DMG သတင်းထောက် ကိုထက်အောင်နှင့် ရုံးဝန်ထမ်းတို့ကို ထောင်ဒဏ် ၅ နှစ်စီ ချမှတ်လိုက်မှုကို ရခိုင်သတင်းသမားများ ရှုတ်ချ

ကြိုင်ဟိန်းလင်း နိရဉ္စရာ၊ ဇွန် ၂၉ ရက် ၂၀၂၄

ရခိုင်ပြည်အခြေစိုက် သတင်းဌာနတစ်ခုဖြစ်သည့် Development Media Group (DMG) သတင်း‌ဌာနမှ သတင်းထောက် ကို‌ထက်အောင်နှင့် ရုံးဝန်ထမ်း ကိုစိုးဝင်းအောင်တို့ကို စစ်ကောင်စီက အလုပ်နှင့် ထောင်ဒဏ် ၅ နှစ်စီ ချမှတ်လိုက်သည်။

၎င်းတို့နှစ်ဦးအား စစ်ကောင်စီက ထောင်ဒဏ်ချမှတ်လိုက်ခြင်းမှာ စစ်ကောင်စီသည် ၎င်းတို့အကျိုးစီးပွားအတွက် သတင်းအမှောင်ချရန် ကြိုးစားနေခြင်းဖြစ်သည်ဟု Western News သတင်းဌာနမှ အယ်ဒီတာချုပ် ကိုဝဏ္ဏခွာညိုက ပြောသည်။

" စစ်ကောင်စီက သူတို့အကျိုးစီးပွားအတွက် သတင်းအမှောင်ချဖို့ လွတ်လပ်တဲ့ သတင်းဌာနတွေကို ပိတ်သိမ်းတယ်။ သတင်းထောက်တွေကို ဖမ်းဆီးတယ်။ ပြီးတော့ ပုဒ်မအမျိုးမျိုးတပ်ပြီးတော့ မတရားထောင်ချလိုက်တယ်။ သတင်းထောက်တွေရဲ့ သတင်းရယူပိုင်ခွင့်နဲ့ ပြည်သူတို့ရဲ့ သတင်းသိပိုင်ခွင့်ကို နည်းမျိုးစုံနဲ့ စစ်ကောင်စီက နှောင့်ယှက်ပိတ်ပင်နေတယ်" ဟုပြောသည်။

ထို့အပြင် ၎င်းတို့နှစ်ဦးအား ဖမ်းဆီးထားခြင်းအပေါ် ပြင်းပြင်းထန်ထန်ရှုတ်ချကန့်ကွက်ပြီး ချွင်းချက်မရှိ ပြန်လွှတ်ပေးဖို့လည်း သူကဆက်လက်တောင်းဆိုသည်။

စစ်အာဏာသိမ်းပြီးနောက် မြန်မာနိုင်ငံရှိ သတင်းသမားများသည် အကာအကွယ်မဲ့နေသည့် အနေအထားသို့ ရောက်ရှိနေပြီး ယခုလိုမျိုး ထောင်ဒဏ်ချမှတ်လိုက်မှုအပေါ် ရှုတ်ချသည်ဟုလည်း သ‌တင်းထောက် မချစ်အိလှိုင်က ပြောသည်။

" DMG သတင်းထောက် ကိုထက်အောင်နဲ့ နောက်တစ်ယောက်ကို ထောင်ဒဏ် (၅)နှစ်ထိချမှတ်တာက မဖြစ်သင့်တဲ့ ကိစ္စဖြစ်တယ်။ သတင်းရေးသားခြင်းကို အပြစ်တခုလို ပုဒ်မတွေ အမျိုးမျိုးနဲ့ ဖမ်းဆီးချုပ်နှောင်မှုတွေကို ရှုတ်ချပါတယ်။ ‌သတင်းအလုပ်လုပ်နေကြရတဲ့လူတွေအနေနဲ့ ဓားသွားထက်မှာ လမ်းလျှောက်နေကြရတဲ့အခြေနေနဲ့ လုပ်နေကြရတာပါ။  သတင်းသမားတွေဟာ အကာကွယ်မဲ့ နေရတဲ့ အခြေနေနဲ့ ရင်ဆိုင်နေကြရပါတယ်" ဟု ပြောသည်။

၂၀၂၃ ခုနှစ် အောက်တိုဘာ ၂၉ ရက် (သီတင်းကျွတ်လပြည့်နေ့) တွင် ကိုထက်အောင်သည် စစ်တွေမြို့ ဝင်္ကပါကွင်း၌ ပြုလုပ်သည့် ဆွမ်းတော်ကြီးလောင်းပွဲအား ဓာတ်ပုံသတင်းသွားယူနေစဉ်တွင် အာဏာသိမ်း စစ်ကောင်စီတပ်သားများ၏ မတရားဖမ်းဆီးချုပ်နှောင်ခြင်းကို ခံခဲ့ရသည်။

ကိုထက်အောင်အား ဖမ်းဆီးပြီးနောက် စစ်ကောင်စီတပ်ဖွဲ့ဝင်များက DMG ရုံးသို့ ရောက်ရှိလာကာ ညစောင့် ကိုစိုးဝင်းအောင်အား ဖမ်းဆီးလျက် ရုံးရှိ ကင်မရာ၊ ကွန်ပျူတာနှင့် ဆက်စပ်ပစ္စည်းများကို သိမ်းဆည်းပြီး ရုံးကိုလည်း ချိတ်ပိတ်သွားခဲ့သည်။

ထို့နောက် ၎င်းတို့နှစ်ဦးအား စစ်တွေမြို့ အမှတ် (၁) ရဲစခန်းမှ ရဲအုပ် ဗိုလ်ဗိုလ်ကျော်က တရားလိုပြုလုပ်ကာ အကြမ်းဖက်မှုတိုက်ဖျက်ရေးဥပဒေပုဒ်မ ၅၂ (က) ဖြင့် တရားစွဲဆိုထားသည်ကို စစ်တွေမြို့နယ် တရားရုံးက ဇွန် (၂၈ ) ရက်နေ့တွင် အလုပ်နှင့် ထောင်ဒဏ် ၅ နှစ်စီချမှတ်လိုက်ခြင်း ဖြစ်သည်ဟု DMG မှ ထုတ်ပြန်ထားသည်။

အာဏာသိမ်းစစ်ကောင်စီသည် ၂၀၂၁ ခုနှစ် ဖေဖော်ဝါရီ (၁) ရက်နေ့ နိုင်ငံတော်အာဏာကို မတရားသိမ်းယူလိုက်ပြီးနောက် အပြစ်မဲ့ ပြည်သူလူထုအား မတရား ဖမ်းဆီးသတ်ဖြတ်ခြင်း၊ သတင်းသမားများအား ဖမ်းဆီးသတ်ဖြတ်ခြင်း စသည့်စစ်ရာဇဝတ်မှုများကို မျက်ဝါးထင်ထင် ကျူးလွန်လျက်ရှိသည်။

ရခိုင်ပြည်၌လည်း သတင်းသမား ကိုဖိုးသီဟကို စစ်ကောင်စီတပ်မှ ၂၀၂၂ ခုနှစ် စက်တင်ဘာ ၂၀ ရက်နေ့တွင် မြောက်ဦးမြို့ရှိ သူ၏နေအိမ်မှ စစ်ကောင်စီတပ်သားများက ဖမ်းဆီးသွားခဲ့ပြီး ၂၀၂၄ ခုနှစ် ဇန်နဝါရီလ ၃၁ ရက်နေ့တွင် မြောက်ဦးအခြေစိုက် ခမရ ၃၇၈ တပ်ရင်း၌ စစ်ကောင်စီတပ်သားများက မတရားနှိပ်စက် သတ်ဖြတ်သွားခဲ့သည်။