စစ်တွေ Winner မူကြိုကျောင်းမီးလောင်မှု ရှို့မီးဟုဆို

ရေးသူ: Web Master
| ရက်စွဲ: ၀၅ ဇူလိုင် ၂၀၂၄
| ကြည့်ရှုသူ: 2k

အေးမြတ်ခိုင်၊နိရဉ္စရာ၊ ဇူလိုင် ၅/၂၀၂၄

ရခိုင်ပြည်မြို့တော် စစ်တွေ၊ ဆေးရုံကြီးအနီးရှိ Winner မူကြိုကျောင်း (ယခင်မေယုစားသောက်ဆိုင်ဟောင်း) အဆောက်အဦ ယနေ့ နံနက်က မီးလောင်မှု ဖြစ်ပွားခဲ့ပြီး ၎င်းမီးလောင်မှုမှာ ရှို့မီးဖြစ်ကြောင်း ဒေသခံများက ပြောသည်။

ယနေ့ ဇူလိုင် ၅ ရက်၊ နံနက်အာရုဏ်အချိန်တွင် အမည်မသိလူတစ်ခုက လာရောက်မီးရှို့ခဲ့ပြီး ၅ နာရီ ၄၀ မိနစ်ခန့်တွင် မီးအပြင်းအထန်လောင်ကျွမ်းခဲ့ခြင်းကြောင်း ဒေသခံတစ်ဦးက ပြောသည်။

"အရင် မေယုစားသောက်ဆိုင် လုပ်ခဲ့တဲ့နေရာပါ။ လူတစ်စုရောက်လာတာ တွေ့တယ်။ မကြာဘူးလောင်တယ်ဆိုတော့။ ရှို့မီးလို့ပဲ ကောက်ချက်ချကြတယ်။ အထဲက ပေါက်သံ ၃ ခေါက်လောက် ကြားလိုက်ရပြီး မကြာဘူး ။ မီးတွေကြီးနေတာ။ ဖြစ်စကတော့ သိပ်ထွက် မကြည့်ရဲကြဘူး။ မနက်မှသွားကြည့်တော့ ကြမ်းခင်း‌တွေ၊ အိမ်နံရံတွေ မီးလောင် သွားတယ်။ တစ်ဆောင်လုံးတော့ မပါသွားဘူး" ဟု ပြောသည်။

မီးလောင်ကျွမ်းမှုကြောင့် Winner ကျောင်းဆောင်ထိခိုက်ပျက်စီးသွားခဲ့သော်လည်း တခြားနေအိမ်များကို မီးကူးစက်ခြင်းမရှိခဲ့သလို လူထိခိုက်မှုလည်းမရှိခဲ့ကြောင်း ဒေသခံများက ပြောသည်။ ဓာတ်ပုံ- Aung Kyaw Kyaw