြီးနှစ်ယောက်ထိ ကျသွားပြီပေါ့။ ပြီးတော့ တပ်ဖွဲ့ဝင်တွေလည်း ၇၀ ကျော်ကျတယ်။ ဒီထက်လည်းအသေအပျောက်ရှိနိုင်သေးတယ်။ တိုက်ပွဲ စဖြစ်တာက ၅ ရက်ကျော်ပဲရှိသေးတယ်။ အဲဒီအချိန်တိုအတွင်းမှာစစ်တပ်ဘက်က အကျအဆုံး များနေတယ်။ အေအေကနည်းဗျူဟာအရရော တိုက်ရည်ခိုက်ရည်ရောအသာစီးရနေတာ။ အေအေဖက်ကသာ အပြင်းအထန်ထိုးစစ်ဆင်လာမယ်ဆိုရင် တောင်ကုတ်က စစ်ကောင်စီတပ်တွေ သိပ်တောင့်ခံနိုင်တော့မယ့် အလားအလာမရှိတော့ဘူး" ဟု သူကပြောသည်။

ဗိုလ်ကြီးအောင်ဇော်ထွန်းမှာ ဇွန်လ ၁၅ ရက်ညပိုင်းက တောင်ကုတ်မြို့ပေါ်၊ ချောင်းကောက် ရပ်ကွက် တိုက်ပွဲတွင် တပ်ဖွဲ့ဝင်တဦးနှင့်အတူ သေဆုံးသွားခြင်းဖြစ်ပြီး အခြားတပ်ဖွဲ့ဝင် ၅ ဦးလည်း ဒဏ်ရာ ရရှိသွားခဲ့ကြောင်း သိရသည်။

ဗိုလ်ကြီးကျော်မင်းသူမှာ ဇွန်လ ၂၀ ရက်က တောင်ကုတ်မြို့နယ်အတွင်းရှိ ရခိုင်ရိုးမ နေပူတောင်အနီး တိုက်ပွဲတွင် တပ်ဖွဲ့ဝင် ၆၀ ကျော်နှင့် အတူသေဆုံးသွားခြင်း ဖြစ်သည်။

နေပူတောင်တိုက်ပွဲတွင် ကျဆုံးသွားသည့်ဗိုလ်ကြီးကျော်မင်းသူမှာ တောင်ကုတ်မြို့၊ ဂူတာရပ်ကွက်ဇာတိဖြစ်ပြီး ဂူတာစာသင်ကျောင်းနောက်ဘက်လမ်းကြားတွင် နေထိုင်သူများဖြစ် ကြောင်း စစ်ရေးသတင်းရင်းမြစ်ကပြောသည်။

" တောင်ကုတ်ရိုးမပေါ် နေပူတောင်နားကတိုက်ပွဲမှာ ကျသွားတာ ဗိုလ်ကြီးကျော်မင်းသူလို့သိရတယ်။ သူက တောင်ကုတ် ဂူတာကျောင်း နောက်လမ်းကြားမှာနေတာ။ အဖေက ဆရာဦးထွန်းဝေလို့ သိရတယ်" ဟုပြောသည်။

၄င်းဗိုလ်ကြီးကျော်မင်းသူနှင့် တပ်ဖွဲ့ဝင်များမှာပဲခူးတိုင်းမှ စစ်ကူလာသည့် အင်အား ၂၀၀ နီးပါးရှိ စစ်ကောင်စီ စစ်ကြောင်းကို အာရက္ခတပ်တော်ကကြားဖြတ်တိုက်ခိုက်မှုအတွင်း သေဆုံးသွားခဲ့ခြင်း ဖြစ်ကြောင်း စစ်ရေးသတင်းရင်းမြစ်ကပြောသည်။

တောင်ကုတ်တိုက်ပွဲစဖြစ်သည့် ဇွန်လ ၁၅ ရက်မှ ယနေ့ဇွန်လ ၂၂ ရက်အထိ စစ်ကောင်စီလေကြောင်း ဗုံးကြဲတိုက်ခိုက်မှုကြောင့် အရပ်သားပြည်သူ ၄ ဦးသေဆုံးပြီး ထိခိုက်ဒဏ်ရာရရှိသူများလည်းရှိခဲ့သည်။